WILLEMSTAD - Resientemente un delegashon di Kòrsou di Taekwondo tabata na Aruba pa partisipá na e di nuebe edishon di e kampionato di Taekwondo patrosiná pa “Tierra del Sol”.
Huntu ku Kòrsou tambe a partisipá delegashonnan di Santo Domingu, Mexico i Sint Maarten.
E muchanan di Kòrsou, a duna fuerte bataya pa asina logra un hopi bon resultado.
Por a tuma nota di e hecho ku Kòrsou a bai ku e premionan pa “Best Fighter” den tur tres kategoria.
Den Kategoria Infantil, Natan Sambo a gana tur su kombatenan di un forma superior pa asina bai ku e premio di mihó bringadó den e kategoria aki.
Quentin Siberie simplemente tabata fenomenal, ganando ku superioridat di tur su kontrinkantenan pa asina bai ku e kategoria mihó bringadó den e Kategoria Hubenil.
E atleta Senior, Audy Muller ta den un trayekto invensibel, konkistando pa di tres kompetensia konsekutivo, Aruba, Sürnam i Trinidad, e premio di e mihó bringadó di e evento.
Na Aruba no tabatin atleta pa wanta e atakenan rápido i velos di Audy.
Den su totalidat e tim di Kòrsou a logra e titulo di e Mihó Ekipo di e evento, logrando mayor puntuashon pa kombatenan ganá.
Algu di aploudí sigur konsiderando ku Aruba tabatin mas atleta partisipando na e evento.
E resultadonan pa e atletanan individual ta lo siguiente:
Kategoria Infantil, 6 pa 13 aña:
Nathan Sambo Oro
Quincy Sambo Oro
Shergedion Apostel Oro

WILLEMSTAD - Djasabra último tabata tin un tremendo kareda di Street Legal na Curaçao International Raceway.
FAC i Komishon Organisadó sigur ta hopi satisfecho pa mira kon e aktividat di Street Legal ta sigui krese.
Públiko sigur a haña hopi bon kareda mira. Spesial Heavy Bracket kaminda e outo nan kualifiká anto kon e ladder a saka e Import nan kontra di e American Muscle den e promé buèlta.
Tabata un anochi kaminda e tantu “oildown” komo áwaseru a para e aktividat pa un par di minüt.
Ta bon tambe pa aklará un punto, ku durante e kareda di dos buèlta di kualifikashon e koredornan Elmer Van Thijs i Roderick Trinidat su vehíkulo a kibra.
Elmer Van Thijs a kore den promé buèlta 9.20 sekònde i Roderick Trinidat 9.00 sekònde. Segun e regla nan por bini pa eliminashon ku un otro vehíkulo, pero e dial in ta keda esun ku nan a kualifiká ku n’e.
Resultado di kategoria di Street Bracket ku ta kore di 18.00 sekònde pa 13.00 ta lo siguiente:
1] Jursie Rodriguez Toyota Starlet Dial In. 14.60 E.T. 14.650
MPH 89.15 R.T. .070
2] Asis Perreira Honda Integra type R Dial In. 14.72 E.T. 14.675
MPH 95.29 R.T. .200
3] Otmar Conradus VW Golf VR-6 Dial In. 14.45 E.T. 14.447
MPH 95.98 R.T. .132
Mihó Elapsed Time a bai pa Javier “Porky” Augusta ku su Toyota Starlet Turbo a kore E.T. 13.042 sekònde.
Mihó Miles Per Hour a bai pa Marlon Rock ku su Toyota Starlet Turbo ku 127.26 miya pa ora.

