Ta kuminsá ku deseá tur hende un bon dia. Minister di Finansa, George Jamaloodin di MFK, den su reakshon riba ponensia/pregunta di Parlamentario di PAR, Zita Jesus Leito MBA, ke krea e pèrsèpshon ku e Parlamentario di PAR, no ta komprondé Finansa Públiko. E ekspreshon polítiko aki di minister George Jamaloodin, ta bisa mas di e propio George Jamaloodin ku e ta bisa algu di e konosementu di materia di Zita Jesus Leito MBA.

****

E Parlamentario di PAR, Zita Jesus Leito MBA, tin sertifikado di formashon avansá, tin kuríkulo (sektor privá, i públiko) i eksperensia komo Diputado i komo Parlamentario. Minister George Jamaloodin apénas tin 16 luna den e puesto, no tin sertifikado di formashon i su kuríkulo empresarial tin e minister den posishon di defensa. Mi a trata di ta konkreto sin ta “onnodig kwetsend”.

****

E táktika polítiko di spanta balente pa sali for di un perkansia polítiko, no ta algu ku minister George Jamaloodin mester a rekurí na dje, i sigur no na un manera ku ta habri porta hanchu habrí pa eksponé su propio vulnerabilidat (ku ta falta grave di konosementu di materia). Ora ku bo tin falta di konosementu i abilidat den materia, bo mester keda al kaso i na su sierto momentu te hasta mester tene e lepnan riba otro.

****

Pero minister di Finansa, George Jamaloodin, ta bira emoshonal i ta hinka su mes den problema sin nodi. El a tuma e mal kustumber di buska konfrontashon ku hendenan ku ta “over match” e den materia. Por ehèmpel e desafiamentu di presidente di Banko Sentral, dr. Emsley Tromp, riba asuntunan monetario. E puesto di minister ta unu di tumamentu di desishon i posishon polítiko gubernamental.

****

E minister no tin ningun motibu pa desafiá konosementu i abilidat den materia di ningun hende i sigur no di hendenan ku mihó sertifikado di formashon i kuríkulo. E tin di krea i mantené sosten polítiko i popular tras di eventual desishon i akshon di maneho i duna kuenta i rason na Parlamento.

****

Na di promé lugá un Parlamentario ta den su derecho i te hasta tin e deber di kontrolá Gobièrnu. Den e kaso spesífiko ku Zita Jesus Leito MBA a hasi opservashon en kuantu aparente imprudensia di minister George Jamaloodin, ku e presupuesto di 2012, e Parlamentario tabata pa kolmo “on the ball” ku un asuntu genuino di gobernashon. Ken otro ku no ta un di esnan enkargá ku negoshashon di refinansiamentu di debe por komprondé importansia di kumplimentu ku palabrashonnan riba maneho finansiero.

****

Den e struktura estatal reinante, Gobièrnu di Reino i Tweede Kamer tin influensia riba e proseso gubernamental na Kòrsou. Statüt ta duna Gobièrnu di Reino e responsabilidat pa garantisá (“waarborgfunctie”) nivel di gobernashon na Kòrsou. Tweede Kamer ta e instrumento ku ta ser utilisá pa kontrolá e kumplimentu di e “waarborgfunctie”. Ku e areglo pa refinansiá debe, e kòntròl riba maneho finansiero a haña un instrumento adishonal ku ta e Komishon di Supervishon Finansiero.

****

Na momentu ku Gobièrnu di Reino agèndá preokupashon ku e presupuesto di aña 2012, i minister di Finansa George Jamaloodin mes no a tuma inisiativa pa informá Parlamento di Kòrsou, e mester komprondé ku for di Parlamento ta bai bini pregunta, ekspreshon di preokupashon i tumamentu di posishon polítiko. E lokual minister George Jamaloodin mester a hasi ta di bisa Prensa ku e ta warda e reunion ku Parlamento promé di hasi kualke ekspreshon riba e asuntu. Punto!!

