WILLEMSTAD – Diputado di Asuntunan Ekonómiko i di Turismo, Eugène Rhuggenaath a anunsiá, ku na novèmber awor e lo presentá loke el a yama un Vishon Ekonómiko pa e periodo 2009-2026 pa Kòrsou. E bishita ku el a hasi resientemente na Ulanda den kompania di un tim di eksperto tabata hustamente pa atendé diferente elemento di e plan aki. Na Ulanda entre otro tabatin un enkuentro ku minister pa Asuntunan Ekonómiko Maria van der Hoeven. E intenshon ta pa diskutí e vishon aki ku tur gremio den nos komunidat ku e ophetivo pa yega na un vishon definitivo, bon studiá i ankrá den nos komunidat pa garantisá un mihó bienestar pa nos futuro, asina e diputado a informá despues di su bishita na Ulanda.
E meta di e bishita na Ulanda den yüli último tabata pa ampliá, kompartí i generá informashon valioso pa ku e vishon ekonómiko nobo pa transformá Kòrsou den un Siudat Portal Ulandes Karibense, “Dutch Caribbean Portal City (DCPC)”, maksimalisando e desaroyonan posibel den e diferente sektornan (tradishonal/nobo) ku tin e potensial pa realisá esei. No opstante ku e vishon ekonómiko nobo ta pa largu plaso, a tene debido kuenta ku e inisiativa soshal ekonómiko (SEI) pa asina optené un sinkronisashon den e dos manehonan aki. Den e kuadro aki tambe mester yega na un koperashon ku Ulanda ku e enfoke pa sigui kultivá e sektornan tradishonal, pero tambe pa desaroyá e sektornan nobo/moderno i asina realisá un Desaroyo Ekonómiko Duradero (“Duurzame Economische Ontwikkeling – DEO”). E koperashon ku Ulanda por konsistí di interkambio di e.o. ekspertonan, konosementu i eksperensia di instansianan establesé na Ulanda, aunke ku ta nos propio ekspertonan tin ku formulá tantu e vishon komo e maneho pa garantisá e desaroyo ariba menshoná, asina e diputado a bisa.

WILLEMSTAD - “Ami a kere semper ku e aktual gobièrnu, partikularmente un partido ku semper ta pretendé di ke kaba ku kosnan tradishonal ku no ta kumbiní e pais aki, lo no praktiká loke nos konosé komo nepotismo mas. Pero mi mester konstatá, ku nepotismo ta mas grandi ku nunka den kompanianan di gobièrnu,” asina Gregory Damoen a bisa, relashoná ku e desaroyonan na Curoil.
Partidonan di oposishon a pidi un reunion públiko riba desaroyonan na e kompania Curoil. Esnan ku a firma e petishon ta Forsa Kòrsou, MAN i Niun Paso Atras.
Ta konosí, ku Konseho Insular di Kòrsou, ketu bai ta ku resès, pues no ta muchu kla ainda si gezaghèber lo konsiderá e asuntu aki di tal importansia, ku e ta dispuesto pa kibra resès i konvoká un reunion tòg.
Gregory Damoen a bisa, ku loke a sosodé na Curoil, kaminda tabatin negoshi den negoshi, ta simplemente inaseptabel.
“Pero tin un faktor mas importante ainda: nos no sa si loke a sosodé, no tabatin influensia riba e preis haltu ku pueblo ta paga aki ‘fo pa energia. Ta bale la pena analisá esaki i p’esei nos tambe ta boga pa un investigashon profundo,” asina ela bisa.
Damoen a mustra, ku e ke bai un paso mas leu: nos ta na fabor pa hasi un investigashon den tur kompania di gobièrnu, no solamente e kompania Curoil, el a bisa.
Pa Damoen, ta inkreibel tuma nota kiko ta pasando na e kompania. “Awor nos a bin tuma nota, ku a nombra miembronan di famia den e kompania i den Hunta di Komisario. Nos ta haña nos ku un diputado ku ta rekonosé abiertamente ku ta su famia el a hinka den e kompania. Nan ta biaha den ambiente di luho, nan ta keda na e hotèlnan di mas karu i sofistiká ku tin, anto pueblo ta sigui sufri. Ta esaki ta e ehèmpel di nepotismo di mas grandi ku nos por a konosé,” segun Damoen.