WILLEMSTAD – Ayera nochi na Parke Tio Daou, tabata tin kontinuashon di e kampionato 2008 di beisbòl AA.
Riba e fecha aki tambe tabatin despedida di e hungadó di Curaçao Yankees, Frensly Martina ku a haña un “scholarship” na un kolegio na Oklahoma.
Tabatin tambe animashon di GIO Fuertísimo pa e wega aki.
Pero Sta. Maria Pirates/Chippie, e ekipo kampion, no a tene kuenta ku e selebrashon i a propiná Curaçao Yankees un derota pa nòkout di 14-2.
Ku dos rèli di sinku kareda, unu den kabes di dos i e otro den kabes di sinku ining, e ekipo Pirata ta logra nan di 11 viktoria di temporada.’
E dos karedanan di Yankees a keda anotá den bòm di dos ining.
Pa Sta. Maria: 14 kareda, 15 hit, 1 eror. Gerrel Girigorie a gana i Luisgardo Alvarez a bai di 4-3.
Pa Cur. Yankees: 2 kareda, 8 hit, 4 eror. Gillord Kirnon a pèrdè i Jurmaine Josepha di 3-2.
Awe e kampionato ta kontinuá den Tio Daou Ballpark ku Sta. Rosa Indians/Ennia kontra di Blue Hawks/Aqualectra.
Mañan den stadion Johnny Vrutaal Royal Scorpions mr. Baseball/Banco di Caribe ta enfrentá Groot Kwartier Stars/Mangusá.

WILLEMSTAD – Riba e wepsait di IAAF, e Federashon Internashonal di Atletismo, a sali un artíkulo di sinku velosista ku por sorprendé e tres grandinan ku ta Usain Bolt, Tyson Gay i Asafa Powell ku nan ta yama “The Forgotten Five”.
Den e grupo “The Forgotten Five” aki tin Churandy Martina tambe.
Nan a tene un entrevista ku tur e sinku atletanan aki ku ta Derrick Atkins di Barbados, Churandy Martina di Antia ulandes e duo di Trinidad & Tobago, Richard Thompson i Marc Burns i Francis Obikwelu di Portugal.
Aña pasá durante di e Kampionato Mundial na Osaka, Hapon Churandy Martina tambe a hunga un ròl den e 100m final. Na e okashon ei el a yega na e di sinku puesto.
Awor aki e atleta yu di Kòrsou di 24 aña ta un aña mas bieu, mas sabí i mas velos.
“Semper mi ta mira kosnan masha positivo. Na e salida nos tur ta humano, Gay, Bolt i Powell. Nan tur ta ser humano meskos ku tur otro hende i mi ta sinti mi mes kapas di gana un medaya meskos ku tur otro”, asina Martina ta bisa.
“Mi kier gana un medaya e aña aki na e Weganan olímpiko di Beijing. Mi kier yega mas haltu riba e lista di e atletanan mas velos na mundu. Mi meta ta pa kibra e rèkòrt mundial. Mi sa ku mi por yega tur esaki pa motibu ku awendia mi ta pará pega ku e gran atletanan ei ku mi sa atmirá. Nan no ta e héroenan intokabel mas. Nan ta atletanan meskos ku mi ku ta kompetiendo ku otro pa mira kual di nos ta esun mas velos”.

WILLEMSTAD – Un total di sinku deportista di Antia Ulandes i Aruba a biaha pa Peking pa partisipá na Weganan Olímpiko.
Churandy Martina, Philip Elhage i Rodion Davelaar ta e atletanan ku lo partisipá pa Antia Ulandes.
Martina tin segun ekspertonan e mihó oportunidat pa por logra un medaya olímpiko ku lo bai kore riba 100m i 200m.
Rodion Davelaar ta bai landa riba 50m estilo liber i Philip Elhage lo bai riba e disiplina di Pistol di Airu riba 10m.
Pa Aruba lo bai e yudoka Fiderd Vis i e landadó Jan Roodzant ku lo bai riba 100m estilo liber.
Dia 7 di ougùstùs lo tin un seremonia spesial pa yama e delegashon di Antia bon bini den e Villa Olímpiko. Un dia promé lo ta Aruba lo haña e honor aki.
E deportistanan lo trata di duna un bon prestashon.
Pa Davelaar e Weganan Olímpiko lo kontribuí na un progreso di e landadó. Aki kuater aña na Londres e lo bai tin un mihó chèns pa gana un medaya, pero e tin muchu tiki eksperensia awor aki.
Fiderd Vis di Aruba ta mira su soño bira realidat. E lo ta e kargadó di bandera pa Aruba. Jan Roodzxant ta spera ku kibra su rèkòrt personal durante di e weganan.
Pa Nicole Hoevertsz, e miembro arubano ku ta miembro di e direktiva di KOI, Komité Olímpiko Internashonal.. E lo ta enkargá pa mira ku algun deporte ku ta kai bou di dje ta kana sin problema.
Hoevertsz mes na 1984 a bai e Weganan Olímpiko di Los Angeles.

