Skina di Sorti, awe djarason 6 di ougùstùs di 2008, ta kuminsá ku deseá tur hende un bon dia. Un empresa ku ta forma un parti esensial di e kadena di entrega di energia hamas i nunka por tin komo miembro di nan hunta di komisario hendenan ku no tin saber di un empresa komersial. No nesesariamente mester ta trata di saber di maneho. Konosementu di teknologia, merkadeo, maneho di rekurso humano, òf kalke otro aspekto di e baiben di bida komersial entre otro tambe ta duna indikashon di probabilidat di e espíritu ku por kontribuí na un proseso di direkshon (no konfundí esaki ku maneho diario) i kòntròl adekuado di un empresa vital manera por ehèmpel Curoil.
****
Un bista riba e lista di miembronan di e hunta di komisario di Curoil ta trese duda grandi riba e seriedat ku kual gobièrnu ta kere di atendé ku entidatnan importante pa pais. Ta un realidat ku tur partido polítiko (rònt mundu) ta rekompensa miembronan ku sierto mérito pa partido ku un puesto for di kual nan ta gana algu èkstra, tin sierto prestigio i otro sorto di benefishinan. Pero pa konsiderá miembresia den hunta di komisario di un Curoil komo tal no ta akseptabel.
****
Kredibilidat, e grado segun kual bo por aseptá ku algu ta basa riba bèrdat (“geloofwaardigheid”) i konfiansa (e grado den kual un tersera ta stèns riba bo,“vertrouwen”), ta elementonan ku un persona òf instansia ta influensiá ku, primeramente akshon koherente i konsistente. Falta di koherensia (e grado den kual e akshon por wòrdu splika for di e informashonnan relevante) i konsistensha (e manera ku un akshon ta korespondé ku previo akshon bou di mesun sorto di sirkunstansia), ta lanta interogatorio.

Skina di Sorti, awe 5 di ougùstùs di 2008, ta kuminsá ku deseá un i tur un bon dia. E panorama polítiko di Kòrsou ta keda mustra e mesun tendensia di polítika reakshonario ku demasiado hungamentu di e persona ku konfrontashon di kontenido. E mesun antagonismo i e mesun divishon. Ni e posishonamentu polítiko ni e aserkamentu gubernamental, spesialmente na nivel insular no ta sirbi komo instrumento pa hiba un gobernashon efektivo i efisiente. Temanan importante no ta yega na e debate públiko for di kual por lo general tin ku bini e sosten masal pa e direkshon ku tin di kue.
****
Nos ta keda ku un desperdisio enorme di e rekursonan skars di komunidat ku por ehèmpel yamamentu di reunion ku sea no ta tuma lugá, ta keda deskontinuá òf ta resultá den diskushon riba futilidat en bes di debate serio. Ku desaroyo pa lokual ta kosto di krudo i komestibel ketu bai un fuente di preokupashon pa su impakto riba ekonomia global, “de politiek” no por yega na un debate serio riba e materia.
****
Djis despues di e promé konfrontashonnan riba e tema di proseso estatal a papia un ratu riba e nesesidat pa yega na un rekonsiliashon. De facto nada no a kambia. E mesun rantnan skèrpi a keda i te hasta por papia di un situashon ku ta bai empeorá. Denter di koalishon e diferensia grandi den kultura di gobernashon ta kuminsá manifestá. Kestion ku FOL ke sa di PNP kiko ta kiko riba konstelashon di gerensia di Selikor ta muestra di esei.

Skina di Sorti, awe djaluna 4 di ougùstùs di 2008, ta kuminsá ku deseá un i tur un bon dia. E opservashon kritiko di SOAB, riba e falta di diligensia serka gobernante i kuerponan representativo den atendementu ku kuentanan anual, ta un afirmashon di e deterioro molestioso i peligroso den konosementu, rèspèt i bibamentu di regla, prosedura i kustumber di nos estado di derecho. De “politiek” a krea un ambiente di un klase sosial riba su mes ku gradashon a base di voto optené, puesto okupá i tempu den funshon.
****
En bes di e preshon pa sirbi i duna kuenta i rason ante elektorado, bo ta mira mas i mas mal uso di posishon, pa gloria personal i lokual ta mas molestioso ainda un ignoransia grandi pa lokual ta e papel ku polítika tin denter di un estado di derecho. Hopi ta sinti nan mes miembro di un klase sosial ku tin privilegio legal. En bes di kuida i protehá derechonan fundamental, trapamentu di derecho a bira mas regla ku eksepshon.
****
Mal uso di imunidat parlamentario pa saka sla kontra di hende, intimidashon di miembro di kuerpo representativo i miembro di prensa pa eskivá dunamentu di kuenta i rason, matamentu di e debate polítiko (entre otro ku e wega eterno di keda sin forma quorum) i faltamentu ku reglanan di bon gobernashon ta mas regla ku eksepshon.
****
En bes di un oumento den e sensashon ku nos ta asumí mas responsabilidat i inisiativa pa atendé nos propio asuntunan, e sensashon kontrali di mas dependensia i sometementu na influensia aheno ta gana tereno. Nada di un preshon eterno pa kuida i mantené un identidat propio pero un ansha pa solushon fásil ku ta pone hendenan ku kapasidat pa rasoná ku normalmente ta riba e nivel promedio rekurí na argumentashon ku ta bergonsoso.

