joomla templates La Prensa

WILLEMSTAD: Korsou tin un gobièrnu ku tin hopi ambishon, ku ke logra kos pa pueblo. Esei ta loke mi a konstatá, minister Liesbeth Spies, enkargá ku Relashon den Reino a deklará ayera, despues di su promé dia di bishita na Kòrsou. Minister Liesbeth Spies a kuminsá su bishita na Korsou ayera djabièrnè, despues di a bishita Aruba un dia promé. E bishita ta dura 8 dia i lo kubri Korsou, Aruba, St. Maarten i e islanan BES. Spies lo bishitá e islanan pa promé biaha. For di despues ku el a keda instalá komo minister, Spies a duna di konosé ku e tin masha gana di sera konosí ku e islanan aki, ku e no a bishita nunka promé. Ayera el a indiká di ta kontentu ku el a hasi esei. E minister a papia ku minister di Finansa Jorge Jaaloodin, ku minister di Hustisia Elmer Wilsoe i ku promé minister Gerrit Schotte. E bishita ademas ta pone ku mi por hasi mi trabou mihó i ta e resultado di e trabou ta konta, el a remarká.

WILLEMSTAD: Asina ku gobièrnu ta kla, Transparency International (TI) lo hasi e investigashon riba integridat di gobernashon, manera gobièrnu di Kòrsou a anunsiá. Esei ta loke promé minister Gerrit Schotte a sigurá atrobe durante  e enkuentro ku prensa ayera, relashoná ku e bishita di minister di Relashon den Reino, Liesbeth Spies. E asuntu aki tabata tema di hopi diskushon último lunanan i ketu bai no ta for di mesa. Partikularmente e partido di oposishon PAR a kuestioná e asuntu aki na diferente okashon. Transparency International a haña enkargo di gobièrnu di Kòrsou aña pasá i e ta preparando ki dia e ta kuminsá, despues di a hasi e preparashonnan nesesario. Esei ta loke promé minister Gerrit Schotte a kontestá riba preguntanan di parlamentario Zita Jesus-Leito. For di despues ku gobièrnu a anunsiá e investigashon di e organisashon internashonal aki, a surgi spekulashon te kon leu gobièrnu ta serio den su plannan. A sali publikashon den sentido ku e anunsio a ser hasí, pero ku gobièrnu no a duna e enkargo mes.

WILLEMSTAD – Lider polítiko di partido Frente Obrero Anthony Godett ta keda di opinion ku no tin argumento pa no legalisá mariwana. Su pensamentunan ta ku mester hasi algu konsiderando ku den dos aña e kantidat di mariwana konfiská dor di polis a bira shete biaha mas tantu. ‘Mi tin sigur ku tin muchu mas na Kòrsou ku outoridatnan no a detektá ainda mester tuma akshon pa e no sigui sali fe man’, asina Godett a mustra. El a sigui bisa ku sientifikamente a resultá ku tin 8 benefisio pa legalisá mariwana. P.e. ku ora legalisá uso di mariwana gobièrnu por  kobra akseins meskos ku riba gasolin i riba sigaria. Dor di legalisá mariwana bo ta baha kriminalidat. E ta bon pa negoshi di horeka; pa agrikultura i komo alternativa pa energia pa outo i ta tur e aspektonan aki ta puntonan ku mester diskutí’, segun e miembro di Parlamento di Kòrsou.

WILLEMSTAD - Kòrsou ke evaluá si ta bal la pena sigui partisipá i sigui invertí den e proyekto Unica na Sürnam. No por t’asina tampoko ku UTS ta sigui hinka miónes den e kompania aki, sin perspektiva kiko ta bai pasa, minister Charles Cooper a anunsiá. Ta esei tambe ta meta di e bishita di e delegashon chikitu ku ta sali djaweps awó pa e pais di Desi Bouterse. LA PRENSA a informá kaba ku Gobièrnu di Kòrsou, representá pa minister di Telekomunikashon Charles Cooper, lo hasi un bishita na Sürnam pa bishitá e kompania di telekomunikashon Unica. Parlamento a bai di akuerdo djabièrnè anochi pa un delegashon di Parlamento, konsistiendo di un representante di kada frakshon kompañá e diputado na e okashon aki. E bishita mes ta di 26 pa 30 di  yanüari 2012. Kòrsou ta partisipando finansieramente den e proyekto aki. E proyekto no a resultá eksitoso manera a spera. Den pasado tabatin hopi diskushon riba e partisipashon aki, si e tabata un bon desishon òf no. Hustamente esei e delegashon ke haña un bista kiko ta pasando. Kòrsou a invertí miónes, tòg kos no ta bayendo manera a spera.

