WILLEMSTAD – Durante un akshon kontra mashinnan di wega di plaka ilegal, polis a konfiská un total di 8 mashin ayera nochi na diferente snèk i restorant. E akshonnan a tuma lugá bou di supervishon di Ministerio Públiko i e departamentu di polis ku ta otorgá pèrmit.
Den tur e kasonan ayera nochi polis a aktua na momentu ku klientenan di e establesimentunan tabata hasiendo uso di e mashin. E kondishon di ‘gara den akshon’ (heterdaad) ta sumamente importante pa prueba den korte. E akshonnan a kuminsá ayera nochi den Mundu Nobo kaminda polis a gara klientenan na un restorant ta hasi uso di un mashin di wega di plaka. Despues di a konfiská e mashin i traha prosèsverbal pa e doño di e restorant, e polisnan a sigui pa Cubaweg.
Na Cubaweg e tim a nota ku na un establesimentu tabatin dos mashin den uso. Mes ora a aktua i a konfiská e mashinnan. Na un otro establesimentu di horeka riba e mesun kaminda polis a bolbe nota ku tabatin kliente ta hasi uso di un mashin di wega di plaka. Einan tambe a aktua i traha prosèsverbal.
E akshonnan a sigui i riba Jan Noorduynweg na altura di Chipi Chipi polis a nota klientenan na un restorant ta hasi uso di un mashin di wega di plaka. A konfiská esaki tambe. Finalmente a bai Suffisant kaminda a konfiská un mashin na Quinta Violeta. Te den oranan lat di anochi e tim a logra konfiská dos mashin mas pa yega na un total di 8.
E akshonnan di ayera ta e proménan despues di e veredikto di wes algun siman pasá. Na e okashon ei wes a sentensiá 6 doño di establesimentunan di horeka ku a duna oportunidat na nan klientenan pa hasi uso di mashin di plaka ilegal. Dos doño a sali liber pasó no por a prueba ku a hasi uso di e mashin. Durante e kaso den korte a resultá kon importante ta pa polis gara un kliente den akshon, loke a sosodé ayera nochi den tur e kasonan.

OM ta trahando resúmen di detenshon di último tempu

WILLEMSTAD – Ministerio Públiko ta trahando un resúmen di e kantidat di sospechoso di krímen detené últimamente. Entretantu a laga diferente di e sospechosonan den libertat, miéntras ku ayera a bolbe detené dos sospechoso relashoná ku e sekuestro di e komersiante Walid Omeis.
Un di e detenshonnan a tuma lugá ayera mainta 09.50 na Montaña. Einan polis a bai ku e hóben hamaikino L.G. di 20 aña di edat. Den kareda di 10.45 polis a detené e hòmber yu di Kòrsou T.B. di 32 aña di edat na Gibraltar. Den e kaso di sekuestro akí a detené anteriormente 11 sospechoso di kua algun entretantu a rekobrá nan libertat.
E otro detenshonnan ku polis a hasi ta den e kasonan di asesinato ku a tuma lugá den Penstraat i den Bloksteeg i e kaso di atrako ku a tuma lugá den Oosterbeekstraat. E kasonan akí tambe a produsí un gran kantidat di sospechoso ku polis a detené resientemente. Den e kasonan di asesinato e komersiantenan Nanick Daryanani i Pim Timmermans a bira víktima.
Na e momentunan akí no ta konosí eksaktamente kuantu sospechoso a detené na total ni tampoko kuantu di nan a rekobrá nan libertat.

WILLEMSTAD – Kasi tur e sospechosonan ku polis a detené últimamente ta detené ainda. Mayoria di nan a presentá dilanti di wes komisario ayera i djarason i a prolongá nan detenshon. Entretantu a detené e sospechoso mayó den e kaso di sekuestro ku a tuma lugá dia 10 di yüli último.
Polis a informá entretantu di detenshon di e hòmber kolombiano J.M., ku a tuma lugá ayera mèrdia den un kas na Monteverde. Ta konsiderá e sospechoso komo esun ku a traha e plan pa e sekuestro di e komersiante Walid Ghazal Omeis. Ku su detenshon polis ta bisa, ku e kaso akí ta kasi kompletamente solushoná. Pa loke ta trata e kaso di asesinato di e komersiante Daryanani, polis ta kere ku nan tin e sospechoso mayó tambe detené. Esaki ta nifiká ku e kaso akí tambe ta práktikamente solushoná.
Tambe polis ta kere ku nan a solushoná tambe e kaso di asesinato di Pim Timmermans. Esaki ta e kaso ku a tuma lugá den Penstraat. Finalmente tin e kaso tambe di tiroteo ku a tuma lugá na Oosterbeekstraat. Den e kaso akí tambe polis a detené diferente sospechoso.

