, ta kuminsá ku deseá tur hende un bon dia. Ora ku den un pais, e proseso di responsabilisamentu (kiko bo a hasi, keda sin hasi, mester a hasi i kon a utilisá e medionan ku tabata disponibel) ta pober, te hasta un presupuesto kompletu (lokual no ta e kaso ku esnan di Kòrsou) no ta sufisiente pa por forma un impreshon real di e situashon finansiero di un pais.

****

Den e periodo kaminda gobièrnunan tabata al tantu ku nan kuentanan anual, i tabata sigui reglanan di kontabilidat manera debe ser, Parlamento tabata risibí informashon amplio, koriente, i segun fórmula generalmente aseptá den sírkulonan gubernamental. Pa basta tempu no tin kuentanan anual koriente, no tin narativo di prosesonan ku a transkurí i pió ainda no tabata tin deskripshon di e “balans”.****E “balans” ta laga espasio pa evaluá e solvabilidat di Kòrsou (posishon di debe, eventual reservashonnan, poseshonnan, moveshon den likides, etc, etc). Na momentu ku gabinete Schotte-I pretendé ku e por traspasá e saldo di bon for di BRK pa kubri défisit di e aña presupuestal 2011, e mester splika tambe kiko ta e konsekuensia pa e “balans” riba kual e di bon aki tabata aparesé komo un reservashon.

Ta kuminsá ku deseá tur hende un bon dia.  Un komunidat ku ta respetá su mes no mester tolerá ku un grupo chikitu di paseante (riba puesto den e sistema di gobernashon demokrátiko), ta destrosá lokual generashonnan di turno a konstruí na kapital sosial i material. Bon reputashon den mundu i sigur serka e aliadonan di peso, ta kosta tempu i trabou konsistente pa establesé.

****

Despues di basta tempu e persepshon di Kòrsou komo kuenka di korupshon ta bolbe lanta kabes ku prominensia na Ulanda. Kore kulpa e medionan ku nos sa ta presentá informashon ku un tinte sensashonalista (ta ku tur sorto di notisia nan ta anda asina) ta nada mas ku apliká e táktika konosí di krea un enemigu komun pa kita e atenshon for di e problema real.

Ta kuminsá ku deseá un i tur un bon dia. Mi ta bolbe kuminsá ku e opservashon ku pueblo no a obligá ningun di e aktornan polítiko pa okupá ningun dje puestonan ku nan a aseptá den e sistema di gobernashon demokrátiko di Kòrsou. Nan a drenta di propio gustu i por sali afó ki ora ku nan ta deseá esei. Ta nan opshon esei ta. Ta p’esei tambe e postura di ta esun yamá pa imponé su interpretashon di nos leinan, reglanan i akuerdonan ku otro paisnan ta totalmente inaseptabel.

****

E karta di minister di Hustisia, drs. Elmer Wilsoe, pa Parlamento den kual e ta pretendé di intervení den e kaso Bientu dor di ordená OM pa stòp e investigashon ta kolmo di kolmos. En bes di tene reserva (“terughoudendheid betrachten”) i laga e prosesonan den e kolumna di Poder Hudisial kana (Wes ta esun yamá pa disidí ku un kaso ta legal òf nò), minister ta sigui un supmarino pegá ku un kos pió ainda. Minister drs. Elmer Wilsoe a habri porta hanchu habrí pa minister di Hustisia di Reino, Ivo Opstelten intervení.

Ta kuminsá ku deseá tur hende un bon dia. E asina yamá aserkamentu sientífiko (“scientific approach”) ta unu di transparensia, konsistensha i koutela. Den pèrsiguishon di bèrdat (“waarheidsvinding”) pa definishon bo no por ta tene kos atras, bo no por ta midi ku vários midí i sigur no por ta parotin den e manera ku bo ta atendé ku nada. Di e aktornan polítiko ku un formashon akadémiko, mester por a fèrwagt maske ta algu di e transparensia, konsistensha i koutela den nan aserkamentu di asuntunan.

****

Kredibilidat (bo por kere ku e lokual ta ser pretendé ta korekto) i konfiansa (bo por fèrwagt ku e lokual ta ser primintí ta ser realisá) ta determinante pa e sosten popular di un aktor polítiko. Nan ta e faktornan ku ta indiká e probabilidat di outoridat (e grado den kual bo ta haña hende pa sigui bo instrukshon i direkshon). Barometronan polítiko na Ulanda i Merka ta mustra kon e sosten popular ta varia ku profilamentu di e respektivo aktornan polítiko rondó di un determinado tema.

