Dr. Lorito ta yama tur hende un felis dia. Awe ta djarason i Lorito ta preparando tur e lorititonan pa bai skol mañan. Ta masha pluma nobo mester a kumpra. Tas ku masha dibuho, jeans ku saku tur kaminda, pèn, pòtlot, skrift, buki a kosta Lorito un dineral. Lorito tin masha duele di e mayornan. Bo por kere ku e mesun jeans ku tabata kosta 29 florin, awor ta kosta 109 florin? Nos a tende masha di kolchon sosial, mas kòntròl i otro asuntu, pero nos ta kere mas bien ku tabata anunsionan pa tene nos kontentu.
*********
Bo por kere ku DEZ no a duna Fundashon pa Konsumidó informashon na ora, pa por tene konsumidónan na altura di un ke otro. P’esei e aña aki niun hende no a haña rekomendashon unda ta mas barata pa kumpra. Ta kon kosnan t’asina. Hustamente den un tempu kaminda mester tin mas kordinashon, e tipo di kosnan aki ta laga hopi di deseá. Anto ken ta kòrda riba nos?
*********
Diputado ta ku fakansi, pasobra el a bisa, ku masha tempu e no a tuma liber. Awor nos ta puntra no: di kon e mester a bai Ulanda anto? No tabata nesesario pa bai Ulanda si tabatin asina tantu funshonario i direktor a kompañá e studiantenan. Nos ta lamentá un poko, ku pa promé bes den último 30 añanan, e diputado di Enseñansa no ta presente ora skol habri! Lorito di lebumai nos!
*********
Nos a tende ku awe mainta tabatin karavana pa un hende ku a sali di prizòn. Nos ke sa un kos no: awor a bira ta tene karavana tambe pa hende ku tabatin kontakto ku hustisia? Tin sierto kosnan ku na Kòrsou realmente ta mundu riba su kabes. E mihó kos ta pa bai kas ketu ketu, bin bèk trahando duru den komunidat i despues presentá bo mes komo un hende ku nos por respetá atrobe! Ban wak kua korant ta pone e kos aki riba frontpage djis pa romantisá hasimentu di malu. Lo tuma nos na malu, pero nos tin ku señalá e kos aki. Simplemente e no ta bon!

Lorito ta yama tur hende un felis djamars. Awor si tin manera un periodo di kònkòmber a drenta masha pisá. Ounke skol ta bai habri, Curoil ta sigui den notisia, e kasamentu entre hende di mesun sekso ta kombersashon tur kaminda, no tin un primisia ku ta sakudí tur hende. Ban wak ken ta haña sa algu den e dianan ku ta bin, pasobra un kos ta sigur: notisia tin!
*********
Lorito a haña sa un kos awe ku hopi hende no sa. Parse ku ora bo yega Merka nan por kita bo Ipod, selular i laptop for di bo sin puntra nada. E ta skibí den reglanan di entrada na Merka i ya kaba diferente hende a haña nan konfrontá ku e situashon aki. E medida ta relashoná ku henter e asuntu di terorismo i kòntròl riba entrada di stranheronan na Merka. Tene kuenta ku e desaroyo aki!
*********
Bo a tende e chiste kaba di e dama ku no por a drenta Merka. Parse ku e dama tabatin muchu líkido den su bustu drechá i el a pasa e límite di loke ta aseptabel. E dama a saka tur su koketeria riba e agentenan di imigrashon ku no por a hasi nada otro sino di bisa e dama buska un manera. Lorito di lebumai nos! Kòrda ku ta un chiste!
*********
Un kos ku por konsumí nos masha ta ora ta midi ku dos midí. Boso ta kòrda kuantu kos Gezag a hasi na Las Almas i pone pia abou. Las Almas a muri un morto silensioso, pasobra manera ta papiá den pueblo a yega na sierto interesnan i einan si no ta mishi. Mesun kos ta pasa ku e asuntu di playa. Masha tempu kaba tin moveshon ilegal na kosta, pero no ta presentá i para tur kos a lo macho. Ata pa para manifestashon si tin tantu polis i SKS riba pia. Di kon otro biaha no? Ta e kosnan aki ta duna pueblo rabia i despues ta puntra: ta kiko a pasa anto?