****

E ta bai Parlamento i ta laga su konseheronan formulá kontestanan al kaso. E ta laga e parti di polítika partidista wòrdu hasí dor di miembronan di e frakshonan ku ta sostené Gobièrnu. Di otro banda mi ta mira ku eks minister i Parlamentario pa PAR, Omayra Leeflang, ta pone su propio Parlamentarionan den posishon vulnerabel. Su pikamentu di miembronan di e koalishon MAN-MFK-PS ta keda kontestá ku atakenan feros riba lider polítiko i otro karanan di PAR (asina e wega ta ser hungá).

****

Despues di 16 luna di e realidat ku PAR, PNP i FOL ta forma oposishon i MAN, PS i MFK ta forma koalishon, no tin ningun sentido pa mantené e intensidat i magnitut di rivalidat polítiko ku ta ser praktiká. Polítikamente e ta kousando mas malu ku e ta trese benefisio pa e aktornan enbolbí. E problema ta sinta den un falta di disposishon mental pa “move on” a base di e manera ku e kartanan ta riba mesa. Konsekuensia di esei ta papiamentu di kosnan (kondishoná pa rivalidat polítiko enfermiso), ku ta insensato i na okashon te hasta ridíkulo.

****

Den maneho e pregunta ku bo tin di hasi no ta kiko mester hasi pa mantené òf haña un bon imáhen, pero kiko tin di hasi pa alkansá e meta. Pero ku rivalidat polítiko (e “driving force” den nos práktika polítiko), e aspekto gubernamental (pues di maneho) ta supordiná (serka hopi e no tei mes). E aspekto gubernamental ta wòrdu midí na e grado di progreso den e faktornan ku ta determiná kalidat di bida (e masa su sensashon di nivel di bida no ta igual na esun dje grupito den òf rondó di “de politiek”).

****

Generá mas entrada i redusí gastu ta ehersisio pa yega na surplus pa por finansiá lokual por kondusí na progreso den faktornan ku ta elevá nivel di bida. Mi a splika na algun okashon ku bo no por yega na un mihó nivel di entrada i ménos gastu si bo no logra restrukturashon sosio kultural (e “way of life”). Ta algu ku grandinan den materia di desaroyo manera Amartya Sen ta siña.

****

Ku un “mindset” ku ta asfiksiá ku e pensamentu di solushonnan mágiko i “quick fix” ku ta dominá nos práktika polítiko, e mayoria di nos aktornan polítiko ta rekurí na oportunismo elektoral ku ta enfatisá e “way of life” ku de fakto ta e opstákulo mayó pa yega na avanse konsistente di desaroyo sosio ekonómiko na Kòrsou. Ta apénas un pipita di aktor polítiko ta manifestá un vishon i ta presentá algun pretenshon di maneho ku ta realmente “food for thought”.

****

Demas ta pèrsistí den e tipo di “loopgraven oorlog” ku a intensifiká durante di e proseso estatal, i ku no ta yuda pais ku nada. Durante di e “loopgravenoorlog” eksistente nos a bai mas patras ku dilanti. Tin un falta króniko di reflekshon i forsa mental pa aseptá fayo i buska manera pa bai bèk riba e kurso korekto.

****

Mi ke sa ku mester stòp di pidi Tula pa keda warda, pasobra no ta kuestion di falta di velosidat, pero kuestion di ta den direkshon totalmente robes nos ta. Esnan ku tabata riba un bon kaminda a kai den e bòm i a adoptá e mesun aserkamentu di kangreu. Ta den bòm tur tin di keda? Esaki ta e “ongezonde startpositie” ku mi a atvertí p’e.

****

Skina di Sòrti ta ripití ku nos meta ta di fomentá un desaroyo di pensamentu krítiko den komunidat i komo tal nos no ta pro ni kontra persona, pero ta sostené òf rechasá desaroyo, posishon i desishon. Te otro mañan ku poder di Dios. Kòrda ku bo kontribushon dirigí na This e-mail address is being protected from spambots. You need JavaScript enabled to view it ta bonbiní.