WILLEMSTAD – “No mester wak hende den e kaso aki. Laga nos wak i konsentrá riba futuro di e kompania Curaçaose Dokmaatschappij, CDM pasobra e ora ei nos ta haña un solushon”, asina diputado Eugène Rhuggenaath a bisa, na bispu di e reunion krusial pa nombra un direktor nobo pa e kompania.
Djabièrnè awor tin e reunion krusial pa tuma desishon riba un direktor nobo pa e kompania. Diputado Eugène Rhuggenaath a enfatisá ku su punto di bista a keda mesun kos.
Diputado Rhuggenaath no ta di akuerdo ku e kandidato ku awor aki ta riba mesa pa bira direktor di Curaçaose Dokmaatschappij.
Rhuggenaath, a pone un posishon skèrpi, esta ku e kandidato mas fuerte te ku awor Franklin “Chebu” Sluis, no ta aseptabel p’e debí na su pasado ku ta manchá ku un kondena di korte pa aktonan froudulento ku el a kometé.
Banda di esei, Rhuggenaath ta haña ku e kandidato aki no ta disponé di e konosementu nesesario di mundu naviero.
Rhuggenaath a ripití e posishon aki na diferente okashon den pasado i ketu bai ta para riba su punto ku e ta konsiderá un punto di prinsipio.
Rhuggenaath mes a lansa un proposishon pa sali for di e impase aki. El a proponé pa nombra un direktor interino ku e tarea spesífiko pa trese e kambionan nesesario den e kompania i pone e empresa aki riba e kaminda di progreso i kresementu atrobe. E direktor interino aki lo mester keda pa un tempu definí, despues di kua ta nombra un direktor definitivo.

WILLEMSTAD - Ami no tin mas tempu di dediká na e asuntu aki. Mi ke keda konsentrá riba desaroyonan positivo pa pais, asina promé minister di Antia Emily de Jongh-Elhage a bisa, komo reakshon riba e kaso kaminda a krea duda riba funshonamentu di Raad van Advies.
Lider di Partido Demokrat a kousa hopi konmoshon, na momentu ku el a anunsiá ku e ta disponé di informashon ku Raad van Advies promé a traha un konseho negativo riba institushon di un Kolegio pa Supervishon Finansiero pa Antia, Kòrsou i St. Maarten i ku despues a kambia esaki, riba preshon di gobièrnu antiano.
George ademas ta insistí ku e posishon di un dje miembronan di Raad van Advies, profèsòr Frank Kunneman ta kuestionabel. E figura aki tin diferente pèchi. E ta traha pa gobièrnu, pa diferente kompania di gobièrnu kaminda klaramente por konstatá konflikto di interes, segun George, ku ta haña ku pa e motibu ei mes, e no por okupá e funshon den e kolegio ku ta asesorá gobièrnu.
E deklarashon aki a okashoná hopi spekulashon den komunidat, si esaki ta basa riba bèrdat òf no.
Norbert George mes a duna gobièrnu inisialmente un siman di tempu pa sali prueba ku loke el a bisa no ta bèrdat, sino e ta presentá e dokumentonan korespondiente.
Gobièrnu na su turno a reta George pa no warda un siman largu, pero presentá e pruebanan ku e ta bisa ku e tin, mesora.
E tema aki a keda den un ambiente di ken finalmente ta papia bèrdat.