Skina di Sorti, awe djasabra 19 di yüli di 2008, ta kuminsá ku deseá tur hende un bon dia. Den negoshi i polítika bo mester ta determiná (“resoluut”) den tomo di desishon pa bo por logra kambio efektivo den un tendensia negativo. Bo tin di mustra e determinashon pa tuma bo pèrdida, laga lòs i enkaminá e direkshon nobo ku un “nieuw elan”. Tantu MAN komo FK no a demostrá esaki pa lokual ta e aliansa polítiko ku mester wòrdu konsiderá komo un frakaso rotundo.
****
No por papia di un mobilisashon ku tabata tin sierto grado di éksito pero ku pa motibu di un insidente mester a wòrdu reposishoná. Tabata tin kestion di un mobilisashon dòrna ku insidente molestioso sin nada di gara serka e masa. E tema pa kual e forga e aliansa no ta biba, miéntras e profilamentu tabata mas pa e grupo minoritario ku pa esnan ku mas sosten (“draagvlak”) den komunidat.
****
Si bo wak kual ta e faktornan kritiko pa éksito di un mobilisashon sosial, e konklushon no por ta otro ku e aliansa tabata un flòp. Un mobilisashon sosial por ta outónomo òf e por ta indusí. Pa un mobilisashon sosial por wòrdu indusí ku éksito, e organisadónan mester a konstruí un sistema di komunikashon efektivo ku kual por alkansá e masa. Banda di esaki, e organisadónan mester skohe e mihó momentu i e tema adekuado pa inisiá e mobilisashon.
****
Komo ku e tema no tabata biba i aktividat no polítiko no tabata esun ku a redonda den akshonamentu polítiko, no por papia di un mobilisashon outónomo pero unu indusí. Un mobilisashon outónomo ta surgi na momentu ku un “triggering event” kousa erupshon di un tenshon kousá pa un situashon di krísis. E dimenshon i dinámika di e mobilisashon ta dependé di presensia di nètwèrk di komunikashon i di hendenan ku ta rekonosé e oportunidat pa asumí posishon di poder.

Skina di Sorti, awe djabièrnè 1 di ougùstùs di 2008, ta kuminsá ku deseá tur hende un bon dia. Ku un luna ainda di tempu pa kaba di prepará e presupuesto pa aña 2009, gobièrnu tin oportunidat amplio pa usa e instrumento mayó di maneho aki komo instrumento pa inisiá un kambio den e aserkamentu di gobernashon. Ta oportunidat pa un kambio históriko for di e paradigma polítiko lokal, di bagatelisá reto i eksagerá potensial oportunidat, pa unu ku ta invitá pa traha riba e kosnan ku mester hasi pa bira i keda kompetitivo.
****
E promé parti di e presupuesto 2009 mester ta un kompilashon di e realidat sunú di momentu. Echonan inegabel (“forensic evidence”) en bes di e pretenshon polítiko di e respektivo gobernantenan. Unda realmente nos ta para. No ku prosa so pero ku sifranan ku ta indiká e realidat konforme índisenan generalmente konosí.
****
Kalkulá nos HDI (human development index) i pon’é den un kuadro di komparashon ku region. Mustra kon e faktornan ku a influensiá e respektivo áreanan ku ta definí kalidat di bida a desaroyá i kon nan lo impaktá e nivel di bida sin intervenshon di maneho.
****
Den un di dos parti di e presupuesto pa aña 2009, mester bini e pretenshon di maneho, esta unda gobièrnu ke mira e respektivo índisenan bai i kiko mester hasi pa esei keda realisá. Un indikashon di e esfuersonan ku mester hasi pa logra esaki tambe mester forma parti di e sekshon aki. Den e di tres parti di e presupuesto 2009 mester bini e konfrontashon entre lokual ta rekerí i lokual ta disponibel.

