Ta kuminsá ku deseá tur hende un bon dia. Polítikamente, e kambio den postura (pa basta tempu pasividat ante Gabinete Schotte-I, pa unu di profilamentu riba asuntunan di gobernashon) di lider polítiko di MFK, Helmin Wiels, ta komprendibel. E sondeo polítiko ku a keda efektuá na novèmber di 2011, a indiká ku MFK, e partido ku tin signatura, ta komiendo voto di PS. Pues opviamente PS lo no por keda asumí e postura di defendé Gabinete Schotte-I sin mas.

Ta kuminsá ku deseá un i tur un bon dia. Laga mi kuminsá ku un nota di aprobashon. E ta bai pa lider polítiko di FOL, Anthony Godett, ku a hala orea di su koleganan riba e echo ku komunidat no ta sirbi ku e tendensia di agènda kosnan di hende enbes di asuntu. Tambe su remarke riba e kuestion ku minister di Finansa, George Jamaloodin, ta pidi un reunion di Parlamento pa atendé ku lèkmentu di su (i di su kolega el Hakim) datos di impuesto, no ta na su lugá.

****

Minister di Finansa, George Jamaloodin, sea ta hala un banda i laga un hende sinta ku no ta den e situashon di konflikto di interes atendé ku e situashon den un departamentu ku ta kai bou di su responsabilidat, òf e ta akseptá e riesgo di su situashon di konflikto di interes i ta atendé ku e ámtenar en kuestion. E Lei ku ta regla posishon hurídiko di empleado públiko ta dikta kual ta e prosedura ku e mester kana.

ta deseá tur hende un bon siman. Un minister ku ta provoká konmoshon sosial (“in opspraak zijn”) por lo general ta saka su konklushon. Ta un desishon pa di un banda kuida integridat di gobernashon (su asuntunan no ta tira nan sombra riba henter Gobièrnu) i di otro banda dun’é e espasio nesesario pa atendé ku su asuntunan personal (un funshon públiko pa definishon ta pone restrikshon na e espasio pa atendé asuntunan personal).

****

Naturalmente un aktor polítiko (ku sosten di su aliadonan) por hasi komo si fuera no tin problema p’e òf Gobièrnu. E por asumí e postura di despota ku tin poder apsoluto i por imponé su pèrsèpshon di moralidat (pa e mayoria mas bien falta di moralidat) riba e komunidat (un akto ku ta un violashon serio di e filosofia di gobernashon demokrátiko di ´gobernashon pa e pueblo dor di e pueblo´). Básikamente e postura ku koalishon MAN-MFK-PS ta demonstrando te ainda.

Ta kuminsá ku deseá tur hende un bon dia. Minister enkargá ku Asuntunan di Reino, drs. Liesbeth Spies, a duna di konosé ku e ta karga speransa/konfia ku Gabinete Schotte-I ta kumpli ku palabrashonnan hasí riba entre otro e problemátika di polushon di Isla. Komo ku mi no ta mira nada riba kual e speransa/konfiansa ta basá mi ta asumí ku e ekspreshonnan di minister drs. Liesbeth Spies, tin mas di haber ku strategia (mira riba un ophetivo ku ta den futuro) ku e tin di haber ku e realidat (“feitelijke vaststelling van een vertrouwensrelatie”).

Ta kuminsá ku deseá tur hende un bon dia. Minister di Finansa, George Jamaloodin di MFK, den su reakshon riba ponensia/pregunta di Parlamentario di PAR, Zita Jesus Leito MBA, ke krea e pèrsèpshon ku e Parlamentario di PAR, no ta komprondé Finansa Públiko. E ekspreshon polítiko aki di minister George Jamaloodin, ta bisa mas di e propio George Jamaloodin ku e ta bisa algu di e konosementu di materia di Zita Jesus Leito MBA.

****

E Parlamentario di PAR, Zita Jesus Leito MBA, tin sertifikado di formashon avansá, tin kuríkulo (sektor privá, i públiko) i eksperensia komo Diputado i komo Parlamentario. Minister George Jamaloodin apénas tin 16 luna den e puesto, no tin sertifikado di formashon i su kuríkulo empresarial tin e minister den posishon di defensa. Mi a trata di ta konkreto sin ta “onnodig kwetsend”.

****

E táktika polítiko di spanta balente pa sali for di un perkansia polítiko, no ta algu ku minister George Jamaloodin mester a rekurí na dje, i sigur no na un manera ku ta habri porta hanchu habrí pa eksponé su propio vulnerabilidat (ku ta falta grave di konosementu di materia). Ora ku bo tin falta di konosementu i abilidat den materia, bo mester keda al kaso i na su sierto momentu te hasta mester tene e lepnan riba otro.

****

Ta kuminsá ku deseá tur hende un bon dia. Kualke organisashon mester programá momentu di evaluashon profundo di su funshonamentu i mas ku tur kos e viabilidat di su kousa sosial (su derechi di eksistensia). Ta a base di un determinado kousa sosial, hende ta agrupá i formalisá nan aliansa den un organisashon. Organisashonnan polítiko ta wòrdu suponé di ta diferensiá for di otro den e manera (ideologia) i aksento (filosofia) ku nan ta opta p’e. Pero tur mester ta trata di elevá nivel di bida den forma duradero.

Ta kuminsá ku deseá tur hende un bon dia. Atministrá, organisá, kontrolá i kordiná aktividatnan den kualke sekshon di interakshon humano ta forma parti di e lokual ta ser denominá komo maneho. E partinan mas difísil di e funshon di maneho ta den planifikashon. Bo tin di visualisá e totalidat (kiko ta e wega, unda e ta tuma lugá, kende ta e partisipantenan i kual faktornan ta influensiá e wega), konosé bo rekursonan, disidí riba bo ophetivonan (mester tene kontinuidat na konsiderashon) i trasa un plan pa alkansá e ophetivonan.

****

Maneho no ta algu fásil. Vários na kaminda ta pèrdè e kousa sosial (motibu pa kual ta partisipá na e sekshon di interakshon humano) i e totalidat (“overview”) for di bista. Ku esei nan ta falta un parti importante di e lokual ta nesesario pa interpretá e realidat di momentu (ku ta nada mas ku un “moment opname” den un pelíkula perpetuo). Ta p’esei bo mester ta metódiko. Keda hasi bo ouditorianan (di e organisashon, di bo kontrinkantenan i di bo mes komo persona) pa saka siñansa.

****

Ta kuminsá ku deseá tur hende un bon dia. Asuntunan genuino di gobernashon, no ta ser resolvé ku triki i maña (“list en bedrog”). Gobernashon ku un grado promedio haltu di efektividat, ta ser alkansá ku aserkamentu metódiko. Uso konsistente di maña i triki (“list en bedrog”) komo táktika, ta muestra di un elemento di struktura duru (no tin masha probabilidat ku esaki por kambia) di personalidat di un aktor.

****

Un aktor di bon intenshon (“van goede wil”), por hañ’é den un situashon di perkansia, for di kual e no ta mira otro solushon, ku no ta uso di un triki. Uso insidental òf diripiente (kontrali na uso konsistente) di un táktika, ku mester keda denominá komo deshonesto, por lo general ta bisa algu di e situashon den kual un determinado aktor a hañ’é den dje. Den kurso di e 16 lunanan ku e koalishon MAN-MFK-PS ta forma e elenko di poder, maña, triki, manipulashon i imponementu tabata mas regla ku eksepshon.