Lorito ta yama tur hende un felis djaluna. Kòrda ku Lorito ta bisa un djis ta djaluna, un djis ta otro djaluna. Bo por imaginábu ku ya kaba nos a pone 7 luna nos tras.
*********
E siman aki tin un espektativa dushi, komo ku djis aki Weganan Olímpiko ta kuminsá. Ounke Lorito ya kaba a mira un ñapa di loke ta spera nos djabièrnè awor, nos ta pendiente pa sa kon e shou kompleto lo ta. Ta parse ku China lo bai duna nos un trit global i oriental kompleto. Ban wak si e asuntu di libertat pa move i ekspresá lo no resultá un opstákulo grandi.
*********
Na Ulanda por ehèmpel tin krítika, ku despues ku tabatin tantu diskushon riba Tibèt, Ulanda a yega ku su delegashon sin masha remarke. Niun pia di palabra riba e opreshon chines na Tibèt. Otro mandatarionan ku a bisa ku nan lo no ta presente pa motibu di e situashon na Tibèt, lo t’ei manera un bolo, manera presidentenan di Merka i Fransia. Esei ta un konfirmashon mas ku tin biaha tin polítiko ku dos lenga.
*********
Siman a habri i hopi punto di siman pasá ta ketu bai pendiente. Un di nan ta por ehèmpel e situashon na Curoil ku sigur ketu bai ta di atenshon. Miéntras tantu ku tin masha poko atenshon pa e tema, mester keda riba dje, pasobra mester sa ta ken ta bai hasi investigashon. Nos a atvertí kaba ku no por hasi eror den eror. Nos ta pendiente pa sa si ta kualke kompania lokal òf internashonal ta bai hasi e investigashon (nan), si a tene destaho promé ku a duna nan e enkargo. E asuntu di “very good friend(s)” den destahonan tambe mester kaba!

Lorito ta yama tur hende un felis djasabra. E djasabra aki a bira diripiente un djasabra masha muhá. Lorito mester a dèk masha pa nos no muha nos alanan.
*********
Siman ta sera ku un gran kantidat di interogatorio riba e kaso Curoil. Lorito ta kere ku e direktor no a hasi su mes un gran fabor. Den promé instansia el a para duru i awor nos a komprondé, ku tòg el a bai di akuerdo ku e fakansi ku a imponé riba dje. E kos a keda masha erátiko. Nos tabatin gana di sa kiko korte tabata pensa di e desaroyonan na e kompania. Di tur manera ta parse ku Earl i su hendenan a gana e promé rònt.
*********
Nos mester bisa ku ta masha kos a kuminsá sali na kla diripiente. Lorito a komprondé, ku e hendenan di LA PRENSA a haña un karta kayente di un di e trahadónan. Parse ku e kompania ke bin ku un sistema kaminda tur hende ku sali for di e kompania no por bai prensa. Lorito a komprondé, ku e kos aki tin diferente trahadó masha preokupá. Nos por imaginá nos mes, ku un hende por haña órden pa no bai traha na un kompania ku ta traha den e mesun área pa sierto kantidat di aña, pero asuntu di pone prohibishon pa papia si ta bai demasiado leu.
*********
Nos no a komprondé tampoko, di kon diripiente e eks funshonario ku a bai, bin bèk, awor a bolbe bai. Niun hende no kier papia riba e kaso. Lorito a komprondé, ku el a bai mainta i e otronan a bai atardi. Kiko ta bèrdat nos no sa, pasobra niun hende no ke papia. E siman aki tabata su último dia komo konsultant na e kompania. E tabatin un kontrakt di dos aña, di manera pues ku tin basta pregunta rondó di e kaso aki. Nos lo bin bèk riba e desaroyo aki.

