WILLEMSTAD - Tin un sosten amplio den Eerste i Tweede Kamer pa mas uniformidat den preisnan di pasashi den Reino. Tur e partidonan ke haña klaridat serka Gobièrnu ulandes relashoná ku e preisnan di ticket, spesialmente e tarifanan haltu pa biaha entre e islanan ariba. E partidonan GroenLinks, VVD, CDA, PvdA, D66 i Christen Unie, a hasi un seri di pregunta djarason na ministernan Maxime Verhagen, Liesbeth Spies (Asuntunan Interno i Relashonnan di Reino i tambe na sekretario di Estado di Finansa, Frans Weekers. Partido PVV no a partisipá den e ehersisio aki. E partidonan a pidi Gobièrnu ulandes pa duna indikashon dje promedio di preis di pasashi entre Karibe Ulandes i Ulanda i tambe pa splika e diferensia di preis entre Ulanda i Aruba, Boneiru, Kòrsou i St. Maarten, miéntras ku e distansianan pa e destinashonnan ta práktikamente igual. E miembronan di Parlamento a pidi Gabinete pa papia ku e kompanianan di aviashon, inkluso KLM, enkuanto e diferensianan di preis.

E parlamentarionan a pidi pa un resúmen dje vários impuestonan di aeropuerto ku ta kobra den Reino, kompará ku e tarifanan promé ku a restrukturá Antia. Segun e parlamentarionan, buelonan for di Aruba, Kòrsou i St. Maarten pa Boneiru, St. Eustatius i Saba, i visevèrsa, mester ta konsiderá komo nashonal i no internashonal. Esaki mester enserá ku no mester paga impuesto di aeropuerto. Nan a pidi Gobièrnu ulandes pa informá si e ta di akuerdo ku nan punto di bista. E parlamentarionan ku a firma e lista di pregunta ku ta un inisiativa di Van Gent, ta André Bosman (VVD), Bas Jan van Bochove (CDA), Ronald van Raak (SP), Sophie van Bijsterveld (CDA), Frank van Kappen (VVD), Jeroen Recourt (PvdA), Cynthia Ortega-Martijn (CU), Wassila Hachchi (D66) i Marijke Linthorst (PvdA). Van Gent ta miembro di e grupo di pasahero ku a instalá siman pasá durante dje reunion Interparlamentario di Reino ku a tuma lugá na Sint Maarten. E grupo di trabou ta boga pa Gobièrnu dje islanan introdusí un airport tax uniforme.