WILLEMSTAD - No ta pòrnada, nos a disidí di apelá e sentensia den kaso di rekonosimentu di e pareha homoseksual. Nos ke sa eksaktamente, kiko ta nos derechinan den Reino, kiko nos mes por atendé i kiko nos no por, asina minister di Enseñansa Omayra Leeflang a bisa, reakshonando riba entre otro komentarionan di su kolega minister ulandes Ronald Plasterk.
Minister di Enseñansa Ronald Plasterk ta konfia den hustisia. Mi tin tur konfiansa den korte di apelashon, ora e kaso bai dilanti, asina Plasterk a bisa, relashoná ku e desishon di gobièrnu antiano (lesa: minister Omayra Leeflang) pa apelá e sentensia ku mester sigurá un pareha homoseksual na Bureau Ziektekostenvoorzieningen, BZV.
E asuntu aki ketu bai ta tópiko di atenshon i diskushon den komunidat, tantu aki na Antia komo tambe na Ulanda mes.
Minister Plasterk a bisa ku no mester lubidá ku Statüt ta ofresé garantia tambe riba e tereno aki.
Artíkulo 40 ta bisa bon kla, ku tur derechi atkerí den un parti di Reino, mester konta pa otro partinan di Reino tambe. Den e kaso aki, un matrimonio ku a sera na Ulanda, ta konta igual na tur otro parti di Reino, o sea ku e ta konta tambe pa Antia.
Segun Plasterk, e tin tur konfiansa den hustisia, ora e kaso aparesé atrobe den korte próksimamente. E konosido abogado mr. Gerard Spong, den un komentario ku ta mustra poko rèspèt pa nos mandatario antiano a bisa tekstualmente ku “e minister ta papia manera un galiña sin kabes”, indikando ku supuestamente e minister ta papia manera lora.

WILLEMSTAD - Gobièrnu a konstatá ku tin abusu a bin ta tuma lugá ku transporte eskolar. Anto den kuadro di mas efisiensia i ménos desperdisio,gobièrnu mester tuma desishon pa yega na un maneho mas transparente i ku ta kumpli ku normanan di bon maneho, asina diputado Marilyn Alcalá-Wallé a deklará.
Esei mes ta motibu di kon Bestuurscollege a bai di akuerdo ku e kriterionan nobo pa un famia bin na remarke pa haña transporte eskolar.
Transporte eskolar ta tópiko di hopi diskushon último dianan. Mayornan ta rabia i preokupá kon nan yu ta yega skol aki un siman ora skol habrí atrobe, e sindikato SITEK a konsiderá ku mester evaluá tur kos di nobo i tin vários persona òf instansia mas ku a ekspresá nan mes kontra e intenshon di gobièrnu.
Algun miembro di Konseho Insular tambe a hasi pregunta al respekto.
Miembro di Konseho Insular Hensley Koeiman ta un di esnan ku a hasi pregunta i a bisa ku e no por kaba di komprondé e forma di aktua di gobièrnu den e kaso aki.
Koeiman tabata referí aki na e desishon di gobièrnu di Kòrsou pa kòrta den gastu di transporte eskolar, ku a subi den forma alarmante.
“Mi por komprondé ku mester tuma medida. Pero mester a warda te awor ku skol ta bai kuminsá, pa anunsiá esaki? Nos tin un kantidat di mayor ku ta konfuso i ku no sa kon nan ta bai hasi,” asina Koeiman a splika.
Koeiman a mustra ku ta un hecho ku aña eskolar masha hopi biaha ta kuminsá ku problema. Problemanan manera skol kaminda no tin sufisiente maestro, skol ku tabata den rekonstrukshon pero ku no a keda kla na tempu, problema ku unifòrm i tambe skol ku vandalistanan a laga den un estado kaminda no por duna lès.

