WILLEMSTAD – E lei nobo di impuesto tabata ún dje temanan ku promé minister Schotte i minister Liesbeth Spies a papia riba dje na Hulanda. Promé Minister Gerrit Schotte a hasi un bishita di kortesia djaweps atardi serka e minister nobo di Asuntunan Interno i Relashonnan den Reino, Liesbeth Spies. E reunion a tuma lugá den kuadro di e bishita di trabou ku Promé Minister Schotte ta hasi aktualmente na Hulanda i Brussel. Durante e reunion a atendé tópikonan manera e lei nobo di impuesto ku lo bai tin efektonan notablemente positivo pa ekonomia di Kòrsou i ku ya kaba por mira resultado di esaki riba sierto áreanan. Gerrit Schotte a para un ratu ketu tambe na e maneho nobo di energia kaminda produktonan bèrdè por wòrdu importá kontra un tarifa di 0% di derecho di duana. El a duna komo ehèmpel èrko i frishidèrnan ku ta traha ku e sistema "inverter" i asta panel solar i outonan elektróniko.

Tambe e tópiko Plan Nashonal pa Desaroyá Bario a bin dilanti. Promé Minister Schotte a duna un splikashon profundo riba e programa di Plan di Bario i a splika a base di diferente ehèmpel kon kada un ministerio ta enbolbí i ta forma parti di e programa. Pa loke ta trata esaki, Minister Spies a mustra hopi interes den e programa Plan Nashonal pa Desaroyá Bario. Promé Minister Schotte i Minister Spies a papia tambe riba e tópiko di ISLA. Minister Spies tabata interesá den e "toekomstvisie" pa ku e refineria. Promé Minister a duna di konosé ku denter di poko Kòrsou lo firma un Memorandum of Understanding ku Venezuela pa asina deliberá riba kambionan ku mester bai tuma lugá na ISLA. Un di e kambionan mas importante ta uso di fuel mas limpi i duradero pa entre otro e sentral di BOO. Tantu Minister Spies komo Promé Minister Schotte ta ferwagt un kolaborashon sano ku otro. Minister Spies lo hasi un bishita na entre otro Kòrsou den e di dos siman di febrüari 2012. Aki lo sigui kombersá riba tópikonan ku ta aktual.