joomla templates La Prensa

WILLEMSTAD –  E aña aki tabatin un kantidat rekòrt di uso di saku di sushi durante di marcha di karnaval grandi. Komunidat a risibí e mensahe pa koperá ku Selikor dor di usa saku di sushi i a hasi esaki tambe na kantidat grandi. Wesley Kook, direktor di Selikor a bisa LA PRENSA, ku e uso masal di saku di sushi ta algu ku Selikor ta hopi satisfecho kuné. Un otro aspekto remarkabel ta, ku e karnavalistanan  no a usa hopi bòter di bebida, loke tambe ta algu positivo. Aparte ku e bòternan kibrá por forma peliger, e ta forma un problema tambe pa e mashin di bari ku Selikor ta usa. Na momentu di bari e bòternan, por sosodé ku e ta sali manera un proyektil for dje aparato, loke ku tambe por forma un peliger. Wesley Kook, a menshoná tambe pa LA PRENSA ku tabatin hopi hende kantu di kaminda, pero ku serka nan tambe por a ripará ku nan tabatin na saku di sushi. Dianan promé ku karnaval, Selikor a hasi un apelashon na e hendenan ku ta sinta i para riba e stellage-nan, pa tira sushi den e sakunan, pa fasilitá e trabou di limpiesa. Den mayoria kaso esaki a tuma lugá tambe, Kook a menshoná.

WILLEMSTAD - Trahadónan di BOO ta sumamentu malkontentu ku retiro di direktor di e kompania Curaçao Refinery Utillities (CRU B.V.) Alvin Koolman. CRU  ta e kompania ku ta manehá BOO. Nos mester a papia masha hopi ku nan, pa nan a keda trankil, pendiente un reunion ku nos tin awe ku gerensia di Refineria di Kòrsou, asina Edmond “Chika” Fransisca, presidente di e sindikato STK  a informá. STK  ta e sindikato ku ta representá e trahadónan di e kompania. Manera LA PRENSA a informá den su edishon di djabièrnè último, Koolman a haña su retiro di e kompania den forma sorprendente. Kiko ta e motibu direkto pa e retiro aki no ta masha kla te ainda: aparentemente a surgi un diskrepansha den punto di bista di e gerente i gerensia di Refineria di Kòrsou. Di akuerdo ku presidente di STK Edmond Fransisca, e trahadónan a keda sumamente indigná pa e aktitut ku nan a kalifiká komo arogante ku esun ku a duna nan e informashon. Ademas, e trahadónan ta kondená e hecho ku nan no a haña tende tampoko kiko tabata motibu ku a direktor a haña retiro.

WILLEMSTAD – Públiko a komportá por lo general relativamente bon durante tur e marchanan ku a tuma lugá te awor. Kuerpo di Polis ta satisfecho ounke aki aya semper tin kos ku a pasa ku polis mester a intervení. Nada for di òrdu sigur kompará ku e último añanan. E manera stratégiko ku Kuerpo di Polis, VKC, SKS i Koninklijke Marechaussee  a  posishoná e aña aki sigur a hunga un ròl grandi. LA PRENSA a nota tambe efektivonan desidido, pero einan mes ku un aserkamentu diferente pa konvensé públiko na lugá di e kòntròl severo i rígido i tin biaha brutu di último añanan. Kaminda tabata nesesario a usa forsa, pero uso di forsa  tabata nesesario, pero esei tabata den situashonnan aisla.

Pa loke ta trata e kòntròl di  alkohòl durante di Marcha, a someté shofùrnan na un “fieldtest”. A kontrolá un total di  52 shofùr / shofùr ousiliar.  Tur e shofùrnan a tèst “P” ku ta nifiká  ku nan no a usa alkohòl òf no tabata bou di influensia di alkohòl.  Polis ta sumamente satisfecho ku e resultado aki.

WILLEMSTAD – Un di e kosnan ku hopi hende tabata preokupá p’e pa e diferente marchanan di karnaval di e aña aki, tabata e estado di e edifisionan den Otrobanda, prinsipalmente den Kaya Grandi. E promé impreshon ta, ku nan a wanta e kantidat di hende i zonidu relativamente bon. Lógikamente, manera ekspertonan ta bisa, semper por a surgi debilidatnan den e struktura ku niun hende no ta mira. Di tur manera públiko mes a komportá bon na e áreanan di peliger. E drangheknan di atvertensia ku a pone a keda intakto na diferente parti, segun LA PRENSA por a opservá. Públiko mes a e evitá di para na e sitionan ku ta konosí pa nan debilidat den struktura. Remarkabel tambe ta ku públiko no a mara na edifisionan ku a kaba di haña un bon la di pleister òf edifisionan ku resientemente a haña un man di fèrf. Esei ta nifiká, ku públiko a tuma bon nota di e kantidat di lugá ku por a krea sierto inseguridat.

