Lorito ta yama tur hende un felis djabièrnè. Awe tabata realmente un dia di kore kore, bula bula. Lorito a keda den awa, despues den seku, despues den awa atrobe. Lorito a pensa mihó awa kai awor aki ku ora tin Karnaval. Gruponan mester prepará sinembargo pa tur eventualidat.

****

Lorito a tuma nota ku den e reunion di ayera partidonan a aseptá un moshon pa pone skouder bou di un hòspital nobo. Hopi bunita mira tur e firmanan bou di e moshon loke a duna un indikashon kla ku ta posibel pa uni pa un bon kousa. Asina mester ta: polítika no ta e arte solamente di basha otro abou (pa haña voto), pero tambe e arte pa yega na kompromisonan uní na bienestar di pueblo.

Lorito ta yama tur hende un felis djaweps. Den mondi yen di hende tin doló den lomba i stoma ku ta kima. Algun di nan ta tosa tambe. Aparentemente tin di aber ku nos temporada. Ademas tin yen di para a muha i awor nan tin ferkout!

****

Esta un labatiba! Nèt e aña ku tur dos Tumba di Karnaval a papia di armonia i union, nos ta den un badabada kompletu riba transmishon di Karnaval. Ta mihó Amos a warda e Tumba pa otro aña! Di tur manera mester buska un solushon pa e situashon ku a presentá. Lorito mes no ta masha interesá den transmishon òf no, pasobra ta bula nos ta pasa bula i tira un bista. Pero nos sa di míles ku sí ta interesá! Pa nan si mester tin klaridat.

Lorito ta yama tur hende un felis djarason. Kon a bai ku Dia di San Valentino? Lorito a tende un bon opinion: tur dia mester ta Dia di Amor! T’asina mes! Den mondi nan a sugerí pa kambia e fecha pa fin di febrüari pa asina komèrsio gana mas sèn. Nos mester a hari ora nos a tende e sugerensia aki!

****

Lorito a tuma nota di un kos masha preokupante. Den final di Festival di Tumba Hubenil: mucha muhé so den finalista. Grupo di abogado a hura: tur ta hende muhé. Den djump-up di Lions: hende muhé pa no kaba. Ta kiko ta pasando ku hòmbernan anto. Kasi sigur den Gruponan di Karnaval mayoria hende ku a keda ta hende muhé! Mester buska un manera purá den e situashonnan aki!

Lorito ta yama tur hende un felis djamars. Awe ta Dia di San Valentino. Den mondi nos no ta kere den e tipo di dianan aki, pasobra den mondi tur dia ta Dia di Amor. Nos a sondea algun animal den mondi ku a bisa ku a inventá e dia aki djis pa man bai saku. Mas bien por a yam’é Dia di Pòtmòni! Di tur manera pa esnan den mundu di hende ku ta kere den e dianan aki, nos ta deseá nan hopi amor!

****

Un bèrgwensa pa mira ku tres minister a presentá pa un reunion i no tabatin quorum. Por lo general e pensamentu ta ku ta partidonan di koalishon mester firma pa e reunion sigui. Awor e mesun koalishon ku resientemente a baha un punto di e partido mas grandi di oposishon for di riba agènda, no por spera ku lo koperá e biaha aki pa un punto di koalishon bai riba agènda. E kos a bira asuntu di lei di djente pa djente, wowo pa wowo! Ta asina kier laga demokrasia sobresalí?

Lorito ta yama tur hende un felis djaluna. Asina nos a yega un otro djaluna i awe djaluna dia 13. Laga nos spera ku ta un dia di suerte, anke tin hende ta kere ku 13 ta asosiá ku mala suerte. Nunka nos kabes di para no a komprondé ku kabes di hende tin problema ku e sifra aki! Bon siman!

