WILLEMSTAD – Un tim grandi di diferente departamentu hudisial i polisial a tene un akshon grandi awe mainta na Soto. Informashonnan akumulá dor di e info-desk di polis a resultá den un akshon konhunto.
E área di Soto, ku ta kubri entre otro e konosido ‘hanchi buriku’, ta un área ku polis ta masha kouteloso pa atendé kuné debí na e tantísimo tipo di krímen ku ta tuma lugá einan. Sinembargo polis i hustisia a disidí ku no ta laga e situashon keda manera e ta, i awe mardugá a bishitá e Bario i a drenta den 15 diferente kas. Despues di a listra tur kaminda i a konfiská entre otro algun mata di mariwana, a detené tambe 5 persona sospechá di ta metí den aktonan kriminal.
Polis mes no a saka un relato den kua nan ta splika kiko eksaktamente a konfiská i kuantu hende a detené ofisialmente.

WILLEMSTAD – Polis a detené por lo ménos 33 hóben menor di edat den e promé 7 lunanan di e aña akí pa diferente tipo di krímen. Di e kantidat akí a detené 9 den e último 2 lunanan, sospechá di ta envolví den sea asesinato, atrako, poseshon di arma di kandela ilegal i/òf sekuestro.
E 33 detenshonnan akí ta trata di hóbennan entre 14 aña i 21 aña di edat. Un hóben ta bira ‘handelingsbekwaam’ na momentu ku e hasi 18 aña di edat. Esaki ta nifiká ku for di e momentu ei e por kuminsá firma i ta bira responsabel pa su aktonan. Sinembargo ta te ku su 21 aña di edat e ta bira mayor di edat (meerderjarig). No mas ku ayera nochi un hóben di 16 aña a asesiná un otro hóben di 17 aña di edat.
E kaso tristu akí a tuma lugá den e bario Juan Domingo ayera nochi 9’or. Polis mes no a duna ningun detaye di e suseso, pero tin vershon ta indiká ku e víktima, Roly Sambo (17), lo a bai buska un baiskel na un kas den e bario mes. Na e sitio a surgi un tiramentu i un bala a heridá e víktima mortalmente. Polis a informá ku na e sitio mes nan a detené e hóben J.C. di 16 aña di edat komo sospechoso di e tiroteo. Tin vershon ta indiká ku e víktima no tabatin nada di aber ku e tiramentu, i ku ta na un mal momentu e tabata na e sitio. No ta konosí ta ken J.C. kier a tira.
E aña akí diferente hóben tabata envolví den kasonan di krímen pisá ku a kousa morto. Aña a habri ku asesinato di un hóben di 24 aña di edat. Polis a detené den e kaso akí e hóben R.H. (20). Algun dia despues e hóben J.C. (20) a asesiná su tata di kriansa, despues di a herid’é na su kabes ku un piki. Resientemente polis a detené e hóben H.M. (15) sospechá di ta envolví den e asesinato di Pim Timmermans. Tambe polis a detené e hóben F.P. (16) sospechá di a tira un dama ku un arma di kandela durante un atrako. Ta sospechá e hóben akí di ta envolví den e kaso di asesinato di Timmermans. Durante e detenshon akí polis a bai tambe ku e hóben S.R. (16) pa poseshon di dos arma ilegal. Algun dia despues a detené e hóben I.C. (19) sospechá di ta envolví den e kaso di atrako huntu ku F.P. I.C. lo a heridá un hòmber tambe ku un arma di kandela. Relashoná ku e kaso di sekuestro di e komersiante Omeis, polis a detené tambe e hóbennan J.L. (17) i L.R. (20).

