Ta kuminsá ku deseá tur hende un bon dia. E fenómeno di kampaña sushi òf engañoso ta algu ku hopi a investigá entre kual Scott Desposato ku a hasi un investigashon sientífiko ku el a publiká bou di e título “Going Negative in Comparative Perspective, Electoral Rules and Campaign Strategies”. Mi ta hasi referensia na e trabou aki komo ku e ta mustra riba e kompleksidat ku semehante aserkamentu stratégiko ta trese kompará ku al final poko impakto.

****

E aserkamentu ku mi ta denominá komo ´blancha i mancha muraya´ tin efektividat den un konfrontashon entre un kantidat limitá di aktor, den un área geográfiko limitá. E ta mas útil komo táktika (ophetivo di tèrmino korto, manera un konfrontashon entre un kantidat di aktor por ta) pero no riba tèrmino largu (un kampaña elektoral kaminda vários aktor ta konfrontá otro ante diversidat di grupo).

****

Un aktor ku profilá su mes komo “dirty” òf “Tricky Dicky” manera tabata e kaso ku Richard Nixon por lo general ta esun ku bou di sirkunstansia normal ta gana di esun ku ta ser pèrsibí komo onesto i amabel. Kampaña engañoso (por ehèmpel e lokual ta ser kalifiká komo “tactiek van de geschroeide aarde”) no ta kondusí na bentaha elektoral duradero. Ku lomba kantu di muraya bo por rekurí na e táktika, pero no mester elevá nan na strategia (bo kultura di organisashon e ora ei tin nan internalisá).

****

Strategia sea kual sea e área di interakshon humano ta keda basá riba e mesun prinsipionan. Bo mester sa ta kiko e klientela ta deseá, kon su tendensia di reakshon ta ante sierto kos, kual ta su situashon di momentu, ki prioridatnan e respektivo gruponan tin, ken ta bo kompetidor, kual ta e alternativanan, kual ta bo puntonan di fortalesa i kual ta esnan di debilidat, i mas ku tur kos kon bon bo produkto ta (téknikamente i den bista di e konsumidó).

****

Esun ku ta fuerte, ku bon produkto (sigur den bista dje klientela) no tin nada di buska den táktikanan engañoso. E por retalia si (dal pa transmití un mensahe i hala kita) pero no ta hiba un aserkamentu basá riba dje. Si mi wak e resultado di e enkuesta ku a keda hasí riba enkargo di un partido polítiko na Kòrsou, kaminda MFK lo a saka 8 asiento, kontra 7 di PAR, 3 pa PS, 2 pa MAN i 1 pa PNP, mi ta konsiderá ku koalishon (MAN-MFK-PS) lo a krese bai 13 asiento, miéntras ku oposishon (PAR-FOL-PNP) a kai na 8 asiento.

****

MAN i PNP (ousente den e konfrontashonnan den kuadro di rivalidat polítiko brutal) lo a mantené nan mes, miéntras FOL (ku a bai pidi kabes di boto), PAR i PS (ku tabata mas enbolbí den e konfrontashonnan den kuadro di rivalidat polítiko) ta entregá 1 asiento, miéntras MFK (kual su lider polítiko a asumí un posishon di keda den sombra dje konfrontashonnan) a piki 3 asiento.

****

Mi ta konstatá ku MFK pa lokual ta e apresiashon tékniko a presentá alternativanan kuestionabel pa solushon di inkomodidat di vários grupo elektoral ku den nan bista aparentemente tabata plousibel. En realidat otronan ku eksepshon di PAIS di Alex Rosaria MBA, tabatin masha poko pretenshon di solushon. E diferensia i na mesun momentu e vulnaribilidat di MFK ta sinta segun mi den e volatibilidat di e grupo elektoral ku nan ta lèn riba dje.