Prof. Sheik Lorito ta yama tur hende un felis djabièrnè. Ougùstùs a dal aden asina aki. Nos a tira 7 luna nos tras ku a bula manera e paranan mas lihé ku nos. Zjuuuuut....7 luna a pasa. Lorito ta kontentu ku ougùstùs a yega pasobra ta luna di fakansi pa Lorito, Weganan Olímpiko i otro festividatnan!
****
Lorito a pasa wak e konferensha di prensa ayera di Gensley na Trupial Inn. Ta bon pa mira kuantu sosten un direktor tin. Esei sigur ta un punto ku mester tene kuenta ku ne. Nos a mira personalmente kon diferente trahadó (di abou te ariba) a bin duna nan direktor un man pa sosten i pa pidié wanta duru. Nos no sa mira e kosnan aki masha.
****
Por lo general bo ta haña e tipo di situashonnan aki den kompanianan kaminda kosnan tabata kana robes i e personal tabatin un kultura di aktua robes. Ora ku bin kambio semper ta bin resistensia komo ku hopi trahadó no sa ku ki aktitut e direktor nobo ta bin. Anke ayera esei no tabata e kaso, ta bon pa tur hende sa (Gobièrnu, Hunta di Komisario, STIP i otronan) ku trahadónan ta para tras di nan direktor! Esei tambe mester pisa den e totalidat!
****
Tòg nos a keda ku e impreshon ku a aktua demasiado for di konteksto. Lorito ta kere ku enbèrdat por hasi un investigashon sin ku gerensia ta stroba. Ademas, si mester a saka informashon for di e kompania, lo a hasié masha dia kaba. Ta bon pa apuntá tambe loke Gensley a bisa: 5 miembro diferente di e kompania a firma e kontraktnan! Por ta einan un investigashon pa determiná proseduranan spesífiko (por ehèmpel ken ta outorisá pa firma) ta na su lugá!

Sheik Lorito Hopi Gas ta yama tur hende un felis dia. Awe ta e último dia di yüli i ya kaba nos ta bai drenta ougùstùs. Por sierto ayera niun 2 no a kai atrobe den e bolitanan i nos a kuminsá kere awor si ku a lubidá di pone e 2 nan den e tómbolanan. Lorito mes lo bula wak awe nochi!
****
Anto for di ora nos a tende ku tin hopi gas (no gas di bientu!) rònt di Kòrsou, nos a disidí pa buska un tùlbant grandi pa nos bisti. Pronto nos lo bira sheik, segun nos a tende Min. Pres. bisa. Nos a keda masha kontentu pero di otro banda nos ta sigur ku e storianan di Ansary lo bolbe lanta kabes! Nos ta ansioso pa tende ta kuantu gas tin i pa kuantu tempu.
****
Por ta Ulanda, un pais di gas, tambe a tende kaba ku tin gas i ta p’esei Ulanda ta tumando nos ku dos man? Poef....! Nos mester a laga un bientu bai! No wòri, pasobra nos ta den pleno aire!
****
Un saludo pa Ramon Yung ku tambe tabatin su último dia na radio awe (por lo pronto). Awe mainta el a yama ayó na su oyentenan. Yung ta traha na Vigilante, ke men no preokupá, e tin trabou. Parse ku e tin proyekto grandi na kaminda banda di Parasasa.
****
Bo a tende kaba ku parse no ta bai sigui desaroyá Wechi mas. Te awe nos ta warda konstrukshon di e mil kasnan ku Nini a primintí. Pero parse ku ta bai ta un lucha serio pa hasi e área aki unu di desaroyo komo ku ya kaba Amigunan di Tera a kuminsá mula hacha. Nos a komprondé ku pa kolmo un biná di Kòrsou a kaba di haña dos yuchi den e mondi grandi aki loke ta pone ku tin mas argumentu pa sigui konservá e área.

