WILLEMSTAD - Te kon leu presidente di Parlamento por disidí riba su mes, kon e ta usa fondonan di presupuesto di Parlamento? E pregunta aki a bin na vários okashon den pasado resien dilanti.

Vários frakshon den Parlamento ta kuestioná e teoria di presidente Ivar Asjes, kende ta para’riba ku e ta esun outorisá pa disidí.

E asuntu aki a lanta kabes i kasi a bira un kontroversia, ku bishita di e delegashon parlamentario ulandes na Kòrsou resientemente.

Manera ta konosí, Dean Rozier komo presidente di e komishon pa Asuntunan di Reino a organisá un almuerso ku e delegashon den forma informal den un restorant.

Promé ku e almuerso tuma lugá a surgi un diskushon ken mester paga e kuenta di e enkuentro aki. Presidente Ivar Asjes a bisa ku no ta un aktividat ofisial di Parlamentu i komo ku ta un enkuentro informal, el a pone na duda si e mester paga esaki.

Asjes a laga tur hende komprondé ku e ta esun ku ta huzga si a paga.

Esaki a lanta e diskushon si ta presidente ta disidí si ta paga òf si ta outoridat di Parlamento kompletu esaki ta.

Asjes a splika ku lei ta bisa tekstualmente ku Lei di Kontabilidat ta bisa ku e presidente di Parlamento ta disponé di e fondonan di presupuesto di Parlamento (“beschikt over de gelden”).

E presidente tin mag di stipulá kon ta gasta, basta esaki ta den kuadro di e presupuesto aprobá.

Pero vários miembro di Parlamento a mustra Asjes ku e palabra disponé, no ta igual ku disidí. Bo por disponé di e fondonan. Esei ta enserá ku e sèn ta na bo disposishon, pero ora di disidí, ta prerogativo di Parlamento kompletu esei ta, algun miembro a trese dilanti.

E presidente di Parlamento sinembargo ta para’riba ku e ta sigui loke lei ta bisa.

“Ta esei Lei di Kontabilidat ta preskribí. Tur hende por tuma nota di dje.

No ta ami a traha e lei. M’a bin haña e lei. Si ke kambi’é, ta Parlamento mes, mester kambi’é”, Asjes a bisa.