JERUSALEM – E presidente palestino Mahmud Abbas i e promé minister israelí Ehud Olmert lo reuní awe na Yerusalèm, asina outoridatnan di ámbos parti a bisa djamars.
E reunion lo ta e promé entre nan dos for di dia ku Olmert, bou di un ola di akusashonnan pa korupshon, a anunsiá ku e lo bandoná e puesto despues ku su Partido Kadima elihí un lider nobo na sèptèmber.
Ta probabel ku e esfuersonan pa yega na un akuerdo e partinan ta kompliká tantu pa e lucha entre e rivalnan di Olmert pa remplas’é komo pa e posibilidat di elekshon nashonal na Israel.
E negoshadó palestino Sae Erekat i e ofisina di Olmert a konfirmá ku ámbos mandatario lo reuní awe na kas di Olmert na Yerusalèm.
Olmert i Abbas a kuminsá reuní regularmente for di dia ku israel i e palestinonan a kuminsá negosiashonnan nobo di pais na fin di aña pasá, durante un konferensha di spònser pa Merka.
Pero inkluso promé ku Olmert a anunsiá siman pasá su intenshon di renunsiá, e dos partinan tabata alehando nan mes di nan meta deklará previamente di firma e akuerdo di pas pa fin di aña.

BRASILIA – Pobresa na e prinsipal seis regionnan metropolitano di Brazil a baha fuertemente entre 2003 i 2008, danki na e kresementu ekonómiko registrá den e periodo ei, asina un estudio ofisial publiká djamars ta indiká.
E informe di e Instituto di Investigashon Ekonómiko Apliká (IPEA) a señalá ku e grado di pobresa a pasa di 35% na 2003 pa 27,1% di e poblashon na 2006 i nan ta spera ku e lo sigui kai na 24,1 den 2008.
E presidente di Ipea, Marcio Pochman, a indiká u pobresa a baha na Brazil danki na e kresementu di ekonomia, na e oumento di salario mínimo, e programanan sosial di gobièrnu i e insentivonan riba agrikultura familiar.
“Brazil a kuminsá stòp di ta un pais di pobresa apsoluto pa bira un pais di pobresa relativo, redusiendo e distansia entre e tòp i e base di e piramit”, Pochman a señalá.

SEUL – Polis surkoreano a manda stralnan di awa djamars pa plama míles di manifestantenan ku tabata protestá pa e bishita di e presidente merikano George Bush.
E mandatario merikano kende ta di gira na Asia, a konfirmá realshonnan ku el a topa na e pais ei, kaminda e opinion públiko por lo general ta favorabel pa Washington ounke hopi persona tin rabia pa e polítika di Washington, Komo 13.800 agente polisial a ser instalá den estado di alerta ku ekiponan antimotin i kachónan di trein.
Bush lo reuní awe ku e presidente Li Myung-bak, kende a tuma e puesto na febrüari.
Otro surkoreanonan a apoyá Bush. Komo 30 mil persona a reunion dilanti munisipalidat di Seul, ofresiendo plegarianan di respaldo na e gira di e mandatario merikano, Banderanan merikano i surkoreano enorme tabata kologá ku blasnan ku e teksto” “Bonbiní, presidente Bush”.
Anochi komo 20 mil manifestante kontra-Bush a reuní den besindario. Polis a manda nan ku awa ora e manifestantenan a trata di drenta e avenida prinsipal di e siudat. E awa tabatin koló (enk) ku e meta pa identifiká e rebeldenan despues.
Oranan promé, Bush a yega ku e meta di partisipá na un kumbre riba futuro di aliansa largu entre e dos paisnan.
E avion presidensial a baha atardi na un airopuerto militar serka di e kapital surkoreano di Seul, na komienso di un gira pa tres pais di Asia.

WASHINGTON – E kontesta di Iran riba un pakete di insentivo pa e bandoná un programa nuklear ta inaseptabel, asina fuentenan merikano a bisa, ku kua ta bira mas probabel e perspektiva di sanshonnan nobo kontra e krímen islámiko.
E fuentenan a bisa AP ku un dokumento di un página ku Iran a entregá e komishonado europeo di relashonnan eksterior, Javier Solana, no ta un kontesta definitivo riba e oferta di e potensialnan mundial grandi pa e suspendé e enrikesementu i reprosesamentu di uranio a kambio di benefishinan ekonómiko i di otro tep.
En kambio, nan a agregá, ta trata di un reformulashon di e insistensia previo di Teheran di ku e tin derechi di realisá aktividatnan nuklear pasífiko.
Nan a bisa ku e ta esensialmente konfirmashon di partinan di kòmbersashonnan na telefòn resiente entre Solana i e prinsipal negoshadó iraní, Said Jalili.
Un funshonario ku konosé e dokumento a deskribié komo “mas bruashon i retraso” i no un “kontesta real” di Iran riba e pakete ku a presentá na dje e aña aki di parti di e sinku miembronan permanente di Konseho di seguridat di ONU i Alemania.
E fuentenan a bai bou di e kondishon anónimo pa motibu ku e ofisina di Solana te ainda no a deskribí e karakter o e kalidat di e dokumento.
Outoridatnan merikano a bisa ku e falta di un kontesta kla ta nifiká ku e análisis riba sanshonnan nobo kontra Iran lo por kuminsá for di djarason (awe) kaba, ora diplomátikonan di rango haltu di e seis paisnan ku a hasi e oferta papia den telekonferensha.