WILLEMSTAD – Den 5 kaso serio di krímen di último dos lunanan, hustisia a detené un kantidat di 20 sospechoso. Ta trata di e asesinatonan di e komersiantenan Nanick Daryanani i Pim Timmermans, e atrako riba un dama bendedó di number, e sekuestro di e komersiante Walid Omeis i e disturbionan den Punda i Pietermaai.
Segun informashon ofisial di Ministerio Públiko, na e momentunan akí tin 6 sospechoso detené den e kaso di sekuestro di e komersiante Walid Omeis, 3 sospechoso den e kaso di asesinato di e komersiante Pim Timmermans, 2 sospechoso den e kaso di e komersiante Nanick Daryanani, 2 sospechoso den e kaso di disturbio den Punda i 2 sospechoso pa poseshon di arma di kandela. O.M. a konfirmá ku entretantu a laga dos sospechoso den libertat. Pa loke ta trata detenshon den e kaso di atrako na Oosterbeekstraat, O.M. no tabatin e detayenan na man awe mainta.

(1) Asesinato Daryanani

E kaso di asesinato di e komersiante Nanick Daryanani a tuma lugá den e mardugá di 25 pa 25 di mei. E suseso a tuma lugá den Bloksteeg den e negoshi di Internet di Daryanani. E tabatin un kusinchi mará ku waya di koriente na su kara. Den e kaso akí a detené dia 20 di yüni den un kas na Muizenberg e hòmber (1) M.P (37). Mesun dia a detené na warda di polis na Otrobanda e hòmber (2) H.E. (45).

(2) Asesinato Timmermans

E kaso di asesinato di Pim Timmermans, propietario di restorant La Rousse, a tuma lugá dia 16 di yüni na altura di su kas den Penstraat. Algun atrakadó a tir’é ku arma di kandela i herid’é mortalmente. Dia 9 di yüli polis a detené den un kas na Maastrichtstraat e hóben (3) H.M. di 15 aña di edat relashoná ku e asesinato di Timmermans.

WILLEMSTAD - Gobièrnu di Kòrsou lo bai studia e posibilidat atrobe pa studiantenan ku kaba nan estudio aki i ke sigui un estudio mas avansá, hasi esaki den un pais den nos region.
Esei diputado di Enseñansa Marilyn Alcalá-Wallé a konfirmá.
Den e dianan ku a pasa, un kantidat di entre 350 pa 400 hóben a bandoná nos isla rumbo Ulanda, pa sigui studia.
Esei a bira kustumber kaba pa basta aña. Mester bisa ku esaki no semper tabata asina. Un sierto kantidat di aña pasá, tabata eksistí e posibilidat pa studiantenan biaha pa eksterior (generalmente pa Ulanda) pa sigui avansá den nan estudio, pero kaminda tabata eksistí e posibilidat pa studia na entre otro Merka pero tambe Puerto Rico.
A stòp ku e posibilidat di studia den region, mirando e gastunan haltu ku tabata mara na un estudio asin’aki.
Pero entretantu e senario a kambia.
Gobièrnu di Kòrsou a bira konsiente di e hecho ku situashon no ta meskos ku ántes, segun diputado Alcalá-Wallé.
Un di e kosnan fundamental ku a kambia ta introdukshon di euro, na lugá di florin ulandes. Tempu di florin ulandes tabata posibel pa un studiante studia bou di sirkunstansia mas faborabel. Ku introdukshon di euro, studiamentu a bira hopi mas karu den un tiru.
Awor aki un euro ta alkansando 3 florin, ku ta un diferensha fundamental kompará ku tempu ku Ulanda tabata usa florin ulandes.
Pa e motibu aki entre otro, gobièrnu lo bai studia alternativanan den nos region, segun Alcalá-Wallé. El a menshoná den e konteksto aki ku gobièrnu ta pensando riba paisnan manera Merka, Costa Rica i Jamaica ku su University of the West Indies.

