ta deseá tur hende un bon siman. Un minister ku ta provoká konmoshon sosial (“in opspraak zijn”) por lo general ta saka su konklushon. Ta un desishon pa di un banda kuida integridat di gobernashon (su asuntunan no ta tira nan sombra riba henter Gobièrnu) i di otro banda dun’é e espasio nesesario pa atendé ku su asuntunan personal (un funshon públiko pa definishon ta pone restrikshon na e espasio pa atendé asuntunan personal).

****

Naturalmente un aktor polítiko (ku sosten di su aliadonan) por hasi komo si fuera no tin problema p’e òf Gobièrnu. E por asumí e postura di despota ku tin poder apsoluto i por imponé su pèrsèpshon di moralidat (pa e mayoria mas bien falta di moralidat) riba e komunidat (un akto ku ta un violashon serio di e filosofia di gobernashon demokrátiko di ´gobernashon pa e pueblo dor di e pueblo´). Básikamente e postura ku koalishon MAN-MFK-PS ta demonstrando te ainda.

****

Minister enkargá ku Asuntunan Ekonómiko i Turismo, Nasser Abdul el Hakim, for di e proseso di “screening” ta seriamente komprometé pa asuntunan ku ta representá un konflikto serio di interes pa su mes i su kopartidarionan den Konseho di Minister. No ta meramente un kuestion di debe di impuesto, pero tin denunsia di aktonan kriminal, asosiashon ku un organisashon terorista i antipatia molestioso kontra di un grupo spesífiko di yu di Kòrsou.

****

Minister i Parlamentario ta huramentá pa sirbi i representá henter un komunidat. Den e denunsia ku un suidadano a hasi (previamente tabatin vários denunsia kaba) kontra di minister Nasser Abdul el Hakim, tin kosnan ku ta meritá un posishon di Gabinete Schotte-I, Parlamento komo instituto i MFK komo partido.

****

For di e momentu ku Gabinete Schotte-I a denunsiá violashon di sekreto despues di e relato di komishon Rossenmöler, mi a apuntá ku Gabinete Schotte-I a habri kaminda pa denunsianan kontra di vários di su miembronan. Sea bo ta asumí un postura di toleransia diskreto òf bo ta pèrsiguí tur infrakshon.

****

Despues ku Gabinete Schotte-I a denunsiá e “klokkenluider” ku a divulgá situashon di debe di impuesto di ministernan Hakim i Jamaloodin, mi a apuntá ku e denunsia ta na su lugá (pa mantené integridat di e sistema di impuesto i kobransa di Gobièrnu), pero ku mester atendé e violashon di derecho di sekresia bankario di presidente di Banko Sentral, dr. Emsley Tromp, tambe.

****

Den kualke pais kaminda Parlamento komo instituto ta funshoná (enbes di ta operá komo instrumento pa atendé rivalidat polítiko partidista, òf personal), minister Nasser Abdul el Hakim, su posishon lo no ta sostenibel. Apesar ku e ekspreshonnan ante Hudiu, no a tuma lugá riba un foro públiko, e echo ku e denunsia ta formal sin ku e minister a refutá esaki (e no ta bai Korte pa eksigí rektifikashon), ta sufisiente motibu pa e minister keda konvoká ante Parlamento. Kiko minister Nasser Abdul el Hakim por yuda ku’ne den relashon komersial ku paisnan manera Merka i Israel? “Inpakken en wegwezen”!!!!!!!!!!!

****

Mi ke ripití ku e triki pa enkargá Transparancy International pa bin hasi un análisis di e nivel di korupshon na Kòrsou ta algu ku Gabinete Rutte-I (riba insitashon di mr. Piet Hein Donner, ku tabatin ansha pa bai Raad van State) hamas i nunka mester a akseptá komo táktika pa bari e asuntu di integridat di vários miembro di Gabinete Schotte-I (promé minister dr. Gerrit Schotte hc inklusive) bou di tapeit.

****

Ta un insulto pa e empleadonan públiko i e komunidat den su totalidat, ku algu insidental (un par di persona ku lo bai okupá un puesto ministerial) ta wòrdu interpretá komo algu struktural (un aspekto di e kultura gubernamental). No por!!! Awor mester krea un “label” pa henter un komunidat pa mantené un par di hende ku kon ku bo wak e asuntu, no mester a keda nombrá komo minister.

****

Ta promé ku kampaña elektoral a kuminsá fluho di plaka tabata un “issue” den kampaña di MFK (kualke “weldenkend mens” a puntra ta di unda plaka tabata bini i ki benefisio e suministrador lo por tabatin). Despues a resultá ku ta múltiple situashon di depósitonan inusual tabatin. Despues a resultá ku tabatin asosiashon ku aktor metí den sirkuito di Mafia italiano i ku te hasta a proponé konsiglieri di e mafioso komo presidente di hunta di komisario di Banko Sentral di Kòrsou i Sint Maarten.

****

Ta presis lokual e nota konfidensial ku promé minister dr. Gerrit Schotte hc, a kalifiká komo redashi a atvertí p’e. Pero ta Alf nos ta, pues “no problem”! Otro supuesto redashi ku entre tantu a bira echo konfirmá, ta esun di debe na impuesto kuantioso di minister di Finansa (kualke “weldenkend mens” ta komprondé ku esei ta representá un konflikto di interes). Ta bon tambe pa apuntá ku direktor di BAB, ta hasi su mes i Gobièrnu un mal fabor, ku su falta di distansia. BAB ta wòrdu komprometé ku e realidat di debe i aparente inkumplimentu di e ministernan konserní.

****

Pues no laga nos tuma otro hasi ni laga simpatia i antipatia kousa kreamentu ni akseptamentu di konstrukshonnan polítiko pa tapa lokual ta integridat di Gabinete Schotte-I. No ta kuestion di redu, pero kuestion di echonan molestioso ku ta trata di bagatelisá. Ya no ta kuestion di duda hustifiká (“gerechtvaardigde wantrouwen”) den proseder di promé minister dr. Gerrit Schotte hc, pero di un situashon virtualmente imposibel pa Gabinete Schotte-I.

****

E no por sigui skonde pa e problema ku minister Nasser Abdul el Hakim ta representá. Unabes ku Nasser Abdul el Hakim kai, historia polítiko ta mustra ku un karambòl ta bai sigui. Formashon di grupo, iritashon den Gobièrnu i den koalishon i finalmente posibel bulamentu di kurá.

****

Skina di Sòrti ta ripití ku nos meta ta di fomentá un desaroyo di pensamentu krítiko den komunidat i komo tal nos no ta pro ni kontra persona, pero ta sostené òf rechasá desaroyo, posishon i desishon. Te mañan ku poder di Dios. Kòrda ku bo kontribushon dirigí na This e-mail address is being protected from spambots. You need JavaScript enabled to view it ta bonbiní.