BEIJING – Un 20 persona rabiá pasobra nan a ser saká for di nan kas den sentro di Beijing a tene un protesta djaluna serka di Plasa di Tiananmen, bisando ku nan derechonan a ser violá na nòmber di e Weganan Olímpiko.
Polis mesora a sera e kaya residensial kaminda un video di AP Television News a mustra un grupo gritando ku nan a ser saká di nan kas i ku nan no a haña e kompensashon apropiá
E ofisialnan no a intervení, pero muhénan ku a identifiká nan mes komo miembronan di e komishon di e besindario a pusha e manifestantenan i a saka nan di e zona. E komishonnan di bisiña no ta parti ofisial di gobièrnu, pero ta traha huntu ku polis i otro agensianan.
E manifestantenan a bisa ku nan a ser saká di nan kas pa rekonstruí e zona. E aria ta den rekonstrukshon pa hasié un paseo komersial ku negoshinan manera Nike, Starbuck i Rolex.
E manifestashonnan den sentro di Beijing ta skars i normalmente polis ta para nan mesora. China no ke niun tipo di protesta públiko durante e Olimpiada i a pone agentenan di seguridat na henter e siudat.
Mesora no tabata konosí unda a biba e manifestantenan, o si nan a keda detené. Un ofisial na ofisina di prensa no sa na unda nan a bai.
“Nos no ta kontra e Olimpiada. Pero nan no mester tumba nos kas”, e manifestante Liu Fumei a bisa. Un video di APTN a mustr’é ta grita i den un pleitu ku muhénan bisti na sivil ku tabata trata di sak’é for di e lugá.

BEIJING – Ora ta falta un par di dia pa komienso di e Weganan Olímpiko, dos hòmber a kore drenta ku un trùk di shushi riba un grupo di polis ku tabata kore i nan a tira eksplosivo matando 16 agente na e parti ekstremo nort west di China, asina prensa estatal a informá.
E atake a oumentá e tenshon ku ta biba na e kapital pa e weganan internashonal.
E tabata un dje atakenan mas mortal i riská den vários aña na e provinsia di Xinjiang, lugá di un rebelion musulman violento di e zona kontra e régimen chines.
Ounke atake a tuma lugá den un region ketu di China, el a sosodé na momentonan ku e forsanan di seguridat tabata den estado di alerta máksimo, ku temor pa problemanan durante e Olimpiada.
Den e atake, dos hòmber a kore ku e trùk kontra e polisnan, miéntras nan tabata kore dilanti un hotèl durante e ehersisionan di mainta na e siudat di Kashgar, Xinhua a bisa. Al pareser e agentenan ataká ta pertenesé na un grupo paramilitar enkargá ku kuida frontera.
Despues ku e trùk a dal den un palu di lus, e dos atakantenan a bulá afó i a sende eksplosivonan trahá na kas i “tambe nan a hinka e polisnan”, Xinhua a agregá.
Un informe previo di e agensia a bisa ku nan a tira eksplosivo kontra un warda, pero Xinhua a kambia e informe despues, bisando ku e warda ta na un 200 meter di e lugá dje agreshon.
Segun Xinhua, 14 polis a muri einan mes i dos na kaminda pa hospital, miéntras ku komo 16 otro a keda heridá. Polis a arestá e dos atakantenan, un di nan heridá na un pia, el a agregá.

BOGOTA – Presensia di un konvoi ku fanátikonan di Atlético Nacional den un zona reservá pa siguidónan di e klup lokal Atlético Bucaramanaga a ser interpretá komo un provokashon i a kousa un bataya kampal ku saldo di ocho herido, dos di nan di gravedat, i 20 detenido, polis a bisa.
Polis a promové un akto di pais entre e barranan di ámbos banda, pero e akuerdo a ser kibrá djadumingu promé ku e wega na momento ku shofùr di e konvoi a separá su mes di e karavana.
E bochincha a dura asta despues di e wega ku a empatá 1-1, pa di tres fecha di e torneo Klousura di futbòl kolombiano i e Skuadron Móbil Antidisturbio di Polis a hañ’é ku problema pa pone òrdu bèk.
Wilson Múnoz Vélez di 18 aña a sufri heridanan ku kuchú den pechu, un di nan a afektá un pulmon, i Sebastian Alvarez a risibí un gòlpi den wowo drechi i el a afektá su retina, Krus Kòrá a bisa.
Komandante di polis metropolitano, general Orlando Pineda, a anunsiá na prensa ku un di e detenidonan tabatin un revòlver i el a lòs diferente tiru i otro, un menor di edat, tabatin tres arma blanku di plak na su lomba.
“Algun persona no por a drenta e stadion pasobra nan tabata fuma i den estado eksitá al pareser pa efekto di sustansianan ku ta manda nan haltu”, Pineda a bisa.
E duelo na Manizales entre e lokal Once Caldas i América tambe a kousa enfrentamentunan entre e fanátikonan, i un di nan, Richard Andres Bautista, a ser heridá ku arma blanku.