Prof. dr. Lorito ta yama tur hende un felis djarason. Na bankonan no tabatin masha moveshon ayera pero nan ta antisipá ku awe, mañan i prinsipalmente djabièrnè lo tin moveshon te bai. Ademas diferente negoshi ta spera di haña un bon boká relashoná ku apertura di aña eskolar nobo. Nos ta pidi nan si pa tene kompashon ku preis. Ta basta reklamo tin tur kaminda. Komo ku Lorito no tin ku bisti nos Lorititonan pa bai skol (djis habon so pa laba nan alanan) nos no ta ripará e oumentu di preis!
****
Nelson Pierre a skor awe mainta ku e forma ku el a trese su puntonan di bista dilanti na Z-86. Su puntonan ta relevante, aki aya skerpi i sarkástiko loke mester por, pero mas importante ta ku su mensahe sigur a yega. Nos a bisa na diferente okashon ku Nelson tabatin e oportunidat históriko pa trese kambionan importante pero finalmente e mester a sukumbí pa e mesun nètwèrknan ku el a trata di bringa.
****
Ora nos analisá Kòrsou di awe (i kere nos ku e kos aki ta duru pa bisa), nos no por yega na otro konklushon ku Kòrsou a bira di un generashon ku ta golos pa kos. Si bo mira kon hende ta pusha otro na nivelnan mas haltu, kon tin biaha ta traha ku èlebog pa hala e otro fo’i kaminda i kon materialismo ta prevalesé, anto bo no por yega na otro konklushon. Nelson tambe a bisa esei awe: nos a bira demasiado materialista.
****
Nelson komo sosiólogo a determiná kaba ku na Kòrsou tin manera un vírùs ku ta afektá tur esnan ku yega na sierto posishon. Hende ku a lanta pober i humilde awe ta hasi tur esfuerso i eventualmente bira bo enemigu pasobra bo ta stroba nan di haña e salario mas haltu na Kòrsou i tur otro benefisio manera un Mercedez, un BMW òf un Audi. Lorito di lebumai nos!

Lorito ta yama tur hende un felis djamars. Fakansi di skol ya kaba ta den su fase final i e lorititonan tur ta lamentá ku dianan di skol ta serka. Nos a bisa nan ku t’asina mester ta! Tin momentu di gosa i momentunan di traha serio.
*********
E kaso di Curoil a kue un buèlta dramátiko i Gobièrnu, komo doño, no a keda ku otro alternativa, sino di atendé e kaso aki ku diligensia i seriedat. Ta masha karta nos a haña di hendenan preokupá. Banda di esei tin tambe yen di konhetura ku mester dil ku nan promé ku nan hasi mas daño na e kompania. Na Kòrsou a para bira, ku ta ripití un mentira òf mitar bèrdat dje tantu ei, ku e ta bira bèrdat kompleto!
*********
Nos a haña un karta ku ta hasi diferente denunsia mas. Nos ta kere ku e hende ku a skibi e karta i a tuma e molèster, pero no a firm’é, lo hasi bon di bai entregá su denunsia na Ombudsman. Curoil ta kalifiká kompletamente den e trabounan di Fred Wiel. Nos a haña tambe un komunikado di MOPROKO (esta un nòmber mahos!), ku ta pidi un investigashon i pidi pueblo pa ta den estado di alerta. Un kos nos no ta komprondé, ta kon bin kada bes e gruponan aki mester papia di mobilisashon! Por atendé e kosnan aki di otro forma tòg?
*********
Nos a ripará, ku henter e kaso di Curoil a yega tambe prensa internashonal. Awe nan a informá nos ku Bunkerworldnews.com a informá di e kambionan na Curoil. Nos no a haña chèns pa subi riba e wepsait, komo ku mester bira miembro di e wepsait pa por subi riba dje.