WILLEMSTAD – E kaso di atrako ku a tuma lugá ayera nochi riba Cubaweg, a laga un víktima gravemente heridá. E hòmber E.D. di 61 aña di edat aktualmente ta interná den un situashon krítiko den hòspital, segun polis a informá.
Tabata ayera nochi den kareda di 19.50 ora polis a risibí notifikashon di un atrako na un kantor di number riba Cubaweg. Ora polis a yega na e sitio nan a lokalisá e víktima ku tabatin un herida di bala na su barika. Segun investigashon ku polis a hasi na e sitio, e hòmber a hañ’é sorprendé dor di un atrakadó ku a eksihí plaka. Ounke polis no ta informá detaye di e suseso, tin indikashon ku e víktima a duna e atrakadó sèn, pero esaki a haña ku e tabata muchu tiki. Seguidamente e lo mester a reklamá e víktima ku e plaka ta tiki pa despues tir’é.
E kaso akí ta e di dos den apénas 1 luna, kaminda atrakadónan ta skohe kantor di number pa atraká. Resientemente un dama bendedó di number a bira víktima di un atrakadó. Den e kaso akí a detené algun hóben entre 15 i 17 aña sospechá di a tira e atrako. E atrakadó a tira riba e dama ku un arma di kandela i a herid’é na altura di su pechu.

WILLEMSTAD – Siman pasá Abogado-General di Antia mr. A.C. van der Schans a hura 8 tripulante di e barku Hr.Ms. Van Speijk i 11 kolaborador di Wardakosta di Antia i Aruba komo polis ekstra ordinario di Antia. E status di polis ekstra ordinario ta enserá, ku e personanan aki lo haña tareanan pa detektá violashonnan di lei i di supervishon den awanan di Antia. E barku Hr. Ms.Van Speijk por hasi tareanan di Wardakosta den forma independiente den awanan teritorial antiano. Esei ta nifiká, ku e barku por aktua den e zona di 12 mia for di kosta kontra transportenan di droga, imigrashon ilegal i violashon di reglanan di medio ambiente i piskamentu. E militarnan a sigui un kurso amplio, den kua a dediká atenshon pa e sistema estatal aktual, trahamentu di un prosèsverbal i legislashon ku ta relevante. Riba e pòtrètnan por mira e momentu ku e komandante di Hr.Ms. Van Speijk, teniente kapitan Peter Kwant ta hura. Tambe por mira Abogado General den kompania di e militarnan i e kolaboradónan di Wardakosta ku a presta huramentu.

WILLEMSTAD/ ORANJESTAD – Polis na Kòrsou a detené un polis di St. Maarten ku a tira riba su kolega femenino siman pasá. E polis di fam C. a bin Kòrsou pa tratamentu médiko despues ku e tiroteo a tuma lugá na St. Maarten. Ayera a detené na Kòrsou.
Tin indikashon, ku pa falta di bon komunikashon no a hasi e detenshon mas lihé. Despues di e tiroteo e polis a keda kana rònt durante 1 siman. Minsiter David Dick a anunsiá anteriormente, ku e lo pidi Prokurador General Dick Piar un splikashon i ta spera ku a atendé ku e polis segun instrukshonnan. Dick a bisa, ku mester trata e polis meskos ku lo a trata kualke hende ku a tira riba un otro.
E tiroteo segun rumornan ku ta sirkulá tin di aber ku un relashon amoroso ku e polis C. tabatin ku su kolega P. Tin indikashon ku C. a haña sa ku P. tabatin relashon ku un otro hòmber. Siman pasá C. a bai na kas di su kolega P., kaminda el a lòs un tiru riba e porta di kas. Niun hende no a resultá heridá den e kaso akí.
Despues ku e suseso a tuma lugá, e hefenan di C. no a atendé kuné i el a keda den libertat. Dado momentu e lo a biaha pa Kòrsou pa risibí tratamentu médiko. Ora esaki a bira konosí, su mes koleganan na St. Maarten lo a komentá e echo ku el a keda den libertat. E hefe interino di polis na St. Maarten, Richard Panneflek, ta bisa ku el a tuma e medidanan nesesario pa evitá ku erornan di komunikashon similar no ta tuma lugá mas den futuro.