WILLEMSTAD – Djasabra awor lo bai tin weganan di All-Star den stadion Johnny Vrutaal for di mitar di 1 di mèrdia kuminsando ku e All-Star Game Hubenil.
FeBeKo, e Federashon di Beisbòl di Kòrsou, ayera tardi den Ribs & Chips, a tene un rueda di prensa pa e dia di All-Star.
E All-Star Game di Klase AA ta tuma lugá ya ku e temporada a yega su mitar.
Federashon huntu ku e dos kuerpo téknikonan a forma dos selekshon, Pariba ku ta konsistí di e timnan Sta. Rosa Indians/Ennia, Wild Cats/Fatum/Kambes, Groot Kwartier Stars/Mangusa i Curaçao Yankees.
E tim di Pabou ta konsistí di e timnan: Sta. Maria Pirates/Chippie, Royal Scorpions Mr. Baseball/Banco di Caribe i Blue Hawks/Aqualectra.
Federashon kier a gradisí e spònsernan ku a koperá ku e fecha aki.
Insel Air a pone un deurprijs di un pasashi pa Repúblika Dominikana. Tambe tin un estadia na Sabana Resort pa e MVP di e wega. Lo tin trofeo pa e Home Run Derby, pa e ganadó di e tim Hubenil, e ganadó di e wega di Veterano I medaya pa tur hende. Amstel, Heineken i Pepsi Cola tambe ta spònser e evento.
Tambe GIO Fuertísimo lo animá e fanatikada ku bini promé ku e All-Star Game di AA i Aya lo kanta huntu ku Zoyoyo despues di wega.
E wega di Hubenil i esun di Veterano, lo ta grátis, pero pa e wega di AA entrada lo ta fl. 5,- general. Lo tin un sekshon di VIP ku lo kosta fl. 50,-, ku drinks i snacks.
Un invitashon na fanatikada di beisbòl pa asistí na e weganan aki.

WILLEMSTAD – E Maestro Internashonal Luis Bernal Moro di Spaña a sòru pa un sorpresa dor di gana 7 punto for di 9 wega. E no a sabi di pèrdè kontra di niun Gran Maestro i a drenta e último buèlta ku un punto di delantero riba e sobra ahedresistanan. E tabatin sufisiente na un remise, empate, pa bai ku e título.
Den su último partido kontra di e Maestro Internashonal ulandes Thomas Willemze, mesora el a buska un remise, pero no a logra esaki i a bin kai derota dor di Willemze.
Ku esaki el a bin keda empatá ku e Gran Maestro Larry Christiansen di Merka i e otro Gran Maestro Joel Benjamin di Merka, ku mes tantu punto.
Larry Christinasen a bin sali na e promé lugá dor di un mihó promedio di skor i Luis Bernal Moro, mester a konformá su mes ku e di dos puesto. Na e di tres puesto a keda Joel Benjamin. Ku e puesto aki Benjamin a bin haña e promé di tres normanan ku e tin mester. E premio pa e mihó ahedresista lokal a bai pa Fabio Mensing ku 5 punto i mei na e di 11 lugá. Miéntras ku Jimmy Izijk tabatin e mesun kantidat di punto i a bin haña e premio di e hungadó mas haltu ku tabata “unrated”.
Seidi Salim-Moussa a bin haña e premio di e mihó hungadó femenino lokal.
Anna Zatonskih di Merka a bin haña e premio di e mihó hungadó femenino.
Jasel Lopez di Aruba ku e aña aki a debutá den e klase Habri, despues ku aña pasá el a hunga den Hubenil, a tèrminá ku 5 punto.

