WILLEMSTAD - Sifranan di Senso 2011 a konfirmá e tendensia ku tabata manifestá pa basta tempu kaba, ku poblashon di Kòrsou ta birando bieu den forma aselerá.

Ta evidente ku Gobièrnu mester hiba un maneho ku ta orientá riba esaki, asina minister Carlos Monk a deklará ayera, na okashon di presentashon di e sifranan - preliminar - di Senso 2011 na Kòrsou.

E sifranan a mustra ku kasi 20% di poblashon ta riba 60 aña.

Si den añanan ’60 e situashon tabata pinta manera un piramit, e situashon a kambia.

Segun e hefe di Ofisina Sentral di Statistik, Sean de Boer, sifranan di Senso 2011 ta mustra ku den e kategoria di 20 pa 35 aña, tin hopi ménos hende. E kantidat di hóben a baha ku 7%.

Minister Carlos Monk a mustra ku e situashon aki no mester ta sorpresa, pasobra e fenómeno di enbehesimentu a kuminsá manifestá su mes pa basta aña kaba den diferente faseta den komunidat.

Asina por ehèmpel tin e kuestion di edat di penshun, un tema ku ta hopi den diskushon último dianan.

Fondo di penshun ta bou di preshon enorme, pasobra no tin sufisiente hende ku ta traha ku ta kontribuí na e fondo. O sea, ku tin mas hende di riba 60 aña ku ta kobrando penshun.

Konsekuensia ta ku tin un défisit kresiente den e fondo i mester a tuma medida.

Manera ta konosí, Gobièrnu a tuma e desishon algun siman pasá ku ta oumentá edat di penshun di 60 pa 65 aña di edat. Di e manera aki ta garantisá ku den futuro por sigui paga penshun, e kos ku lo bin na peliger aki un par di aña, si nada no sosodé.

Segun minister Monk, esaki ta un ehèmpel ku ta indiká ku mester adaptá maneho di Gobièrnu i adaptá esaki na e sirkunstansia ku poblashon ta birando grandi den forma aselerá.

Gobièrnu mester adaptá su maneho riba diferente tereno na e situashon aki, minister Carlos Monk a bisa finalmente.

P’esei tambe ta importante pa sifranan di poblashon ta mas aktualisá posibel. Esei ta demostrá kon importante ta pa kada tantu tempu tene un Senso, Sean de Boer a bisa.

Manera ta konosí, kada 10 aña mas o ménos ta organisá un Senso na Kòrsou.