****

E asuntu ku MFK a pidi un reunion riba su mes minister a lanta yen di spekulashon. Lógikamente mester ta posibel ku un partido ta pidi su mes minister pa bin Staten pa duna un splikashon, pero por lo general esei no ta un kustumber, sigur si konsiderá ku Staten pa añanan largu tabata un “rubber stamp” di Gobièrnu. Aparentemente tras di kortina si tin kos ta kushinando! E minister mes no ta mahando su kabes masha. Den Lions djasabra, e tabata pa su kuenta, loke mester por!

Lorito ta yama tur hende un felis djasabra. Masha hende den ambiente di Karnaval i Jump-Up. E ambiente no a dal Lorito pa nada e aña aki ainda. Por ta den e próksimo dianan!

****

Nos a papia ku un hende grandi den Grupo di Karnaval ku a bisa ku e ánimo ta masha abou pa e aña aki. El a splika ku gruponan ta bou di preshon enorme. E kantidat di grupo a baha konsiderablemente i mester buska un manera, sino kosnan lo sigui bai atras. El a splika tambe ku e preshon finansiero sigur ta hunga un ròl. Mester wak e kos aki masha bon, segun el a bisa.

****

Lorito tin impreshon ku tin biaha ta lubidá e efekto multiplikador di Karnaval pa ekonomia di Kòrsou. Den pasado a yega di hasi un kalkulo, pero lo ta bon pa hasi esei di nobo. Meskos ku ta hasi durante Curaçao North Sea Jazz Festival, por start un proyekto pa hasi mesun kos ku Karnaval. Por ta si nos mira e sifranan, nos lo lanta for di soño i hasi mas invershon den Karnaval. Invershon ku ta paga bèk despues!

****

Lorito ta yama tur hende un felis dia. Awa a bai un poko. Ya kaba kalor a kuminsá drenta mondi atrobe. Shon Yuana a bisa nos ayera ku e no a keda ku otro alternativa sino di sali for di mondi atrobe buska awa pa bebe. Kòrda kore trankil pa no trapa Shon Yuana.

****

Lorito a pasa bula pa wak yegada di presidente di Haiti. A bisa ku ta un bishita ofisial, pero Lorito a haña e impreshon ku ta un bishita di partido. No tabatin inspekshon di guardia militar, Gobernador no tabat’ei, dekano di representashon diplomátiko no tabat’ei, representante di diferente sektor no a haña invitashon i mas remarkabel ta ainda ku no tabatin representashon ni di Pueblo Soberano ni di MAN.

Lorito ta yama tur hende un felis dia. Awe ta djarason i nos ta deseá tur hende tur kos bon. Meimei di siman semper tin su kosnan spesial ku ne! Manera tin hende sa bisa: ta mitar fin di siman!

****

Lorito a tuma nota ku ta masha dia a traha riba remodelashon di e vangrail na altura di NAPA. Nos no sa kiko ta pasando, pero finalmente ayera a bin kla. Ta asina difísil ta pa drecha vangrailnan? Ta e material a kaba na kaminda? Òf ta kiko otro a pasa? Lorito ta hasi e preguntanan aki, pasobra ta masha vangrail tin ku drecha i si ta tuma asina tantu tempu pa drecha nan ta kuantu lo dura finalmente pa kaba ku tur?

****

E situashon ta un prueba si ku nos mester kuida tur kos kant’i kaminda. Kada bes di nobo por mira vangrail doblá, lus di tráfiko tirá abou i alseranan mal kuidá. Esei no ta problema di e gobernante, pero di pueblo mes! P’esei tin biaha ora hende ta reklamá, nan mester wak nan mes promé. Lorito tabata kana tras di un hende ku a tira un kùp abou. Ora nos a wak e hende bon, logá ta un hende ku ta yama radio tur ora pa bisa kon sushi Kòrsou ta! Ke men un hende ta yama radio siendo ku e mes ta bon sushou! El a keda manera esnan ku ta yama bisa ku hubentut di Kòrsou a bai atras i nan yunan mes ta un sèt di porko!

****