WILLEMSTAD - Tur ámtenar den servisio di gobièrnu di Kòrsou a haña mitar dia liber awe djamars, en konekshon ku marcha di despedida di karnaval. Ku esaki, minister Hensley Koeiman a kumpli ku un promesa ku el a hasi, di hasi e mitar dia aki ofishalmente mitar dia liber. Esaki ta kumpli ku un nesesidat grandi ku esnan  ku ta partisipá den e marcha di despedida tin. Preparashon pa e marcha final aki ta eksigí tempu i un ámtenar ku kaba 5’or di atardi, difísilmente ta den posishon pa bai kas, kambia paña i akudí na e punto di salida di e marcha na tempu. Ku e mitar dia liber aki, e no tin e problema ei mas.  E partisipashon di gobièrnu ta agregá ku e mitar dia liber aki ta te asina leu ku trabou ta pèrmití. Interesante ta ki posishon sektor privá ta bai tuma, awor ku gobièrnu a tuma e desishon aki. Ta konosí ku e asosashon di komersio i industria di Kòrsou VBC no ta eksaktamente entusiasmá pa duna liber, alegando ku ta mas ora produktivo pa nos ekonomia ta bai pèrdí. Di otro banda ta konosí tambe, ku hopi partisipante den karnaval ta empleá den sektor privá.

WILLEMSTAD - E turista ku disidí bishitá Kòrsou, tin chèns di bai un paso mas leu: e tin chèns di gana un trep pa espasio.  Ofisina di Turismo (CTB) ta rifa pasashi pa espasio entre turistanan. Esei ta loke minister di Desaroyo Ekonómiko Abdul Nasser el Hakim a anunsiá. Ku e akshon aki, Space Expedition Curaçao (SXC) i CTB ta spera promové buelonan espasial i di oumentá e interes pa e buelonan aki for di Kòrsou. Den su promoshon den eksterior, e organisashon ta bisa ku espasio, no ta un tereno eksklusivo mas di sentronan espasial manera NASA i ESA, pero e ta yegando dentro di alkanse di organisashon i hende privá. No solamente e desaroyo aki ta fasilitá turismo di espasio, pero tambe ta sirbi metanan di siensia, investigashon i edukashon. “Mundu ta birando chikitu; humanidat a desaroyá te yega si límite i a bira tempu pa e siguiente paso: kuminsá eksplorá espasio”, e promoshon ta bisa. E ta agregá ku e soño ku humanidat tabatin semper, di mira mundu for di un distansha hopi haltu ta birando realidat for di isla di Kòrsou. E intenshon ta kuminsá promové Kòrsou den mundu turístiko. Minister El Hakim a revelá e plan aki durante inougurashon di un espasio di eksibishon den sentro di siudat. Bishitantenan di e eksibishon aki ta partisipá na un rifa pa gana un ticket pa un buelo pa espasio na balor di 75 mil dollar. Manera ta ampliamente konosí, Kòrsou ta trahando pa algun aña kaba riba e proyekto aki, kaminda por hasi un buelo pa espasio. E organisashon ta spera di e forma aki di promové Kòrsou den eksterior. E promé buelo di prueba ta planiá pa tuma lugá na 2013 i un aña despues, esta 2014, por biaha i yega espasio den apénas 4 minüt.

WILLEMSTAD - Tur hende ku ta deseá por transmití Karnaval di Kòrsou, basta ku e no ta hasié riba un base komersial. Minister Charles Cooper su posishon riba e eksklusividat di derecho di pòtrèt ku AGKK a sera ku TeleCuraçao (TC) no a kambia despues di a reuní vários ora ayera ku representantenan di AGKK.

Na final di e reunion, e palabrashon ku AGKK tin ku TC a keda riba mesa. Pero esaki no ta nifiká ku Gobièrnu a pèrdè e bataya, Cooper a enfatisá. “Nos no a haña otro i Gobièrnu ainda nó ta rekonosé ni koperá pa sanshoná ningun entidat ku stream Karnaval di Kòrsou”, Cooper a bisa.

WILLEMSTAD -  Kontrali na añanan shofùrnan di bus a eksperenshá  un situashon ordená djadumingu último durante di transporte di pasaheronan ku a bishitá karnaval. Un dje aspektonan ku a kontribuí na e situashon positivo aki ta presensia di e inspektor di transporte públiko i asistensha polisial. Giovanni de Caster, presidente di e sindikato di shofùr di bus, STU a bisa LA PRENSA ku kompará ku añanan anterior no tabatin ‘bululú’ na e paradanan di bus na Otrobanda. ‘Nos a mira un diferensha i ta  spera ku e ta sigui den tur e otro marchanan”, asina De Caster a bisa.