WILLEMSTAD – E kaso den korte ku Marcel Pinedo a entamá via di su abogado Marius Römer lo keda tratá djaweps 17 di yüli pa mitar di diesun di mèrdia. E kambio aki a presentá, despues ku direktiva di Brasami a pidi korte algun dia pa nan tèrminá nan dokumentonan ku nan ke presentá den korte. Manera ta konosí ku direktor di Brasami Marcel Pinedo a entamá un kaso sumario kontra direktiva di Brasami pa su rehabilitashon na e puesto ku el a bin ta okupá pa kasi dies aña kaba.
Un problemátiko entre e direktor i direktiva a surgi, ku a pone Marcel Pinedo no aktivo i ku a keda alargá ku mas tempu a hasi ku Pinedo a buska un ofisina di abogado pa buska su derechinan. E direktiva di Brasami ta den investigashonnan rondó di maneho di Marcel Pinedo, miéntras ku ya direktiva lo mester a violá sierto palabrashonnan ku tabatin ku Pinedo.
Den promé instante a bisa Pinedo, ku ta pa un luna di tempu, pero e investigashon ta tumando lugá i ta purbando di tur manera pa logra ku e direktor lo no ta na trabou durante di e investigashon pa no stroba e desaroyo di esaki. Den un komunikado anterior, e abogado di Marcel Pinedo Marius Römer a mustra, ku e kaso den Korte ta pa obligá direktiva di Brasami rehabilitá Pinedo na e funshon di direktor. Tratamentu di e kaso mester tabata awe, pero direktiva di Brasami a pidi korte algun dia pa tèrminá nan dokumentu, pa mustra riba e importansia ku e direktor no por ta na trabou, miéntras ku e investigashonnan ta tumando lugá. Korte a disidí ku e kaso lo keda tratá riba djaweps 17 di yüli pa 11.30 (mitar di diesun) di mèrdia.

WILLEMSTAD – Famia Claret no tin pensá di entregá i lo sigui ku su kaso di entrada “inhustu” di outoridatnan, te ora bin un klaridat. Awe mainta un biaha mas miembronan di e famia a presentá na Ministerio Públiko ku un keho. Nan kier un kontesta por eskrito di Ministerio Públiko riba e investigashon ku e kaso den e kaso aki.
E kaso di entrada di Sero Toleransha dia 11 di mart último den kas di e famia na Wishi/Marchena a kousa bastante interogatorio, no solamente serka e famia, pero tambe serka otro famianan. E pregunta ku a kore manera un liña kòrá den e kaso aki ta, ki ora outoridat por drenta den kas di un hende si òf no i despues hasi manera nada no a pasa. E famia ta insistí ku e ta bibando un bida drechi i e no por ta parti di ningun sospecho. Outoridatnan por lo general ta bisa, ku semper por tin e tipo di e entradanan aki ku ta tuma lugá. E entrada na e kas di e famia tabata enkabesá pa Sero Toleransha dirigí awendia pa e kontroversial inspektor Abrahams.
Frederik Claret, kabes di e famia a bisa LA PRENSA awe mainta, ku pronto lo duna tur detaye di loke nan a pasa aden te awor, for di despues ku nan a hasi e denunsia na mart último. El a ripití ku lo sigui e kaso te na final, si ta nesesario te den korte.
Informashonnan ku LA PRENSA a haña ta hasi menshon i e hecho, ku na mei último, Ministerio Públiko a manda yama e famia pa un reunion. E famia a bai ku su abogado. Den e reunion ei fiskal De Jong a indiká kaba, ku no ta mira motibu pa mas investigashon. E famia i abogado a pidi pa nan haña kopia di e prosèsverbal. A dura un poko esei a yega serka e famia. Ta a base di esei a persistí pa un investigashon. Claret no kier a bai den detaye riba e prosèsverbal di e investigashon ku a traha di e kaso aki, pero el a bisa ku ta un dokumentu di apénas dos página ku un kontenido di “ko’i hari”. “Nos si no ta konsiderá e kaso aki ko’i hari. E ta tur serio ku tin, sigur konsiderando e trouma ku nos a pasa aden”, asina e la ripití awe mainta.