Skina di Sorti, awe djaweps 31 di yüli di 2008, ta kuminsá ku deseá tur hende un bon dia. E kolumnanan ku kual mi a inisiá e siman kuné, tabata komo kuadro di referensia pa mi pèrsistensia den mi denunsia riba e manera ku kual “de politiek” i esnan ku tin signatura di gobernashon (“regie”) en partikular ta atendé ku pais. E no ta pas ni pa e situashon di pais ni pa e manera segun kual tin di yega na tumamentu di desishon den un pais kaminda ta presumí ku tin gobernashon segun e sistema demokrátiko.
****
Ta “ongepast” pa hasi referensia na posishon di un grupito pa sostené un posishon kaminda partisipashon di e masa tabata (ta) fundamental pero ku e masa a wòrdu tene na distansia. Tsang den su intervenshon (manera mi a reprodusí e partinan relevante den e kolumnanan anterior) ta mustra ku gobernashon polítiko ta eksigí mas ku e kuadronan hurídiko, finansiero i ekonómiko.
****
Koriendo e riesgo di ta kansa hende ku ripitishon di definishon mi ta bai bolbe splika e diferensia fundamental den filosofia tras di gobernashon demokrátiko (filosofia di Socrates ta ku mas tantu hende posibel mester sinti nan mes representá den e proseso di gobernashon) i esun despótiko (filosofia di Plato ta ku esnan mas sabi ta goberná i demas ta sigui). Den e sistema di gobernashon demokrátiko, regla i prosedura t’ei pa por kumpli ku e aspekto di partisipashon.
****
Den e sistema di gobernashon demokrátiko, partisipashon (“doing things right”) ta prevalesé riba e lokual ta wòrdu hasí (“doing the right things”). Kon algu ta wòrdu determiná (“doing things right”) ta prevalesé riba kiko ta wòrdu hasí (“doing the right things”). Esei ker men ku si lokual wòrdu hasí no a tuma lugá den un forma ku ta preskribí, e mester wòrdu deskartá. Hasimentu di kos na un manera ku no ta kuadra ku e reglanan tin di haña konsekuensia. E no por keda imponé.

Skina di Sorti, awe djarason 30 di yüli di 2008, ta kuminsá ku deseá tur hende un bon dia. Den merkadeo nan ta papia di brinda e konsumidó un eksperensia ku ta surpasá su espektativa (“thrill the consumer or satisfy beyond expectation”) komo un ophetivo funshonal pa finalmente logra i mantené bentaha kompetitivo. Den polítika esaki tin di enserá ku aktornan polítiko mester forsa pa presta mihó ku e persepshon ku nan a krea serka elektorado. Esei kier men ku nan mester tene e sektor polítiko atraktivo den bista dje elektorado i finalmente presentá nan mes komo e mihó entre e alternativanan.
****
Den nos elenko polítiko tin un grupo grandi ku aparentemente ta sigui un otro lógika ku esun ku entre otro ami komo studioso dje fenómeno a desifrá. Apesar ku echonan ta proba ku nan akshonamentu no ta efektivo, nan ta pèrsistí ku nan manera di akshoná. Komo studioso di e materia indikashon optené for di komportashon di e aktornan den e blòkinan di influensia den e kuadro polítiko tin un peso mas haltu ku e lokual ta wòrdu bisá. Echonan (“forensic evidence”) tin un grado haltu di konfiabilidat serka e bon opservador.
****
Tin aktor polítiko ku ta den un fase avansá di ningamentu di realidat (e konosido fenómeno di “denial”). Nan a kuminsá kere e lokual nan a bini ta bisa pa konfundí otronan. Nan a konvertí su mes den un peliger pa nan alrededor. En bes di akshoná pa yega na e meta original bo ta mira ku defendementu di un posishon tuma ta bira un ophetivo apsoluto. Den nos realidat polítiko, tin algun aktor ku ta den e situashon menshoná.

