Ta kuminsá ku deseá tur hende un bon dia. Kualke organisashon mester programá momentu di evaluashon profundo di su funshonamentu i mas ku tur kos e viabilidat di su kousa sosial (su derechi di eksistensia). Ta a base di un determinado kousa sosial, hende ta agrupá i formalisá nan aliansa den un organisashon. Organisashonnan polítiko ta wòrdu suponé di ta diferensiá for di otro den e manera (ideologia) i aksento (filosofia) ku nan ta opta p’e. Pero tur mester ta trata di elevá nivel di bida den forma duradero.

****

Den paisnan ku ta brasa e sistema di gobernashon demokrátiko, e derechonan ku e sistema ta brinda ta ser konsiderá parti esensial di e lokual ta kontribui na e sentido di bienestar di e komunidat. Ta p’esei kualke koalishon di gobernashon (e mayoria den Parlamento) tin di biba e lokual eks vise presidente di Raad van State, mr. Tjeenk Willink, ta splika riba e lokualnan ta determiná e nivel i kalidat di un demokrasia.

****

Mi ta kere ku mester por tin konsenso riba e outoridat di mr. Tjeenk Willink riba e materia. Tuma nota ku mr. Tjeenk Willink a raspa Gabinete di drs. Jan Peter Balkenende i Tweede Kamer riba vários aspekto di nan práktika polítiko. Pa oportunismo tin hende ku mester sa mihó ku ta dispuesto pa sostené aktor polítiko ku ta karesé di kualke sorto di legitimidat rashonal (ningun sorto di sertifikado òf kuríkulo ku por meritá esei).

****

E eks vise presidente di Raad van State, mr. Tjeenk Willink, ta apuntá ku: “Niet doelmatigheid en doeltreffendheid, maar rechtsgelijkheid en rechtszekerheid, democratische legitimiteit en publieke verantwoording zijn de onderscheidende criteria voor de kwaliteit van het openbaar bestuur in de democratische rechtsstaat”. Pues sea kual sea e táktikanan ku ta ser apliká, i sea kual sea e legitimidat rashonal ku un eventual posishon di maneho por tin, e no ta korekto ora ku e ta kontra di e lokualnan ta determinante pa e nivel i kalidat di e sistema demokrátiko.

****

Durante di e gobernashon di e koalishon PAR-PNP-FOL mi a hala orea di e koalishon menshoná, pasobra nan tabata hustifiká vários akshonamentu ku supuesto realisashon di “doelmatigheid en doeltreffendheid”. Mi ta ripití ku algun di e intenshonnan di maneho ei tabatin legitimidat rashonal. Pero nos sistema di gobernashon ta pone peso den partisipashon di e komunidat den tomo di desishon.

****

Pues e problema ku mi tabatin ku e koalishon PAR-PNP-FOL tabata den e filosofia adoptá ku “het doel heiligt de middelen”. For di e formashon di e koalishon PAR-PNP-FOL mi a atvertí ku e kuestion di formashon di un koalishon ku “botsende bestuursculturen” (PAR a kampañá kontra di e kultura di gobernashon ku FOL tabata representá), tabata representá un froude elektoral.

****

Tambe mi a apuntá ku pa e organisashonnan enkuestion (PAR, PNP i FOL), partikularmente pa PAR, e realidat di kulturanan di gobernashon ku ta den konflikto, lo afektá e respektivo organisashonnan su stabilidat interno. Miéntras ku e partidonan tabata den poder di gobernashon (hopi puesto pa repartí i hopi ekspektativa pa un posishon sosial benefisioso), masha hopi problema ku tabata desaroyando a keda maskeá. No ta diripiente nan ta bini nan ta presentá.