LOS ANGELES – Den e último dianan tabata tin yen di vershon tokante di e slump di Andruw Jones i kiko mester ser hasí ku e pelotero yu di Kòrsou.
Prensa na Los Angeles tin yen di sugerensia.
Un korant The Los Angeles Times a skirbi ku Dodgers mester pidi Andruw Jones pa e bai Liga Menor, pa chèk su rudia i traha riba su swing i ku e outfielder mester aseptá esaki.
Segun e korant The Times, Jones mester a bira e bate ku lo mester a bai karga Dodgers. Desesperá pa un bate di poder Dodgers a firm’é na un kontrakt di dos aña pa 36 mion dollar invierno pasá.
E ta batiendo .161 ku 2 honron i ta poncha kasi kuater biaha kada 10 turno na bate.
E no ta e bate grandi ku Dodgers a spera i Dodgers a importá Manny Ramirez pa e ròl aki djaweps pasá loke a manda Jones banki.
Dodgers no ta yudando Jones ni nan mes teniendo Jones na Los Angeles.
Jones no ta bai yuda Dodgers gana Divishon West.
E no por yuda si e no hunga tur dia di manera ku nan por sa si su rudia a bira mas fuerte i su swing mas mihó.
Mènedjer Joe Torre a bisa ku e idea pa manda Andruw Jones pa Liga menor no a keda diskutí.
Dodgers no por manda Jones Liga Menor sin ku konsentimentu pa motibu ku e tin mas ku sinku aña di servisio den Liga Grandi.
Torre djadumingu a bisa ku Dodgers no tin plan pa manda Jones Liga Menor kaminda e por hunga tur dia i haña sufisiente turno na bate pa traha riba su problemanan.
“Bo ta kit’é for di e hendenan ku por yud’é”, asina Torre a bisa. “No ta algu ku nos ta konfortabel kuné awor aki. Nos tin e hendenan akinan ku por yud’é”.

WILLEMSTAD - Djasabra último e kampionnan di Karibe di Beisbòl Little League tabata di bishita na Building Depot.
E motibu di nan bishita tabata pa duna pueblo di Kòrsou, spesialmente e muchanan e chèns di sera konosí djaserka ku e kampionnan i na mes momentu haña un bala firmá pa tur e hungadónan.
Hopi ta e muchanan ku huntu ku nan mayornan a hasi uso di e oportunidat aki i den tempu rèkòrt e 100 balanan primintí a kaba.
Despues a yega momentu kaminda gerensia di Building Depot, den persona di sr. Roderick Lucia, a hasi entrega di un bunita kèts LaCoste na tur e hungadónan i na nan coach.
E hóbennan a keda sumamente enkantá ku e regalo kampion aki i mesora pasmentu di kèts a kuminsá.
Dje forma aki Building Depot kier a gradisí e hóbennan aki pa e echo ku un biaha mas nan a logra pone Kòrsou su number na haltu i alabes deseá nan tur klase di éksito durante nan kompetensia na Williamsport.
Building Depot ta sigui kere den hubentut lokal.

MASON, Ohio – Rafael Nadal lo tin ku warda poko mas pa bira e tènista number un di mundu.
Visiblemente kansá, despues di dos luna di gana sin pousa, e spañó mester a kore hopi riba kancha durante e wega djasabra i finalmente el a keda eliminá di e Masters di Cinnati, den semi final.
El a keda asina na dos paso di logra otro título, ora el a kai kontra e serbio Novak Djokovic pa 6-1, 7-5, den un resultado ku simplemente a wanta e subida di Nadal na tòp di mundu.
Den dos siman, e spañó di 22 aña lo a subi outomátikamente na e puesto ei, moviendo e suizo Roger Federer.
“Mi ta sintimi felis, pasobra sigur ku pa bo bira number unu bo tin ku hasi hopi trabou durante hopi tempu”, Nadal a bisa. “Pero no tin tempu di emoshon ni di festehá”.
Yegando semi final di e torneo aki, ku tin un bolsa di 2,6 mion dòler, Nadal a akumulá e puntonan nesesario pa move Federer di e promé puesto mundial. Pa e forma den kua bo ta haña punto, esaki lo sosodé 18 di ougùstùs, ora publiká e lista nobo.
Federer a keda na e puesto di honor 235 siman tras di otro, un rekòrt. E i Nadal tabata 1 i 2 di mundu, for di 25 di yüli 2005.
Nadal lo bira e di tres spañó ku ta yega den tòp dje lista, pa djòin Carlos Moyá (1999) Juan Carlos Ferrer (2003).
Si el a gana e torneo aki lo ela subi mesora na promé puesto, pero den transkurso di siman, e spañó parse tabata mustra mas kansá. Djokovic a pone un fin na un racha di 32 triunfo tras di otro di Nadal – den kua el a kue sinku título – mustrando su mes mas agresivo, ora el a probechá su chènsnan i obligá ku e strea ibériko a traha duru pa kada punto, spesialmente den e promé sèt.