WILLEMSTAD – Awe mainta pa 6’or, un empleado ku a yega na Pòmp di gasolin Djaoen na Tera Kòrá, a wòrdu atraká pa tres hòmber ku arma di kandela. Segun informashon di polis ta indiká, ku na momentu ku e empleado aki a yega, un hòmber a sali riba dje ku arma di kandela, miéntras ku e mes a purba di desviá di esaki. Den su desviashon ,otro dos mas a sali riba dje i pèrsiguí e hòmber aki i kita e kantidat di plaka ku tabatin den poder.
Den kombersashon ku bosero Reggie Huggins ta konfirmá, ku e hòmber atraká tabatin un kap basta grandi na su kabes di e sla ku e arma di kandela. E kap aki ta produkto di e arma di kandela ku a usa, di manera ku e tres atrakadónan por a kita e plaka for di e empleado aki. Despues ku nan a kita e suma di plaka aki, e hòmbernan a disparsé i ku no tin indikashon kon nan huida tabata. Polis no ke divulgá e kantidat di plaka, pero ta mustra, ku no ta trata di un kantidat grandi. E investigashon ta den man di Tim di Atrako, pa logra pone man riba e tres hòmbernan ku den ora di 6’or di mainta a kometé e atrako armá aki.

WILLEMSTAD – Prizòn Bon Futuro tin sufisiente kapasidat pa sera tur e sospechosonan ku hustisia a detené último dianan. E instituto di korekshon tin 690 kama i te ku ayera tabatin 499 prezu. Por lo pronto no tin niun motibu pa preokupashon. Esaki ta loke e bosero di Bon Futuro, Aldino Schoop, a bisa LA PRENSA ayera.
E kantidat grandi di sospechosonan ku hustisia a detené resientemente, a pone LA PRENSA averiguá kon ta pará ku e kapasidat di sèl na prizòn. E ola di detenshonnan i vershonnan ku mas detenshon lo kai, a pone un relashon mes ora ku e problema struktural di falta di sèl na prizòn. Sinembargo Schoop a splika, ku no ta eksistí un problema struktural ku kapasidat pa sera delinkuentenan. “Nunka no tabatin e problema ei. Semper prizòn tabata den un posishon pa akapará e kantidat di delinkuentenan ku mester a sinta nan kastigu. Mi por bisa ku nunka nos no ta na kareda pa motibu di falta di espasio pa sera esun ku mester sinta su kastigu.”
Mas aleu Schoop a splika ku prizòn tin 704 sèl, pero no ta tur sèl tin kama. Aktualmente tin 690 kama disponibel di kua 499 ta okupá. “Nos tin lugá awor akí pa 191 prezu mas. Ounke mi tin ku bisa ku tur dia i henter dia tin sospechosonan ta drenta i èks prezunan ku a kaba di sinta nan kastigu ta bai kas. Konstantemente nos ta registrá kuantu hende a drenta i kuantu a sali. P’esei nos sa kada momentu di dia eksaktamente kuantu lugá nos tin pa sera hende.”
Schoop a splika ku Bon Futuro tin 8 diferente blòk. “Blòk 1 ku ta konosí komo e sèlnan di polis i ta reservá pa detenidonan ku no a haña nan kastigu ainda. Nan ta pendiente di e investigashon ku ta tumando lugá i pa e motibu ei nan ta detené den e asina yamá Huis van Bewaring.” Den HvB 37 sèl di kua 34 tabata okupá te ku ayera. Na mes momentu tabatin 3 prezu ku por a bai kas ayera. Na warda di polis na Rio Canario i na Barber tambe tin algun sèl.
“Banda di e Huis van Bewaring tin tambe e Strafgevangenis mes. Esaki ta loke nos ta yama ‘patras’. E prezunan ku ta será patras ta esunnan ku tin un kastigu imponé dor di korte. Den e parti akí tin entre otro Blòk 2. Den e blòk akí tin prezunan ku por konsiderá peligroso. Tin kapasidat pa 44 prezu. Den Blòk 3 tin espasio pa 68 prezu i aktualmente tin 51. Akí tin detenidonan relativamente trankil. Nan ta adultonan mesklá ku hóben. Te ainda nos no tin un prizòn pa hóben na Kòrsou i ta pa e motibu ei nan ta será huntu ku e adultonan. Den Blòk 4 tin espasio pa 38 prezu, miéntras ku aktualmente tin 37. Den e blòk akí tin e detenidonan manera mandatario i otro funshonarionan haltu. Tin polis tambe será den e blòk akí. Blòk 5 tin 29 sèl i aktualmente tin 27 detenido, miéntras ku Blòk 6 ta un blòk ‘algemeen’ i tin espasio pa 28 prezu. Aktualmente tin 25 será.”
Finalmente tin Blòk 7 i 8. Blòk 7 ta partí den 2x72 sèl. Aktualmente tin 121 detenido. Den un parti tin 60 prezu i den e otro parti tin 61. Tin tambe e parti di kashòt. E sèlnan akí ta pa detenidonan ku kibra ku regla i nan ta haña un kastigu èkstra. Tin espasio pa 9 prezu den kashòt i aktualmente tin 1 prezu será. Tin tambe e parti ku yama ‘afzondering’. Einan por sera 9 detenido i aktualmente tin 8 prezu será. E detenidonan ku ta será den e parti akí ta esunnan ku tin ku haña protekshon. E último parti kaminda tin prezu ta den e baraknan pa hende hòmber. Eiden tin espasio pa 48 prezu i aktualmente tin 23 prezu. E detenidonan akí ta esunnan mas trankil. Nan ta preparando pa bai kas, pues ta sintando nan último parti di kastigu.
“Aktualmente tin 25 prezu femenino na Bon Futuro, miéntras ku e prezu di mas hóben tin 16 aña. Esun ku mas edat ta kai den e kategoria 50+. E prezunan entre 16 i 24 aña ta sigui kursonan di formashon sosial. Por nota últimamente ku e populashon den prizòn ta birando mas hóben, Aldino Schoop a splika. Schoop ta traha na Bon Futuro for di mart di 2007. E ta en prinsipio trahadó sosial i bosero. Anteriormente el a traha na FEFFIK kaminda e tabatin hopi kontakto ku prizòn. Tambe el a traha na ARBO komo persona di konfiansa pa tur empleado di servisionan uniformá.
Finalmente Schoop a splika ku aktualmente tin tiki wardadó di prezu pa hopi prezu. “Esaki tòg tin komo konsekuensia ku e prezu ta pone preshon riba e wardadónan di prezu. Hopi bia ta pa haña atenshon. Tin bia nan ta yama i hasi manera ta algu urgente, pero finalmente ta resultá ku ta djis pa nan puntra konta ku nan papelnan.”

