WILLEMSTAD - Ayera alrededor di  15.00’or, Polis a hasi entrada hudisial na un adrès na Klein Sta. Martha (hanchi buriku) buskando (3) sospechoso. E sospechosonan aki ta sospechá di ladronisia ku violensia, kiebro den kas, maltrato i ladronisia di kabritu ku a wòrdu kometé for di luna di novèmber 2011 te ku yanüari 2012. Na yegada di e unidat polisial na e adrès ariba menshoná nan a bin haña riba e tereno tres (3)  bibienda. E agentenan a mira un di e sospechosonan i ora ku e hòmber aki a mira e patruya polisial el a sali kore hui bai for di e sitio drenta un mondi den serkania. Polis a start un pèrsiguishon na pia tras di e hòmber aki, pero no a logra deten’é. Den e mondi e unidat polisial a bin dal den un plantashon sustansial di mariwana den hèmbernan  blanku di rabu i kaha di limonada di plèstik di 2 lt. A konfiská tur e matanan aki di mariwana pa mas investigashon. Na mes momentu polis a bai na kontrolá den e kasnan. Durante di e investigashon den e kasnan no a haña nada relashoná ku e investigashon. E investigashon den e kaso aki ta kontinuá.