****

Ku MAN ku a kaba di kumpli 41 aña di eksistensia ta konfrontá problemanan serio ta ser maskeá pa e echo ku MAN ta parti di e konstelashon MAN-MFK-PS ku ta forma Gobièrnu. E koalishon ta mas kontroversial ku esun di “botsende bestuursculturen” ku PAR-PNP-FOL a forma. Un promé minister ku MAN no tabata konsiderá apto pa ta su lider polítiko, pero ku MAN su frakshon tin di sostené i defendé “door dik en dun” kontra di tur sorto di práktika ku ta violá te hasta prinsipionan statutario di MAN.

****

MAN LIMPI den gobernashon di añanan ‘80 ku mester a karga ku atakenan fuerte di FOL pa vários aña pa supuesto traishon kontra di FOL, awe ta konfrontando un krísis di identidat pió ku esun di PAR ku sikiera por bisa ku su kousa sosial inisial a evaporá ku realisashon di e realidat estatal nobo na 10-10-10. Kualke kontemplashon ophetivo di pretenshon, intenshon i akshonnan di maneho (“bestuursdaden”) di 1994 te 2012 di PAR, MAN, FOL, PNP, MFK, i PS ta laga PAR klaramente i sin lugá pa ningun duda, komo e organisashon polítiko ku ta alsa mas punto.

****

MAN, FOL, MFK i PS ta surpasá e límite di lokual ta akseptabel ante e prinsipionan ku mr. Tjeenk Willink a denominá komo e “onderscheidende criteria voor de kwaliteit van het openbaar bestuur in de democratische rechtsstaat”. PAR i PNP den kuadro di un filosofia robes di “het doel heiligt de middelen”, den realisashon di e akuerdonan estatal a faya ante e prinsipionan di transparensia i krea/mantené “maatschappelijk draagvlak” pa asuntunan ku nan a sinti lo tabata bai konta ku resistensia.

****

E lokual MFK, MAN, PS i na momentu sostené pa FOL a bini ta praktiká ta un atentado serio (kon rafiná i kon ingeniosamente hustifiká), grave i molestioso di “democratische basisprincipes”. Ta un maluso di legitimidat demokrátiko i hurídiko ku ta atentá kontra di tur sentido di moralidat posibel. Kualke konstrukshon pa imponé boluntat di un grupo (sea kual sea dimenshon di e mayoria) riba un otro ta kontra di e prinsipio básiko di e sistema demokrátiko.

****

E fenómeno aki (e práktika i e hustifikashon di e práktika) tin su splikashon. E outoridat indiskutí. Mr. Tjeenk Willink: “De kennis van en het begrip voor de beginselen waarop de democratische rechtsstaat rusten, zijn de laatste decennia bij volksvertegenwoordigers, bewindslieden, ambtenaren en journalisten afgenomen". Nos Parlamento i Gabinete Schotte-I tin demasiado “wise guys” i poko “wise men”. Hopi gai bibu i poko hende huisioso.

****

Mediokresia ta e plato di tur dia. Rivalidat i patronahe polítiko ta e wega i komunidat ta ser aserká for di e pensamentu ku ta dos blòki tin, esta esnan ku ta ku MFK-PS-MAN i demas. E promé ta imponé su boluntat kontra di demas ku tur sorto di arma i ta siegu pa e realidat ku e poder ku nan tin ta temporal.

****

Moralidat kontrali na lokual ta esensial pa kalidat di bida. Den práktika polítiko elevá, aktornan ta masha “terughoudend” pa lokual ta trata mishimentu ku asuntunan ku ta regardá derechonan fundamental. Kaminda e práktika ta mustra tendensia di ta regresá pa kanibalismo, mi ta teme ku kualke chispa por provoká un erupshon sosial ku konsekuensia di lamentá. Ojo!!!!!!!!!!!!!!

****

Skina di Sòrti ta ripití ku nos meta ta di fomentá un desaroyo di pensamentu krítiko den komunidat i komo tal nos no ta pro ni kontra persona, pero ta sostené òf rechasá desaroyo, posishon i desishon. Te mañan ku poder di Dios. Kòrda ku bo kontribushon dirigí na This e-mail address is being protected from spambots. You need JavaScript enabled to view it ta bonbiní.