WILLEMSTAD - Kòrsou ke evaluá si ta bal la pena sigui partisipá i sigui invertí den e proyekto Unica na Sürnam. No por t’asina tampoko ku UTS ta sigui hinka miónes den e kompania aki, sin perspektiva kiko ta bai pasa, minister Charles Cooper a anunsiá. Ta esei tambe ta meta di e bishita di e delegashon chikitu ku ta sali djaweps awó pa e pais di Desi Bouterse. LA PRENSA a informá kaba ku Gobièrnu di Kòrsou, representá pa minister di Telekomunikashon Charles Cooper, lo hasi un bishita na Sürnam pa bishitá e kompania di telekomunikashon Unica. Parlamento a bai di akuerdo djabièrnè anochi pa un delegashon di Parlamento, konsistiendo di un representante di kada frakshon kompañá e diputado na e okashon aki. E bishita mes ta di 26 pa 30 di yanüari 2012. Kòrsou ta partisipando finansieramente den e proyekto aki. E proyekto no a resultá eksitoso manera a spera. Den pasado tabatin hopi diskushon riba e partisipashon aki, si e tabata un bon desishon òf no. Hustamente esei e delegashon ke haña un bista kiko ta pasando. Kòrsou a invertí miónes, tòg kos no ta bayendo manera a spera.
“Nos ta bai evaluá, papia ku e kompania, pa weta si ta bal la pena sigui”, el a bisa. Preguntanan manera kon grandi e merkado ta ku Unica ta kubri, kuantu chèns tin ku e situashon aktual por kambia bira positivo i si tin pèrspektiva pa ganashi den futuro lo subi mesa, e minister a remarká. E delegashon di Parlamento ta konsistí di Humphrey Davelaar di frakshon di PNP, Anthony Godett di frakshon di FOL, Rudney Garmers di MFK i Melvin Cijntje di PS bai Sürnam, miéntras ku Griffier Sylvin Cijntje tambe lo ta den e delegashon. Minister Charles Cooper lo enkabesá e delegashon. Frakshon di partido PAR lo no forma parti di e delegashon aki. Dennis Jackson a partisipá na e okashon ei di no ta weta e importansia pa un delegashon di Parlamento asistí i no ta mira e balor agregá di esaki. Segun minister Cooper, riba su mes e ta konsiderá un desaroyo sano ku UTS ta ekspandé su merkado. Ta úniko manera ku e por sigui krese i hasi e bolo mas grandi, segun Cooper. El a mustra ku ta un desaroyo mundial ku tur empresa ku bista riba futuro ta konsiderá. “Hasi negoshi no ta malu, pero bo mester mira e benefisionan si. No por t’asina ku bo ta sigui hinka plaka den un empresa sin speransa ku un dia bo ta saka bo sèn”, el a agregá.