WILLEMSTAD – Leinan sivil di nos paisnan ta bisa, ku asina un persona hasi deklarashonnan ku por ta ofensivo pa un otro persona i asta por kondusí na daña su bon nòmber i integridat, ta algu kastigabel pa lei. I aparte ku e persona en kuestion por hasi un keho na Ministerio Públiko a base di e asina yamá “Lastersmaadschrift” pa ofensa ku ta hasi ku e por kuminsá ku un proseso sivil pa obligá esun kulpabel na difamashon pa rektifiká públikamente e loke a keda tresé dilanti.
Esaki tabata e promé deklarashonnan di abogado Gelmer Pieter na LA PRENSA.
Den un entrevista telefóniko ku abogado Pieter, el a splika LA PRENSA, ku na momentu ku tin un deklarashon ofensivo i e keda publiká, e ta bira aun mas kondenabel, na momentu ku e kontenido no ta basa riba realidat, asta ku den sierto kasonan kaminda e kontenido lo por tin algu di bèrdat den dje. Abogado Pieter ta sigui informá LA PRENSA, ku un wes imparsial lo tin ku husga, ku si tabata nesesario pa a publiká e relato en kuestion ku mas ainda e wes lo bai husga ku e intenshon pa publiká e relato tabata unu ofensivo pa e persona ku hasi e demanda.
Abogado Gelmer Pieter ta indiká, ku den kaso di Hero Brinkman lo bai tin indudablemente diferente reakshon kontra di su publikashonnan i ku e chèns ta grandi den un òf mas di e personanan ku aparesé riba e lista di Brinkman lo hib’é korte. Esaki sigur na momentu ku Brinkman ninga di rektifiká e deklarashon ofensivo hasí. Mas aleu mester mira, ku for di e punto di bista basá di loke a keda publiká, di tin tur indikashon ku Brinkman a aktua konforme di informashon digital ku a yega na su persona.

WILLEMSTAD - Gobièrnu a tuma e desishon ku e ta destruí e nombramentu di Gerrit Schotte komo hefe di Facilitaire Zaken na servisio DROV. Esei ta loke abogado di gobièrnu a partisipá ayera durante tratamentu di e kaso den korte.
Ku esaki por bisa ku a yega un fin tambe na e disputa riba e kaso aki.
Despues ku el a baha komo kolaboradó di diputado (Charles Cooper, red) na 2007, e Bestuurscollege di e tempu ei a nombra Schotte den e funshon ya menshoná na DROV, un desishon ku a okashoná bastante desgustu, malkontentu pero tambe indignashon serka empleadonan di DROV.
E indignashon ta mas grandi ainda, si konsiderá ku ya kaba tabatin un funshonario na DROV mes, Sharine Mongen ku tabatin e promesa ku ora e persona aktual baha ku penshun, ku e lo haña e funshon ei.
Ku nombramentu di Schotte, e menasa tabat’ei ku e lo haña e funshon ei mas, motibu tambe ku el a entamá e kaso den korte.
Mester bisa, ku e kaso a dura un eternidat. Tabatin diferente seshon kaminda wes a purba haña un solushon pafó di korte, pero no a logra den esaki. Inkluso t’asina ku durante kuminsamentu di e kaso den korte, sierto momentu e abogado di gobièrnu a insistí ku no tin un nombramentu di Schotte na DROV, un anunsio ku a okashoná hopi strañesa serka tur hende. Pero, e abogado despues mester a revoká e ponensia aki, ora a sali na kla ku debidamente ta eksistí un dekreto ku ta regla nombramentu di Schotte.
Ayera abogado di gobièrnu a anunsiá ku Bestuurscollege un dia promé a tuma e desishon ku ta revoká e nombramentu di Gerrit Schotte na DROV. Esaki ta nifiká, ku a habri kaminda atrobe pa Sharine Mongen por haña e puesto di hefe di Facilitaire Zaken.

WILLEMSTAD – Deurwaarder a presentá na boka di trabou resientemente di diferente suidadano, pero pa algu ku ta nobo: beslag riba salario pa forsa pago di but. Prokurador-General di Antia Dick Piar a konfirmá ku Ministerio Públiko a kuminsá ku e trayekto aki pa asina fòrsa e suidadano kumpli ku su obligashon.
Awor aki t’asina ku ora un hende haña un but, e por paga esei mesora. Pero den e kaso ku e warda e kaso bai Korte i Korte duna un veredikto ku bira definitivo, e hende mester paga. Ta resultá ku no opstante esei tin hende no por òf no kier paga. Nan ta haña diferente aanmaning i tòg nan no ta kumpli. Semper ta posibel yega na un areglo di pago, pero tin hende ta pèrsistí den nan aktitut pa no paga. “Den e kasonan ekstremo, nos ta manda deurwaarder na nan boka di trabou”, asina Piar a bisa. Si e hende no ta trahando òf si e hende ta malu, por yega na situashonnan kaminda por eksonerá e hende di pago te ora su situashon mehorá.
Riba e pregunta di kon a skohe pa e sistema rígido aki, Prokurador-General a bisa ku a kuminsá ku e trayekto aki pa evitá ku mas i mas hende ta bai prizòn. Awor aki ora un hende sin paga su but, e por bai pariba pa e kantidat di dia ku e but a kosta. Pa kada 25 florin, un hende tin ku bai sinta un dia. Ku e kantidat di but ku ta partiendo, ta lógiko kere ku por bai sera tur hende.
Pa loke ta trata e kobransa di but, Prokurador-General a bisa ku den 2006 a kobra 737.851,62 florin i na 2007 461.537,31 florin. Den e promé tres lunanan di e aña aki a kobra 104.586,38 florin di but. Ta bon pa bisa ku e kantidat di but kobrá den un aña no ta but di e aña so, pero parti di dje ta di un òf mas aña promé.