WILLEMSTAD – “E promé indikashonnan ta mustra ku tin bon posibilidat ku tin gas den e awanan rondó di nos islanan. Nos ta optimista, pero nos ta alabes un poko kouteloso ainda”, asina promé minister di Antia Emily de Jongh-Elhage a anunsiá.
Manera ta konosí, University of Texas a hasi un sondeo i análisis pa weta si tin petroli i gas natural den nos awanan teritorial.
E asuntu aki tin un istoria su tras. Tabatin masha konmoshon dia a bira konosí ku gobièrnu ta bai laga investigá e posibilidat di zeta i gas den nos supsuela.
Partidonan di oposishon – partikularmente partido MAN – e tempu ei a kuestioná e intentonan severamente i a denunsia ku henter e asuntu ta rondoná pa sekresia.
Gobièrnu Sentral a sali i splika e tempu ei, ku loke Antia ta mek riba dje ta un barku ku ta hasi investigashon sismológiko ku pa kasualidat tabata den nos serkania. Di e forma ei lo a sali Antia muchu mas barata ku si mester a kontratá e barku aki for di un otro sitio.
Entretantu e situashon ei tambe a kambia i a laga University of Texas hasi e sondeonan en kuestion.
E promé indikashonnan ta alentador, segun e promé mandatario di Kòrsou. El a bisa sinembargo di no ke bai den detaye riba loke ta riba mesa.
Minister De Jongh-Elhage a bisa ku e ta preferá di warda e detayenan di e investigashon, te na momentu ku a informá Staten ofishalmente. Parlamentu, manera ta konosí ta ku resès e dianan aki i lo regresá na trabou aki un par di siman.

WILLEMSTAD - Gobièrnu Sentral debidamente ta trahando ku e diligensia nesesario riba introdukshon di e lei di sueldo mínimo ku parlamentu a aprobá resientemente. Pa gana tempu, a disidí por ehèmpel ku ta manda e lei pa konseho pa Raad van Advies, huntu ku otro instansianan, asina promé minister di Antia Emily de Jongh-Elhage a anunsiá ayera tardi.
Manera ta konosí, Gobièrnu Sentral, Gobièrnu di Kòrsou i partnernan sosial a reuní e siman aki riba un pakete di medida ku mester kompañá e lei di sueldo mínimo.
Un aña i mei pasá, parlamentu a bin ku e lei pa subi sueldo mínimo.
Nos tur ta kòrda e historia di e intenshon pa subi sueldo mínimo, segun e promé minister.
Promé t’asina, ku gobièrnu di Kòrsou a proponé pa subi sueldo mínimo ku 5 porshento, pendiente un pida maneho ku el a keda di formulá. Despues minister di Ekonomia Elvis Tjin Asjoe a lansa e idea pa oumentá sueldo mínimo ku 18 porshento, pero pa hasi esaki den fase.
A pidi Banko Sentral un konseho, mirando e diferente deseonan ku tabatin riba mesa. Banko Sentral a rekomendá un oumento di 8 porshento, argumentando ku ta esei ekonomia por karga.
E punto ta, segun promé minister De Jongh-Elhage ku tur hende tabata ke pa e oumento bira mas tantu posibel.
E desishon definitivo pa gobièrnu a bin despues di e rekomendashon di Fondo Monetario Internashonal. E instituto aki a rekomendá 15 porshento, pero a rekomendá tambe pa papia ku partnernan sosial riba e pakete ku mester kompañá esaki.

Komishon di Mayornan Omega College lo sigui mobilisá kontra desishon di minister!


WILLEMSTAD – Komishon di Mayornan ta kondená e forma ku minister Omayra Leeflang a atendé ku e delegashon ku a yega na Konseho di Ministernan awe mainta, mustrando ku esaki no ta un forma pa un mandatario purba di resolvé un problema. Komishon di Mayornan ta konsiderá, ku minister Leeflang a harma su propio shou, na momentu ku a sali pa evitá 3 studiante i prensa huntu ku su delegashon di Departamentu di Enseñansa i ninga di skucha mayornan preokupá.
Den kombersashon ku bosero di Komishon di Mayornan, Ludtmila van Eps a deklará na LA PRENSA ku un biaha mas minister Leeflang ke demostrá ku no tin niun hende ku por bis’é nada. Por konkluí ku pa e aktitut di minister Leeflang Komishon di Mayornan lo sigui mobilisá i buska nan derechi pa ser skuchá. E intento di Komishon di Mayornan pa haña atenshon di promé minister, no a logra, debí ku e último aki tabata den un reunion i a primintí di drenta den kontakto despues ku Komishon di Mayornan.
Segun Ludtmila van Eps ta duna di konosé, ku e ruman muhé di promé minister tabata esun ku a sali pa papia ku e delegashon, mustrando ku nan bishita tabata no anunsiá i ku ta bira imposibel ku por haña e promé minister. Ruman muhé di e promé minister a tuma nan karta, pendiente di un yamada ku lo drenta. Di otro banda LA PRENSA a komprondé, ku minister Leeflang lo a bai paden ku tres studiante i prensa pa harma su propio shou den kompania di funshonario di departamentu.

