Ta kuminsá ku deseá un i tur un bon dia. Gran Marcha di karnaval ta tras di lomba i awor ta falta e marcha di despedida. Pero tin otro fecha importante riba e agènda ku ta inisio di kuaresma. Un periodo ku pa e kreyentenan ta konektá ku tumamentu di distansia di lo mundano, materialista i diario pa rekonekt ku esensia di bida. Segun mi tur hende ta kere den algu, inklusive esnan ku ta pretendé di no ta kere den nada. E últimonan ei ta kere ku nan no ta kere den nada.

****

E bentaha grandi di un fecha, periodo òf siklo, ku ta mara na algu ku un grupo grandi ta kere den dje, ta ku bo por adresá e grupo ku un mensahe similar ku un grado mas haltu di probabilidat di asierto. Ta kestion di topa un base di programashon mental riba kual bo por bòrda. Ku un mensahero ku ta inspirá òf tin un grado haltu di outoridat moral, semehante periodo òf fecha ta representá un oportunidat pa trese un “turnaround” den un desaroyo ku mester ser konsiderá komo krítiko.

****

Reflekshon propio i rekonfirmashon di prinsipio i kuadro di balor i norma tabata praktiká komun den tempunan ku ya ta leu tras di lomba. Nos ta bibando un periodo kaminda un grupo demasiado grandi (pa kolmo plamá den kasi tur sekshon di interakshon humano) ta den negasashon di tur lokual ta órden desensia i disiplina. Kanibalismo moderno (habraká otro mentalmente, ku insulto, menasa, etc.) a penetrá te den Parlamento, ku ta ser suponé di ta defendé derechonan fundamental di miembronan di komunidat.

****

Un persona ku ta denunsiá di ta kontra di un determinado grupo den komunidat, a kometé aktonan kastigabel i tin debenan kuantioso na impuesto, den e Kòrsou di awe, por sinta trankil komo minister. Esnan ku ta sostené komo minister ta krea e persepshon falsu ku e minister en kestion lo por representá Kòrsou riba tur foronan internashonal sin ningun sorto di reperkushon. En realidat e echo ku e minister en kestion ta minister ainda ta un indikashon di kon tiki kestion tin di “gangbare regels van goed fatsoen”. “We zijn de weg kwijt”!!!!!!

****

Na Kòrsou ni mas i mas mi ta kontemplá un tendensia di akshonamentu kaminda ningun sorto di “shock” (ni fenómenonan di naturalesa lokal, ni krísis finansiero ekonómiko global, ni konmoshon sosial lokal) no ta kondusí na reflekshon, rekonfirmashon òf reorientashon. E elenko polítiko di poder na Kòrsou (lesa koalishon MAN-MFK-PS), no ta mustra señal ku ta bai alsa e kabesnan un ratu for di e akshonamentu polítiko diario, pa sikiera interpretá “feed back” for di un kuadro di otro ku esun ku ta dikta nan akshonamentu.

****

Ta un situashon komparabel ku un “op hol geslagen kudde” ku no ta aksesisbel mas i ta destruí tur kos riba nan kaminda outodestruktivo. E agènda polítiko di e koalishon MAN-MFK-PS ta unu di “see nothing else, hear nothing else and feel nothing else than ourselves”. Un aserkamentu sumamente meskino ku pa komunidat, ante e realidat global ta pone mi teme pa lo peor. Ora ku esnan ku tin di kuida e frontera ta siegá pa interesnan propio, e komunidat ta vulnerabel ante kualke peliger.

****

E lokual ta pasando na Kòrsou no tin nada pero nèt nèt nada di haber ku direkshon di un pais segun reglanan di gobernashon demokrátiko. No tin e lokual nan ta yama konkordansia den ekspreshon i akshon ku ta usual den un koalishon di maneho. Lokual tin ta “infight” kontinuo ku ta keda interumpí ora ku tin di desplasá un mobilisashon for di oponentenan di e koalishon. Kòrsou ta na merset di un koalishon di poder polítiko ku ta hasi i deshasí riba kabes di e komunidat. Espíritu di gobernashon demokrátiko segun reglanan generalmente aseptá, pa basta tempu ta “ver zoek”.

****

Un kantidat di asiento den un kuerpo representativo, no ta refleho di e sosten elektoral mas aktual (e ta nada mas ku un potrèt di e situashon dia di elekshon, no promé ni despues, pero e dia di elekshon). Un sondeo tampoko no ta nada mas ku un indikashon di kon un posibel elekshon lo por ta si e situashon di momento ta esun di dia di elekshon. Sondeonan ta meramente barometronan ku tin di sirbi komo “feedback.  Por lo demas ta bon pa apuntá ku den e sistema di gobernashon polítiko, poder semper ta keda algu pasahero.

****

Ora ku kalke aktor polítiko sea ta persona òf organisashon bira surdu i siegu pa atvertensia di e lokual nan ta sembra ku nan aserkamentu, e desenlase di nan permanensia den posishon di poder por tin reperkushon grave prinsipalmente pa nan mes. Hopi bia esnan ku ta saka benefisio di e posishon di poder di sierto aktornan polítiko ta e proménan ku ta bandoná nan en buska di un posishon di influensia rondó di e núkleo di poder nobo.

****

Siensia, a base di susesonan históriko, ta mustra ku na momentu ku e masa sinti su mes defroudá den un elenko di poder polítiko, por presentá un situashon ku por ta e “broeiplaats” pa maestronan den manipulashon di opinion públiko, surgi na mando. Usamentu di poder riba kabes di komunidat ta krea un situashon kaminda te hasta un mente perturbá òf algun hende ku intenshon maligno òf di kapasidat di maneho limitá, por hinka un komunidat den desaster ku lo bai tuma añanan pa drecha.

****

Ta p’esei aktornan ku ta hiba un aserkamentu demasiado klíniko no ta logra e sosten popular nesesario pa por ehersé influensia riba e proseso di gobernashon. Ora ku bo tin un situashon di deskonfiansa plamá den e gremio polítiko, esun di buena fe, mester komprondé ku e tin ku saka siñansa for di e aserkamentu bíbliko, esta di utilisá aktornan ku ta prepará e kaminda i apliká táktika pa gana konfiansa promé ku trata di plama e mensahe. Kere mi e mihó literatura di strategia ta Biblia.

****

Skina di Sorti ta ripití ku nos meta ta di fomentá un desaroyo di pensamentu krítiko den komunidat i komo tal nos no ta pro ni kontra persona, pero ta sostené òf rechasá desaroyo, posishon i desishon. Te mañan ku poder di Dios. Kòrda ku bo kontribushon dirigí na This e-mail address is being protected from spambots. You need JavaScript enabled to view it ta bon biní.