****

Ku un bon aserkamentu stratégiko, tantu PAIS, komo PNP i PAR por kome for di e bolo di votadónan barbulètè ku MFK tin dominio riba dje. Den un periodo kaminda no tabatin kampaña elektoral i ku fecha di elekshon no ta na bista, apénas un 30% di preferensia polítiko ekspresá ta keda para. Mi ta kere tambe ku e base elektoral di PAR, MAN, PS i PNP  lo ta banda di 6 pa PAR, 2 pa MAN, 3 pa PS i 1 pa PNP. Mi ta kere tambe ku MFK su base ta hopi mas abou ku e 8 asientonan di novèmber 2011. MFK ta mas den 4 asiento. Lokual MFK tin ta e “appeal” enorme di dr. Gerrit Schotte hc riba e grupo di votadónan ku mi a kalifiká komo votadó barbulètè. Sin kompetensia den kontienda elektoral riba e aspektonan ku e grupo aki ta kai p’e, MFK ta kome por lo ménos un asiento mas di PAR i bai laba den 9 asiento.

****

Mi ta ripití ku mester diferensiá entre efektividat di gobernashon i e manera ku elektorado (e diverso gruponan elektoral) ta pèrsibí gobernashon durante di ékis periodo. Esensia den apresiashon di efektividat di gobernashon no ta e grado segun kual un grupo di hende ta satisfecho ku lokual Gobièrnu a hasi, pero e grado segun kual e sentido di bienestar en general ta mehorá den forma duradero.

****

Prioridatnan di Gobièrnu mester tin konotashon ku foko di e problemanan real di komunidat. E akshonamentu den gobernashon pa basta tempu kaba (pues no bou di e koalishon aktual so) ta muchu indusí pa un grupitu ku ta biba den nan propio mundu. Sea kual sea kual koalishon wòrdu formá, ta keda un núkleo di hende, rondó di kual tin sierto nètwèrk ta drai, ku ta influensiá tomo di desishon gubernamental den un forma signifikante.

****

Entre nan tin ku ta wòrdu mov’é únikamente pa nan mes sensashon di realidat (“eigen belevenis van de waarheid”) ku pa definishon ta leu for di esun dje masa. Nan prioridatnan i esun di e sirkuito den kual nan ta move i ta deseá di pèrtenesé na dje, no ta kuadra ku esnan dje masa. E gobernashon pa elekshon (krea i mantené e pèrsèpshon di ta hasi kos bon) riba tèrmino largu ta resultá den desgrasia pa largu tempu.

****

Naturalmente tin di tene kuenta ku e aspektonan polítiko, pero esei ta “des partij” i e respektivo frakshonnan den e kuerponan representativo. Ehekutivonan tin di aktua konforme di e realidat gubernamental (“bestuurlijke realiteit”). Nan mester ta “on top” di kualke desaroyo ku probabel implikashon pa situashon di pais.

****

Nos práktika polítiko ta keda unu di wak kosnan komo kuestion di kòrta kabes òf tene man riba kabes di hende. Nos ta di lòk den klasifikashon di pro òf kontra. Por lo pronto no ta vislumbrá en kambio ku ta resultá den inovashon di idea, vishon i aserkamentu stratégiko ku tin di kondusí na otro fórmula di disidí i ehekutá kos. Ta imposibel pa yega na kambionan fundamental ku e mesun filosofia ku tin nos den situashon di parálisis. E mesun mentenan di influensia lo no por produsí e plannan ku mester mehorá kondishon di bida general di pais den forma duradero.

****

Ku e manera aktual di hiba polítika komunidat ta wòrdu perhudiká den vários forma. Ku tenementu di man riba kabes di hende i korementu pa desishon ku por tin implikashon pa relashon denter di partido òf koalishon, pais ta bai di malu pa peor, miéntras ku rekurso humano, dor di e aserkamentu robes, enbes di mehorá ta bai di bon pa mediokre pa malu.

****

Si resultado elektoral lo ta manera e enkuesta di november 2011 a proyektá, nada pero nèt nada lo no sosodé pa kue direkshon di mehoramentu duradero di e nivel general di bida na Kòrsou.

****

Skina di Sòrti ta ripití ku nos meta ta di fomentá un desaroyo di pensamentu krítiko den komunidat i komo tal nos no ta pro ni kontra persona, pero ta sostené òf rechasá desaroyo, posishon i desishon. Te mañan ku poder di Dios. Kòrda ku bo kontribushon dirigí na This e-mail address is being protected from spambots. You need JavaScript enabled to view it ta bonbiní.