Skina di Sorti, awe djamars 29 di yüli di 2008, ta kuminsá ku deseá un i tur un bon dia. Un aktor polítiko mester tin e ambishon i pretenshon di ser un bon polítiko. Un oportunista ta interesá den probechá di oportunidat ku presentá. Su inkurshon den polítika konsekuentemente no tin ningun otro ophetivo ku di saka lo máksimo for di e oportunidatnan ku tin den e sektor polítiko.
****
Un aktor polítiko ku pretenshon di liderazgo su ambishon ta bai mas aya ku di ser un bon polítiko i òf un bon gobernante. E ta aspirá di ta esun ku ta hiba pais na un nivel di bida mas mihó. E pretendiente ku ademas tin vishon di gobernashon ta hasi esfuerso pa gana e masa su tras den lokual mi a kalifiká komo un mishon pa un mundu nobo i mihó ( “journey of discovery”).
****
Den un intervenshon na studiantenan di Chinese University of Hong Kong ,Chief Executive Donald Tsang Today, a duna un definishon di lider pa lokual ta e sektor komersial ku ta bisa: ”A leader is responsible for giving direction, resolving issues, hunting for capable people, and motivating those under his charge. The Chief Executive is a rather unglamorous and down-to-earth job”.
****
Opviamente e definishon aki no ta aplikabel pa liderazgo den e sektor polítiko. Den e sektor aki, aspektonan sosio sikológiko (e interkambio entre elektorado, fasilitadornan, mobilisantenan i e aktornan polítiko) ta impaktá e fakultat pa rasoná (nan ta kondishoná direkshon i prioridatnan) miéntras lucha pa poder ta interrelato ku e aspekto di “resolving issues” (aki mi ker men esnan no polítiko).

Skina di Sorti, awe djaluna 28 di yüli 2008, ta kuminsá ku deseá un i tur un bon dia. Pa bo por ehersé bo funshon ku sierto grado di éksito, bo mester ta konsiente di kiko e sektor ku bo ta operá den dje ta kome i bebe. Bo no tin nodi ta un studioso (un persona ku ta investigá e fenómeno ku e pretenshon di krea i òf amplia konosementu general riba e fenómeno) pero reglanan básiko si no por ta un enigma pa bo.
****
Opservando e akshonamentu di aktornan polítiko e konklushon ta ku un grupo remarkablemente grandi di polítiko aktivo, ta akshoná pa “please” un òf mas figura (ku nan ta someté nan mes na dje), i konsekuentemente ta degradá entre otro e kuerponan respresentativo den plataforma di deterioro di e sistema di gobernashon demokrátiko. Un miembro di Konseho Insular ku ta kontestá pregunta dirigí na diputado, ta insólito. Diputado ta obligá di duna kuenta i rason na Konseho Insular.
****
Miembronan di Konseho Insular, sea ta di oposishon òf di koalishon mester mantené fundamentu di e prinsipio di e sistema na haltu. Un miembro di Konseho Insular ku ta intervení entre e diputado i Konseho Insular, ta duna muestra di falta di konosementu i abilidat pa hunga e wega polítiko. Un polítiko ku a hinka esfuerso pa siña ta kon e wega ta wòrdu hungá, sa ku e kaminda indiká pa yuda bo diputado ta di hasié pregunta ku ta habri kaminda pa e debate por drenta e área kaminda e diputado ta fuerte.

Skina di Sorti, awe djasabra 26 di yüli di 2008, ta kuminsá ku deseá tur hende un bon dia. Tin kosnan ku pa nan implikashon riba kalidat di funshonamentu di un estado di derecho t’asina fundamental, ku nan mester wòrdu atendé ku e koutela nesesario. Esei tantu di parti di gobièrnu komo di un miembro di kalke kuerpo representativo. Nan ta hura di kuida, protehá i mantené e órden estatal. Nan tur mester ta konsiente ku den nan funshon nan tin di wak no solamente kiko tin di wòrdu hasí, pero kon e ta wòrdu hasí.
****
Den un sistema di gobernashon demokrátiko, kaminda e prinsipio di partisipashon ta karga e mayó piso di importansia, aktornan den e sistema di gobernashon mester ta konsiente ku kontrali na un debate katedrátiko no ta bai pa kende tin rason, pero kende tin mas sosten popular, pero ku e anotashon ku e aktor mester ta den kuadro di lokual reglanan establesé (skirbi i no skirbi) ta pèrmití. Hende pa por biba komo komunidat ta biba enkuadrá (“boundary system”).
****
Pa basta tempu kaba “de politiek” ta violando e prinsipio básiko aki ku aktuashon ku a bini ta debilitá e papel ku gobièrnu, Parlamento, Konseho Insular i Bestuurscollege tin denter di e sistema di gobernashon demokrátiko. E “onderlinge bejegening” ku frekuensia te hasta ta bou di tur nivel di komportashon síviko. Lokual tin ta mas bien un parodia riba lokual ta ser yama “parliamentary procedures”. Ta manera kos ku sala di Parlamento, Konseho Insular i media a bira e plataforma pa reunion di kontakto polítiko.