joomla templates La Prensa

Ku masha fasinashon mi a sigui e proyekto di e komishon na Ulanda ku a saka djasabra último e 7 Pèrlanan  di Karibe den 7 kategoria. Un proyekto kaminda a trata na mustra na Ulanda kuantu hóben di Karibe ulandes tin ku ta sobresalí den diferente kategoria i asina ei kontrabalansá e imágen negativo ku Karibe ulandes tin na Ulanda debí ku un grupo di nos muchanan ta komportando nan mes fe sla i kriminal.

Ami ta ninga di kere ku ta mayoria di nos muchanan na Ulanda ta fe sla i riba mal kaminda. E hóbennan selektá komo pèrlanan di Karibe ta nan mester ta e norma i aworakí ta hasi manera nan ta eksepshon. E hóbennan aki kada un di nan a representá masha hopi otro hóben ku e aña aki no a keda menshoná i kendenan tambe ta nos sakadónan di kara na Ulanda. So, no ta mira nan manera ta mira esnan ku ta komportá malu.

Awendia mas ku nunka bo mester sa di e hende ku bo drenta un relashon amoroso kuné  kiko ta su koló, perfume, pelíkula i fruta preferí i kiko ta su preferensianan seksual. Pa bo no hañabu ku sorpresa i bèrgwensa den komunidat, pasobra bo kasá òf partner a mishi ku otro hende muhé adulto òf ku mucha, hustisia ta kulp’é i sentensi’é, pasobra el a hasi kos kondenabel i ku chèns ku ta kulpa abo di tabata sa òf di tabata partísipe.

Abo sa si e hende ku bo ke subi kama drumi banda di dje tin fantasianan seksual no tolerá den komunidat, si e ta biseksual i si boso tin yu si e ta gusta laga kontakto seksual ku mucha satisfasé su deseonan seksual? Purba na sa kiko tabata su promé eksperensianan seksual. Tabata ku un amigu/a, su pareu di skol òf tabata un eksperensia fòrsá no deseá na man di un adulto ku e tabata dependé di dje.

E remarke tabata unu ku a lagami keda pensa. E tabata konta kon nan a pidi un hende masha masha konosí den komunidat pa para madrina pa nan yu ku tabata bai risibí. E hende a aseptá, maske nan no konosé otro kasi mes. Ta un biaha nan a yega di topa na kas di un konosí. Pero e shon a kai asina na grasia, te ku awor ku nan ke men ku nan sa personalmente kon e ta, ku a disidí na pidi e pa para madrina.

Tur kos a bai bon te ora a mira ki regalo madrina a duna. Un pia di shen. Fout, pasobra esei no ta sufisiente. Madrina mester a duna mas! Kuantu mas mi no por a sali afó.

Loke a pasa aki mi a opservá ta desapunto basá riba ekspektativa ku no tabata komuniká, segun ami.

Komo hende ku tin 5 ihá, loke mi ta kontentu kuné sigur despues ku mi a skucha e opservashon aki, ta parse ku tin hende ta buska hende pa para madrina i padrinu sin ku nan ta bisa e hende kiko nan ta spera di dje.

Si ta un pia di shen e hende ku abo a pidi sin bis’é kiko ta bo ekspektativa di dje, por a duna, ta kua ta e problema?

E ta un fenómeno internashonal si bo sigui programanan merikano dediká lunanan largu na e tópiko ei. Mayornan ku ke pa nan yu muhé partisipá den tur sorto di elekshon di beyesa for di promé dia ku nan ta na bida ku e meta pa haña korona i prosperidat.

Aki na Kòrsou no tin tantu e asuntu di elekshon di beyesa, pero mas bien di modelo.

Mi no sa kuantu tata ta envolví, pero ta remarkabel kuantu mama ta kana na Kòrsou tur agensia i lugá ku bisa ku nan por hasibu modelo.

E kos ku mas ta hala atenshon, ku hopi biaha e muchanan muhé mes no ta duna indikashon di ta interesá, ni ku nan lo ke ta asina den spòtlait. I segun mi a komprondé ta e mamanan despues ta kana ku e pòtrètnan mustra tur ku ke wak, pa wak kon sèksi i eksótiko nan yu ta.

Dia di Famia a pasa ku tur atenshon riba balor di famia. Kon importante famia ta komo núkleo di nos komunidat. Kon a bai ku bo famia?

Un persona den un bario na Kòrsou, ku no ta marginá, a eksperensiá parti di su Dia di Famia segun ku el a kontami:

Den e kas na su man robes e hòmber den e famia a buska un guera formal ku e señora den presensia di nan dos yunan ku ta bou di 10 aña. Despues di basta bululú sin tin kunes ku bisiña, e hòmber a sali demostrativamente bai den su vehíkulo impreshonante.

E kas su tras ku ta konsistí di un famia di mama, tata i un yu bou di 5 aña, e hòmber tabata blo manda e señora pa e sera su boka, pero den bon idioma krioyo.

Mi a tende nan bisa vários biaha kon so nan ta. I no tabata mi intenshon di bai hasi niun tèst pa wak si ta bèrdat e hendenan ku ta ekspresá esei ke un solushon.

Pero tabatin un okashon resientemente i mi a yama tres di e hendenan ei riba mesun dia pa invitá pa ban hasi tal i tal kos.

E promé a reakshoná bisando mi, si mi no sa ku no ta tur hende ta manera ami di por sali ku kabei kon ku ta i ku e pa e okashon ku mi ta invit’é sikiera mester bai hasi su kabei. Nò pues.

E di dos a lanta sospecho serka mi ku e ta traha na kualke organisashon di agensia di sekresia pa su deskonfiansa ku el a ekspresá. E tabatin asina tantu pregunta deskonfiá dikon mi ta invit’é i despues di a tende ta ken mas lo t’ei a kuestioná dikon e hendenan ei i asina ku mi tabata hopi kontentu ora ku e mes na final a bisami mihó nò; e no por bai.