WILLEMSTAD, - Tres hòmber ku tabata enbolbí den e kaso di tiramentu na e sentro nokturno El Hombre na Spijkenisse, a haña 6 aña di kastigu di prizòn. Esei ta sentensia di Korte relashoná ku e kaso aki, den kua tabatin yu di Kòrsou enbolbí. E kaso a hala basta atenshon dia el a tuma lugá.
E kaso a tuma lugá dia 10 di ougùstùs aña pasá. En total 5 persona a resultá heridá den e tiramentu aki ku a tuma lugá den e bar ku yama El Hombre na Spijkenisse.
E hòmber ku nan ta konsiderá esun ku a inisiá e tiramentu, Vernon P., a kana drenta e bar den kareda di mei anochi.
Segun su mes vershon, e tabatin intenshon di bai kumpra sigaria den e sentro nokturno, pero ora el a drenta, el a konstatá ku tabatin e dos personanan sintá, Drem G. i Nadyen I. den e sentro.
P. ku aparentemente no a konfia e kos a saka su arma di kandela i a kuminsá tira. E dos otro akusadonan a kontestá e tiramentu. E dos akusadonan aki den pasado a yega di bati P. pa mata i nan a hòrta un kadena di oro for di dje.
Aparentemente P. a kuminsá tira manera hende loko, heridando 6 persona. Un di esnan heridá, un hòmber di 39 aña ku ta biba na Spijkenisse mes, por a bai kas e mesun anochi despues di a risibí tratamentu. Di e 4 heridonan ku a keda interná, dos otro tambe a bai kas den e fin di siman despues.
Manera indiká kaba, e hòmber a kuminsá tira kasi pa loko, pero su tiramentu a ser kontestá pa un persona ku tabata den e bar e momentu ei.

WILLEMSTAD – Outoridatnan di Salú Públiko di Antia a anunsiá un prohibishon pa importashon di komestibel ku tin etikètnan ku idioma straño. E etikètnan ku ta splika e produktonan mester ta na papiamentu, ulandes, ingles òf spañó, asina Inspekshon di Salú Públiko a informá awe. Otro etikètnan no ta kumpli ku lei antiano.
Pa basta tempu tin un inkomodidat den komunidat relashoná ku importashon di un gran kantidat di produkto djafó den idioma ku niun hende no ta komprondé. Esei ta konta por sierto no solamente pa komestibel pero tambe pa otro produktonan, manera píldora di vitamina òf pa tene peso abou. Inspekshon di Salú Públiko ta bisa ku e tambe a konstatá ku ta inundá merkado di Antia Hulandes últimamente ku komestibel ku no ta kumpli ku e reglanan preskribí den lei di etikèt.
“Regularmente ta konstatá presensia di produktonan ku nan etikèt ta na un otro idioma for di ulandes, papiamentu, ingles òf spañó, miéntras ku lei ta preskribí ku tur indikashon òf splikashon menshoná riba e etikèt mester ta den un di e idiomanan menshoná. Esaki ta pasobra e konsumidó tin e derecho pa haña tur informashon riba kontenido i uso di e komestibel ku e ta kumpra den un idioma ku e por komprondé”, asina Inspekshon di Salú Públiko ta bisa.
Ta resultá ku den último lunanan kòntròl intensivo di Duana i GGD Kòrsou a kondusí na sakamentu for di merkado di vários komestibel, pa motibu ku nan no tabata kumplí ku loke lei ta stipulá. P’esei ta urgí tur importadó, bendedó i rebendedó pa importá i/òf bende solamente produktonan ku nan etikèt ta skibí na ulandes, papiamentu, ingles i/òf spañó. Esaki por evitá situashon i konsekuensia ménos agradabel ku pèrdida finansiero, asina Inspekshon di Salú Públiko ta bisa.