WILLEMSTAD - Tin un sosten amplio den Eerste i Tweede Kamer pa mas uniformidat den preisnan di pasashi den Reino. Tur e partidonan ke haña klaridat serka Gobièrnu ulandes relashoná ku e preisnan di ticket, spesialmente e tarifanan haltu pa biaha entre e islanan ariba. E partidonan GroenLinks, VVD, CDA, PvdA, D66 i Christen Unie, a hasi un seri di pregunta djarason na ministernan Maxime Verhagen, Liesbeth Spies (Asuntunan Interno i Relashonnan di Reino i tambe na sekretario di Estado di Finansa, Frans Weekers. Partido PVV no a partisipá den e ehersisio aki. E partidonan a pidi Gobièrnu ulandes pa duna indikashon dje promedio di preis di pasashi entre Karibe Ulandes i Ulanda i tambe pa splika e diferensia di preis entre Ulanda i Aruba, Boneiru, Kòrsou i St. Maarten, miéntras ku e distansianan pa e destinashonnan ta práktikamente igual. E miembronan di Parlamento a pidi Gabinete pa papia ku e kompanianan di aviashon, inkluso KLM, enkuanto e diferensianan di preis.

WILLEMSTAD – E lei nobo di impuesto tabata ún dje temanan ku promé minister Schotte i minister Liesbeth Spies a papia riba dje na Hulanda. Promé Minister Gerrit Schotte a hasi un bishita di kortesia djaweps atardi serka e minister nobo di Asuntunan Interno i Relashonnan den Reino, Liesbeth Spies. E reunion a tuma lugá den kuadro di e bishita di trabou ku Promé Minister Schotte ta hasi aktualmente na Hulanda i Brussel. Durante e reunion a atendé tópikonan manera e lei nobo di impuesto ku lo bai tin efektonan notablemente positivo pa ekonomia di Kòrsou i ku ya kaba por mira resultado di esaki riba sierto áreanan. Gerrit Schotte a para un ratu ketu tambe na e maneho nobo di energia kaminda produktonan bèrdè por wòrdu importá kontra un tarifa di 0% di derecho di duana. El a duna komo ehèmpel èrko i frishidèrnan ku ta traha ku e sistema "inverter" i asta panel solar i outonan elektróniko.

WILLEMSTAD - Parlamento di Kòrsou ta kondená maluso di e tarheta di krédito ku Gobièrnu ta duna na presidentenan di Parlamento. Esaki básikamente ta e kontenido di un moshon ku partidonan di koalishon a aseptá ayera tardi na final di e reunion pa diskutí e rapòrt riba e tema aki. T’asina ku Parlamento a pidi SOAB pa investigá kon e uso di tarheta di krédito tabata pa e respektivo presidentenan di Parlamento di Antia entre 2002 pa 2010. A kuminsá debate riba e asuntu di uso di credit card fo’i febrüari aña pasá, pero a posponé e reunion pendiente e investigashon di SOAB. Ayera, kasi un aña despues, e reunion a sigui. Esaki ta enserá kon respektivamente e eks presidentenan Dudley Lucia, Dwigno Puriel, Rignaal Fransisca i Pedro Atacho a hasi uso di e tarheta di krédito ku tabata na nan disposishon. Den e rapòrt, SOAB ta bisa ku e no por a huzga legalidat di e gastunan ku a keda hasí, pero si ta hasi menshon di algun kaso ku a hala atenshon.

WILLEMSTAD - Minister di Finansa George Jamaloodin a sugerí Parlamento pa laga hasi un investigashon mas profundo di uso di e tarheta di krédito pa presidentenan di Parlamento di Antia. Jamaloodin a bisa esaki ayera, durante tratamentu di e rapòrt di SOAB riba uso di tarheta di krédito di Gobièrnu di parti di 4 eks presidente di  Parlamento di Antia den e periodo 2002 pa 2010. E rapòrt a keda kla resientemente i a trat’é ayera den un reunion di Parlamento. Manera LA PRENSA ta relatá den un otro artíkulo, Parlamento a desaprobá e manera ku a usa e karchi aki den pasado hasiendo vários kos ku p’e, ta kuestionabel. Un di e kosnan aki ta un gastu di 8406.79 dollar ku a tuma lugá na novèmber 2004 pa kua no por a haña e resibunan niun kaminda. Tabatin asuntu di hür flus pa asistí na un evento importante, pagamentu di kuenta di telefòn, kumpramentu di paña na diferente pakus i algun kaso mas. Den su rapòrt, SOAB a rekomendá un guia mas skèrpi pa presidentenan di Parlamento pa uso credit card den futuro.