Prof. dr. Lorito ta yama tur hende un felis siman. Nos ta deseá prof. Prikichi tambe un felis regreso.
****
Kòrsou tabata di fiesta djasabra anochi despues ku nos selekshon di Little League a bira kampion un biaha mas. Masha selebrashon tabatin tur kaminda. Un kos ku nos a gusta ta ku tur kaminda yunan di tera tabata brasa otro i deseá otro pabien. Deporte un biaha mas a demostrá ku e ta un arma importante pa krea un nashon. Ta mayoria di nos polítikonan di turno i empresanan ku por duna un man i no ta hasi esei, so no a ripará ainda! Pabien na Vernon i su muchanan pa trese tantu alegria, pas i union.
****
Dia pa dia nos ta haña mas duele di Andruw. Awor nan ta ekspresando duda si e lo bin bèk e temporada aki. Don Mattingly a bisa awe den Los Angeles Times ku e ta spera ku Andruw por rekuperá. “Andruw Jones can be salvaged, making him either an optimist or a dreamer”. E frase ei so ta bisa tur kos. Lorito ta kere ku ta un remedi so tin: bin Kòrsou, train ku un par di mucha di Little League, basha firma tur kaminda i kumindá/hari ku tur hende. Esei ta e reseta di Lorito pa sigui dal bai. Kere nos ku e lo yuda sigur!
****
E kaso di Curoil ta sigui hala atenshon. Maske kuantu ku gerensia trata di splika, ta surgiendo mas pregunta. E kos mas malu ku gerensia a hasi ta saka un komunikado, bisando ku no ta kontestá otro preguntanan. No masha táktiko, pasobra ta e ora ei preguntanan ta bai surgi.
****
Tur hende sa ku nos no ta masha mirá den bista di Helmin (kere nos ku nos tampoko no sa pakiko!), pero el a hasi algun remarke ku sigur ta relevante den e kaso aki. I el a hasié den un forma hopi aseptabel kuestionando e kosnan ku mester kuestioná. Maske e ta haña nos korant “desastroso”, manera e mes sa bisa, nos ta sigui duna “cesar loke ta di cesar”. Nos ta spera e ta uni ku otronan pa nos haña sa delaster un detaye di e kaso aki! Nos ta interesá prinsipalmente den e aspekto di kòntròl interno i ta di kon awor numa a ripará!

Prof. dr. Lorito ta yama tur hende un felis djabièrnè. Un pabien awe na tur para ku ta ku penshun. Pa nos amigunan penshonado den prensa tambe ta bai un saludo i nan ta hopi: Ronny, Orlando, Paul, Carlos, Maria, Signa, Cedric, Elvin, Mem ta bai un saludo. Na otro penshonadonan manera Eric, Sonia, Morris, Stanley etc. tambe un saludo!
*********
Nos a tende último dianan masha komentario riba e kaso den Nieuwe Straat. E kaso ta den investigashon i Kabuya ta detené. E kos ku nos no a komprondé ta, ku tin informashon ku ta un krùk di bar a usa pa lastimá e víktima kuné. Pero ketu bai tin medio ta insistí pa papia di piedra i klenku. Es mas, na Ulanda nan a bisa klaramente ‘stenegooier gearresteerd”. Nos tin ku warda awor te ora tin un kaso den korte pa nos tende kiko ta kiko. Nos a komprondé, ku e víktima mes a indiká, ku su pèchi di Boston a keda tur kibrá pa motibu di e akto aki.
*********
Papiando di Boston, yen di hende nervioso e fin di siman aki pasobra Boston ta bai topa Yankees. Nos amigunan aya no ke tende nada malu di nan ekipo. Nan tabata den un proseso di duele nashonal, na momentu ku kosnan no tabata bayendo bon ku nan. Nan tabata skonde pa no komentá nada. Bo mester tende nan awe: nan tin e boka mas grandi atrobe. Ta di kon hende mester t’asina?
*********
Bo ta mira tur biaha ku den mundu internashonal hendenan ta demostrá nan grandesa. Si bo tuma nota ku Hugo Chávez a duna Rei di Spaña un man, bo ta komprondé, ku aki ta un kos grandi a pasa. Ken no ta kòrda ku Rei Juan Carlos a manda Chávez sera su boca. “Por que no ta calles!” a zona rònt mundu i te awe ta un di e filmashonnan mas gustá riba youtube.com