WILLEMSTAD - Poblashon di Kòrsou ta na e nivel ku e tabata durante hopi aña. Di akuerdo ku sifranan disponibel di Senso 2011, Kòrsou tin ofisialmente kasi 150 mil hende. E sifra ofisial ta menasá 149.679 hende ku den 2011 ta biba na Kòrsou, asina direktor di Ofisina di Statistik, Sean de Boer, a deklará. Esaki ta klaramente un diferensia ku e sifra ku a sali den e Senso di 2001. E oumento ta representá un kresementu ku 14.6%. Den e 10 añanan ku a pasa e kresementu di poblashon ku un promedio di 1% pa aña.

Un total di 3.000 enkuestadó a subi kaya aña pasá ku e meta pa pasa kas pa kas i puntra e kas di famia enkuestion datonan di e kas spesífiko ei.

Aparte di sifranan di entre otro trabou, altura di entrada i kuantu hende ta biba den un kas, a puntra tambe riba aspektonan di e bario ku e habitante ta biba’den.

A sali na kla ku sushedat den bario, problema ku insekto ta entre e problemanan prinsipal, siendo ku falta di iluminashon den bario tambe ta un faktor ku nan ta reklamando.

De Boer a splika ku e investigashon a trese na kla ku e kantidat di kas di famia ta 54.500. A sali na kla tambe ku tin un promedio di 2.7 hende ku ta biba den kada kas di famia.

Esei tambe ta klaramente un diferensia ku pasado. Si na 1992 tabatin un promedio di 3.5 hende pa kada kas di famia, na 2001 esaki a baha te na 3.0 i aworakí, di akuerdo ku sifranan di 2011, e kantidat a bira 2.7, òf sea algu ménos ku 3 hende.

Den pasado Kòrsou a konosé e fenómeno di un migrashon fuerte ku a tuma lugá. Yu di Kòrsou tabata bai Ulanda na gran kantidat bai establesé, sea pa biba òf pa traha i biba.

Esei tabatin komo konsekuensia ku poblashon di Kòrsou a baha formalmente. Esei tabata den e periodo di añanan 80 pa aña 2000.

Senso 2011 a konfirmá tambe ku e 4 idiomanan mas importante na Kòrsou ta papiamentu, ulandes, ingles i spañó.

Sorpresa kompletu:

Gobièrnu di Statia a kai!

WILLEMSTAD - Gobièrnu di e isla Statia a kai, ménos ku 1 aña despues ku el a ser instalá. Un dje tres partidonan ku ta forma un koalishon riba e isla, UPC a retirá su sosten.

Esaki a sosodé pa medio di un karta.

Kaida di Gobièrnu di Statia a bin komo un sorpresa kompletu pa e habitantenan.

E isla, di 3.600 habitante, a sali dividí for di Elekshon di mart 2011.

E 5 asientonan ku Konseho Insular di e isla tin, ta repartí den 4 partido polítiko. UPC tin 2 asiento.

For di 10 di òktober 2010, despues ku a desmantelá Antia, Statia ta un munisipio spesial di Ulanda.