Ta kuminsá ku deseá un i tur un bon dia. Stratégikamente un kortina di huma no ta nada mas ku un instrumento pa duna e aktor espasio di tempu pa un akshon konkreto. E aktor sea ta bati retirada òf pa ehekutá su akshon di atake. Na momentu ku nada no sigui tras di e kortina di huma, e aktor ta keda manera un “sitting duck”. Dikon?  Pasobra krea un kortina di huma ta un akshon ku no ta kambia e panorama. Na di dos lugá e kreamentu di kortina di huma ta pasobra e aktor ta den pèrtá.

****

Hopi aktor ku ta den pèrta ta drenta den pániko (nan kapasidat pa rasoná ta malamente afektá) i kometé e eror di ranka kibra rondó di nan (intensifiká resistensia kontra di nan). Minister di Hustisia drs. Elmer Wilsoe, manera mi a apuntá previamente, a hasi su posishon ekstremadamente difísil. Gobièrnu di Reino ta bai hala su orea (esei ta lokual den forma diplomátiko a keda komuniká dor di minister drs. Liesbeth Spies). En bes di tene silensio i laga su emoshon kalma, drs. Elmer Wilsoe a ranka kibra den forma personal kontra di mr. Dick Piar.

****

Ta kuminsá ku deseá tur hende un bon dia.  Un enkuesta parlamentario ta un bon instrumento pa hendenan kuerdo, huisioso i ku sentido di responsabilidat usa ora ku esei ta nesesario. Ora ku e ophetivo ta netamente polítiko partidista, un enkuesta parlamentario lo ta nada mas ku oportunidat pa mas i mas desgrasia. Mi ta bastante preokupá ku e echo ku ta mira e enkuesta parlamentario lòs for di e konteksto real, esta un ambiente polítiko kaminda sano wisio no ta abundante.

****

Pa kubri un proseso di formashon ku no a kana korekto (e “screening” en bes di sefta pa yega na bon gobernante a resultá den inisio di mal práktika) nos tin di mira un instituto internashonal pa hasi un apresiashon di eventual kultura di korupshon. E asuntu ku a provoká investigashon di parti di e komishon Rösenmuller mes, esta duda den integridat di miembro (nan) di gabinete Schotte-I, no ta bini na órden. E instituto a splika esaki bon kla. Pues e lokual TI ta bai hasi no ta duna kontesta riba e lokual tabata i ta keda na órden.

Ta kuminsá ku deseá tur hende un bon dia. Den kasi tur ramo di interakshon sosial, bo ta topa hende ku en realidat no ta nada mas ku un impostor. Nan ta asumí ékis postura, tira un determinado diskurso i ta respondé pregunta ku e lokual nan ta kere e oudiensia ta haña aseptabel. E hendenan aki ta kere ku nan ta saka bon benefisio dor di asumí un postura ku no ta kuadra ku nan realidat intrinsiko (“ware ik”). 

****

E personanan aki ta hunga ròl. Esaki no ta e mesun kos ku kumpli ku e ròl ku un determinado funshon ta impliká. Ser gobernante ta impliká ku esun ku ta asumí responsabilidat pa e puesto ta biba den márgen di lokual Lei, órden sosial reinante, tradishon di e puesto i reglanan di gobernashon ta definí. Un impostor ta biba su bida segun su realidat ekstrénsiko pero ta krea e persepshon di ta biba den kuadro di e ròl ku su funshon ta dikta.

****

Kualke importor ta keda demaskará tardi òf trempan pasobra kansansio, deskuido (a medida ku e periodo ku nan tin éksito ta dura nan ta sinti nan mes invensibel) i òf arogansia ta resultá den baster den e máskara ku nan ta kana kuné. Laga mi ripití un bia mas ku un persona ku ékis tendensia di komportashon, hamas i nunka no ta kambia sin mas. Struktura duru di personalidat por lo general no ta koregibel. Ku ékis terapia e por wòrdu kontrolá.

Ta kuminsá ku deseá un i tur un bon dia. Situashon polítiko na Kòrsou ta manera e historia bíbliko di Sodoma i Gomora. Ta kestion di kana ku un flashlight pa wak si a keda aktornan ku a keda ku e integridat personal, profeshonal i polítiko pa ehersé nan respektivo funkshonnan. 

****

Despues di e lokual nos ke deskribí suavemente komo un momentu di “verstandsverbijstering” di minister di Hustisia drs. Elmer Wilsoe, kredibilidat i konfiansa den e elenko polítiko di turno a alkansá un punto krítiko. Por apliká tur sorto di táktika, maña, triki i engaño. Por krea tur sorto di hustifikashon. Echo ta keda ku nivel di nos práktika polítiko a baha te na un nivel kaminda interes di Kòrsou ta malamente komprometé.

****