E ta pone tur esnan ku sostené kualke desishon personalmente responsabel: 

WILLEMSTAD – Despues di un periodo di trankilidat relativo, e situashon na Selikor a bolbe bin bèk den publisidat ku tur intensidat awor ku a bira konosí ku diputado Humphrey Davelaar a presentá un proposishon na Hunta di Komisario di Selikor pa eliminá e funshon di direktor, alabes direktor general suplente di e kompania. Por sierto ku LA PRENSA tin informashon, ku no ta tur hende den e Hunta di Komisario ta di akuerdo ku e sugerensia aki. Tin por lo ménos dos miembro ku LA PRENSA ta na altura di nan posishon ku e trabounan na e kompania a bira demasiado pa un direktor so. Di tur manera Asjes, ku a haña un nombramentu kontroversial komo direktor athuntu na e kompania, ta insistí, ku no por trese niun kambio, tanten ku e proseso den e kaso no konkluí. El a atvertí esnan ku trese kambio tòg ku e lo pone nan personalmente responsabel pa nan desishon.
T’asina ku Asjes 4 luna pasá a entamá un kaso (‘derdenverzet’) kontra e veredikto den e prosedura di fondo ku 6 trahadónan di Selikor a kuminsá kontra STIP i Selikor. Asjes mes no tabata partido den e prosedura aki. Na su opinion e veredikto di 11 di febrüari 2008 no ta konsistente i mas bien ta basá riba redashi. “Ta bon pa klarifiká ku ta den solamente un di e diferente kasonan enkuanto mi nombramentu na Selikor mi mes tabata partido i ku Korte di Hustisia a konfirmá den su veredikto di 19 di yüli 2007 ku mi nombramentu komo direktor na Selikor tabata kompletamente legal”. Segun Asjes, e proposishon di diputado Davelaar di partido Nashonal pa awor di ripiente kambia statutonan di Selikor i eliminá e funshon di e segundo direktor ta un strategia polítiko di mala fe, p’asina sera kaminda di Asjes pa por asumí un puesto den Selikor si e gana su kaso den Korte. “Ta tristu i sensurabel ku hende ta dispuesto pa sigui tapa mal maneho i inefisiensia den Selikor pa djis protehá i kuida interesnan finansiero ‘importante’ di famia i amigunan polítiko (‘friends and family’). Konstantemente Pueblo tin ku tende ku no tin plaka pa aliviá nos hendenan ku ta biba den pobresa i miseria. Sin embargo, sin eskrúpulo, ta permití Selikor si pa 12 aña largu gasta mas ku 50 mion florin di Pueblo sin tene un destaho públiko. Te awe ni diputado Davelaar ni su partido ku nan boka yen di ‘good corporate governance’ nò a bin splika Pueblo dikon, aña den aña afó, ta permití gerensia di Selikor dispidí miónes di Pueblo pa duna kontratonan lukrativo na algun kompania en bes di yuda hóbennan desempleá ku tambe por hasi mesun trabounan aki”. Asjes a alertá finalmente tantu miembronan di Hunta di Komisario di Selikor i tantu Kolegio Ehekutivo, Konseho Insular komo STIP pa no laga usa nan pa sostené e strategia polítiko di diputado Davelaar i enfátikamente el a deklará ku e lo hasi uso di tur medionan na su disposishon pa pone kada un di e kómplisenan den e strategia di mala fe aki personalmente responsabel pa nan aktonan.