NEW DELHI – Un total di 145 persona, entre nan un kantidat di mucha, a muri djadumingu pa motibu di un korementu di miles di peregrinonan rondó di un tèmpel hindú na nort di India, asina polis a bisa.
C.P. Verma, a bisa ku e korementu a tuma lugá pa rumornan di un avalancha, pero ku e situashon a bira pió ora demasiado peregrinonan a trata di kore ku difikultat den un aria chikí.
Algun shen peregrinonan tabata den e tèmpel den un seru.
Fotonan saká na e lugá a mustra ku mayoria di e kadavernan tabata di mucha i hende muhé. Algun dje víktimanan a kai den bashí i otronan a muri trapá durante e korementu.
Kanalnan di televishon a mustra imágennan tristu di e kurpanan di diferente mucha chikitu.
Na e hospital Bilhaspur, reskatistanan a baha for di un trùk kadavernan lorá den paña i tabata pone nan na rei pa nan ser identifiká pa nan famia.
“Awor aki nos esfuersonan ta riba reskate. Asina ku esaki kaba, nos lo investigá e motibu”, Anurag Garg a bisa, un funshonario haltu di polis.
E hendenan tabata asistí na un festival religioso di nuebe dia den e tèmpel di Naina Devi, den e distrito di Bilaspur, na e estado Himachal Pradesh, Verma a bisa.
Polis a usa un telefériko ku ta konektá ku e tèmpel pa baha e morto- i heridonan for di e kabes di seru, miéntras tabata manda helikòpternan pa yuda den reskate di e hendenan den e tèmpel situá na pia di Himalaya.

BEJING – Un kantidat di 20 manifestante molestiá pa motibu ku nan a wòrdu saká for di nan kas den sentro di Beijing, a realisá e protesta serka di Plasa Tiananmen. Nan ta alegá, ku nan derechinan a wòrdu violá na nòmber di Weganan Olímpiko.
Polis a yega rápidamente na e sitio i a pone un kordón rònt di e manifestantenan. E agensia di prensa AP a mustra imágennan di e manifestantenan ku tabata grita ku nan a wòrdu saká for di nan kas i nan no a risibí kompensashon apropiá.
No tabatin intervenshon ofisial, pero muhénan ku a identifiká nan mes komo miembro di e komishon di bario a pusha e manifestantenan i a saka nan for di e zona. E komishonnan di bario no ta forma parti ofisial di gobièrnu, pero ta traha huntu ku polis i otro agensianan.
E manifestantenan ta alegá ku nan a wòrdu ekspulsá for di nan kasnan pa rekonstruí e zona. E área di rekonstrukshon lo wòrdu kombertí den un paseo ku negoshinan manera Nike, Starbuck i Rolex.
Manifestashonnan den sentro di Beijing ta hopi raro i normalmente polis ta hasi detenshon mesora. China no ke ningun tipo di protesta durante Weganan Olímpiko i tin agentenan di seguridat den henter e suidat.
No ta konosí unda e manifestantenan a wòrdu hibá òf si nan a wòrdu detené. Un bosero polisial no tabatin kontesta riba e preguntanan aki.
“Nos no ta oponé e Weganan Olímpiko pero no mester destruí nos kasnan tampoko,” asina un manifestante a bisa. “E desaroyadónan no mester usa e weganan pa kende ku nos kasnan. Nos mester defendé nos kas i nos no por keda sin defendé nos derechinan djis pa Olimpiada.”

BOGOTA – Korte Supremo di Hustisia djabièrnè a kondená un senador di partido di gobièrnu na shete aña di prizòn pa su lasonan ku paramilitarismo i kambio di resultadonan elektoral.
E senador Luis Eduardo Vives Lacourure, di Partido Convergencia Ciudadana ku ta respaldá presidente Uribe, a ser kondená pa su relashon pa kometé delitu i kambio di resultadonan di elekshon, asina ofisina di prensa di e máksimo korte a indiká.
Vives, detené for di 15 di febrüari 2007 den prizòn La Picota na Bogota, tabata ser investigá pa supuesto lasonan ku paramilitarnan ku tabata operá den e zona di magdalena na nort ost dje pais.
E senador ta sigur e di tres persona kondená pa korte debí na e lasonan ei ku paramilitarismo, miéntras ku sigur mei dozein di eks representantenan di Kámara tambe a ser kondená pa hustisia ordinario pa kargonan similar.
E investigashon hudisial ke trata di fiha si polítikonan i paramilitarnan tin un akuerdo pa kue kòntròl polítiko i atministrashon di diferente region di Colombia, mediante froude elektoral, repartishon di kontraktnan ofisial i intimidashon di rivalnan polítiko i outoridatnan lokal.
Pa e skandal konosí komo e kaso di “parapolítika”, sigur un 60 kongresista – di un Senado di 102 miembro i un Kámara Baha di 164 miembro – ta ser investigá pa Korte Supremo i Fiskalia General.

Score: 0.0, Votes: 0