Ta kuminsá ku deseá un i tur un bon dia. Laga mi kuminsá ku un nota di aprobashon. E ta bai pa lider polítiko di FOL, Anthony Godett, ku a hala orea di su koleganan riba e echo ku komunidat no ta sirbi ku e tendensia di agènda kosnan di hende enbes di asuntu. Tambe su remarke riba e kuestion ku minister di Finansa, George Jamaloodin, ta pidi un reunion di Parlamento pa atendé ku lèkmentu di su (i di su kolega el Hakim) datos di impuesto, no ta na su lugá.

****

Minister di Finansa, George Jamaloodin, sea ta hala un banda i laga un hende sinta ku no ta den e situashon di konflikto di interes atendé ku e situashon den un departamentu ku ta kai bou di su responsabilidat, òf e ta akseptá e riesgo di su situashon di konflikto di interes i ta atendé ku e ámtenar en kuestion. E Lei ku ta regla posishon hurídiko di empleado públiko ta dikta kual ta e prosedura ku e mester kana.

****

Si e minister ke hasi polítika ku e asuntu, e ta hasi un petishon òf duna instrukshon na miembronan di frakshon di PS na sede di partido. Minister su relashon ante Parlamento ta sea di pidi pa e bin duna splikashon òf informá Parlamento òf di bini riba petishon di Parlamento pa kumpli ku un òf otro petishon (duna kuenta i rason òf splikashon). E no tin nada di pidi reunion pa hasi polítika partidista òf personal.

****

E echo ku Parlamentario pa PAR, Pedro Atacho, tin embolbimentu den e asuntu, por ta motibu di un reunion interno di Parlamento, pero e minister di Finansa, George Jamaloodin, no tin nada pero nèt nèt nada di bin bisa e miembro di Parlamento i sigur no den un reunion públiko. E miembro di Parlamento, Pedro Atacho, ta gosa di imunidat parlamentario pa lokual ta e manera ku el a optené e informashon.

****

E reunion ku e minister di Finansa, George Jamaloodin, a pidi, en realidat mester ta un suisidio polítiko p’e. Na di promé lugá Parlamentarionan ku ke defendé e sistema mester duna e minister un raspou pa su falta di kompetensia (trese un asuntu relashoná ku personal ku ta resortá bou di dje) den un reunion públiko i pa su bistimentu di un pèchi ku no ta di dje (pidi un reunion pa hasi polítika). Na di dos lugá e frakshon di PAR tin tur espasio pa span e asuntu polítikamente.

****

Mi por imaginá mi mes ku den un primera tanda, nan ta hasi pregunta riba e fenómeno di lèkmentu di informashon (kiko ta posishon di Gobièrnu i òf minister riba e fenómeno, kon e ta afektá integridat di e sistema, ki implikashon e por tin pa reputashon di Kòrsou, kual otro faktornan ta afektá e reputashon, ets). Tambe mi por imaginá mi mes pregunta riba dimenshon di e fenómeno di lèkmentu di informashon di impuesto. Pues si ta e kaso ei so e minister ta na altura di dje.

****

E minister di Finansa, George Jamaloodin, a habri un trampa serio pa su mes i promé minister dr. Gerrit Schotte hc, a keda pintá komo hendenan ku ta midi ku vários midí ku ta unu pa nan mes i otro pa demas. Lider di frakshon di FOL, Anthony Godett, mester a splika lider di frakshon di MFK, Dean Rozier, ku e punto di agènda ku a keda pon’é riba insitashon di su minister, George Jamaloodin, ta un punto di agènda ku ta meritá proposishon di órden pa keda kitá.

****

Pa lokual ta e empleado enkuestion mes, ta bini e punto ku e echo ku ta hasi e asuntu unu di diskushon polítiko riba un foro públiko mester tin konsekuensia pa e “strafmaat”. E empleado enkuestion, ku e eksposishon públiko a ser kastigá basta pisá kaba. E akto ku el a kometé ta kastigabel, pero e kastigu ku e ta meresé no por surpasá esun ku Lei ta stipulá. Mi ke apuntá ku énfasis ku minister George Jamaloodin ante e empleado públiko ku ta resortá bou di dje, ta totalmente for di órden. Bo no ta trata un ámtenar asina ei. Bo no ta hunga polítika riba su lomba. Foei!!!!

****

Pa lokual ta e manera ku minister drs. Liesbeth Spies a posishoná su mes ante Gabinete Schotte-I, mi ta mas kombensí ainda ku ta trata di algu stratégiko. Mi ta hopi inkliná pa kere ku e strategia ta unu di duna e Gabinete Schotte-I kabuya pa e kologá su mes. E ekspreshon di konfiansa den promesa di Gabinete Schotte-I, ta impliká ku inkumplimentu ta nifiká deskonfiansa hustifiká.

****

Gabinete Schotte-I a pone su mes bou di un preshon grandísimo ku su kreamentu di pèrsèpshon di “rozengeur en maneschijn”. No solamente ante Gobièrnu di Reino, pero mas ainda ante e masa na Kòrsou. Nan a pinta e pèrsèpshon di un pais ku ta na víspera di prosperidat bou di nan maneho inovativo. Awor e realidat poko poko pero irevokabel ta bishitá kas di vários grupo den komunidat.

****

E kambionan di impuesto, den un siklo di kontrakshon ekonómiko, ta pisa riba e masa ku ta keda konfrontá ku e inflashon importá (merkado global su influensia) i esun lokal (oumento di impuesto riba benta). Un di e konsekuensianan di oumento di kosto ora tin kontrakshon ekonómiko ta “smokkelhandel” i soborno (paga pa pasa kos sin paga òf pagando pa ménos produkto).

****

Al final mi ke bolbe pone énfasis riba e echo ku ta kontra di kustumber (“goed fatsoen”) i normanan polítiko gubernamental ku un minister ku ta motibu di konsternashon grave (“zeer in opspraak zijn”), manera ta e kaso ku minister Nasser Abdul el Hakim, kende ta sinta komo sifuera nada no ta pasando. Shon minister ta ofisialmente raportá komo “belastingontduiker, opmaken van valse belastingaangiftes, het niet afdragen van ingehouden premies, etc”.

****

Mi ta ripití ku minister Nasser Abdul el Hakim, no ta sostenibel (e tin ku bai) i ku esun ku mester asumí responsabilidat pa e situashon aki, ta dr. Gerrit Schotte hc. “Hij en niemand anders, heeft er een potje van gemaakt”!!!!!!!!!!!

****

Skina di Sòrti ta ripití ku nos meta ta di fomentá un desaroyo di pensamentu krítiko den komunidat i komo tal nos no ta pro ni kontra persona, pero ta sostené òf rechasá desaroyo, posishon i desishon. Te mañan ku poder di Dios. Kòrda ku bo kontribushon dirigí na This e-mail address is being protected from spambots. You need JavaScript enabled to view it ta bonbiní.