WILLEMSTAD/ GELDERLAND – Un sistema nobo di gps ta indiká e sitio eksakto kaminda tur polis na pia ta, durante un aktividat grandi ku hopi públiko. Di e manera akí e polis no mester splika mas ku e ta pará banda di un palu grandi òf un outo koló pretu.
E kuerpo polisial di Noord i Oost Gelderland ta bai eksperimentá ku e sistema akí durante e eventonan grandi ‘de Zwarte Cross’ ku ta tuma lugá dia 25, 26 i 27 di yüli próksimo na Lichtenvoorde. Bosero di e kuerpo, Andrea Jansen a bisa, ku e tereno di ‘de Zwarte Cross’ ta enormemente grandi. “Nos ta spera 100 mil bishitante i durante un aktividat grandi asina e ta bira fèrfelu pa e pòst di komando keda ku bista riba henter e tereno.”
Pa e sistema funshoná lo duna tur polis un aparato chikí ku konstantemente ta indiká unda nan ta kanando. “E sistema no ta kompletamente nobo pa polis, pasó aktualmente tur vehíkulo di polis tin un sistema di gps. Awor nos lo por sigui e polis na pia tambe. Den e sentral di polis nos por sigui via di un karta digital tur vehíkulo di polis i awor tambe tur polis na pia”, Jansen a sigui splika.
Anteriormente, ora tabatin ku duna asistensia durante eventonan grandi, e polis mester a splika kaminda e ta pará. “Banda di un kaminda smal na man drechi dilanti un palu diki, ta difísil pa splika. Awor ora mester duna asistensia por wak mes ora kua polis ta mas serka di e sitio. E sistema ta funshoná via un ‘dish’ ku ta instalá riba e vehíkulo di komando di polis. Via satélite e informashon ta pasa rápidamente i indiká kaminda e polisnan ta pará”, Jansen a splika.