WILLEMSTAD - E pòtrèt aki ta parse parti di Kòrsou. Sinembargo e no ta Kòrsou ainda. Si kosnan kana bon i lo dura sigur basta aña ainda, e awanan di Kòrsou lo haña e tipo di instalashonnan pa eksplorá gas i eventualmente petroli. Falta basta kos pa hasi ainda, promé ku yega asina leu. Ku otro palabra, e ta un desaroyo ku tin su komplikashonnan. Riba página 3 di nos edishon di awe, nos lo tin un análisis amplio di e desaroyonan ku ta mustra masha alentador, pero ku den algun seno ya kaba nan a pone un banda komo algu ku ta difísil pa materialisá.

BEIJING – Na Beijing, kapital di China, ta hasiendo e último preparashonnan pa apertura di Weganan Olímpiko 2008. Ku un invershon grandísimo, e weganan ta pinta di bira un di esnan mas impaktante, pero einan mes mas kontroversial di último dékadanan. Un di e kosnan bon wardá tabata e shou di apertura, ounke un kanal di televishon na Korea a pasa imágennan eksklusivo ku a kapta klandestinamente. Parti di e preparashonnan ta tumando lugá pafó di e stadion Nashonal di Beijing ku si públiko por sigui di serka. Un di nan ta desfile di bandera di tur pais partisipante. (foto AP).

 

WILLEMSTAD – Karanan sosegá, algun turdí ainda (pasobra fakansi a pasa), karanan ku intenshon firme di traha na bienestar di e mucha, tur tabata presente awe mainta na apertura di aña eskolar nobo. Meskos ku añanan anterior, Direktiva di Skolnan Katóliko (RKCS) a habri su aña eskolar nobo ku su personal. E tema sentral di e aña aki ta “Bienestar di e Mucha”. A enfatisá riba abuso di mucha i algun wega ku por ta masha peligroso pa mucha. Glen Helberg a bin for di Ulanda pa papia riba maltrato i abusu di mucha, miéntras ku DARE a papia tokante algun wega di mucha peligroso. Tambe a hiba palabra Monseñor Luis Secco. Riba e pòtrèt por mira parti di e apertura di awe mainta ku representantenan di Direktiva di Skolnan Katóliko, promé minister Emily de Jongh-Elhage i obispu i Monseñor Luis Secco. Tambe tabata presente diputado interino di Enseñansa Eugène Rhuggenaath ku a remplasá diputado Marilyn Alcalá-Wallé ku ta ku fakansi. Diputado Rhuggenaath tabata sintá na e otro banda di sala. Mañan nos tin mas detaye di e aktividat aki.

WILLEMSTAD – E luna aki ta e luna ku Fundashon Pro Bista ta tene su kolekta anual. E fondonan risibí ta destiná pa finansiá e trabounan valioso ku e organisashon aki ta hasi pa nos komunidat. E promé persona ku a duna un kontribushon, ta promé minister di Antia Emily de Jongh-Elhage ku a haña un bishita di e kolektantnan di e fundashon. Tambe a presentá sra. De Jongh-Elhage un CD ku ta kontené informashon riba trabounan di e organisashon. LA PRENSA ta spera ku komunidat kompleto lo kontribuí ku e kousa di Fundashon Pro Bista.

 

WILLEMSTAD – Polis a detené por lo ménos 33 hóben menor di edat den e promé 7 lunanan di e aña akí pa diferente tipo di krímen. Di e kantidat akí a detené 9 den e último 2 lunanan, sospechá di ta envolví den sea asesinato, atrako, poseshon di arma di kandela ilegal i/òf sekuestro.
E 33 detenshonnan akí ta trata di hóbennan entre 14 aña i 21 aña di edat. Un hóben ta bira ‘handelingsbekwaam’ na momentu ku e hasi 18 aña di edat. Esaki ta nifiká ku for di e momentu ei e por kuminsá firma i ta bira responsabel pa su aktonan. Sinembargo ta te ku su 21 aña di edat e ta bira mayor di edat (meerderjarig). No mas ku ayera nochi un hóben di 16 aña a asesiná un otro hóben di 17 aña di edat.

WILLEMSTAD - Proyekto Coney Island ta konosí i a habri nan wepsait pa buska interesadonan pa mas negoshi den e kompleho turístiko aki. Manera e foto ta mustra ku riba e tereno di Coney Island lo konstruí un proyekto turístiko mionario ku lo bai kuadra ku área di Rif. Apesar di hopi diskushon ku lo por tabatin den pasado, awor por mira dilanti riba un proyekto ku e grupo di De Stefano lo bai kuminsá desaroyá. E kompleho aki ta inkluí apartamentunan luhoso i tambe tiendanan pa hasi e zona aki unu komersial / turístiko. Despues di 7 aña pará bandoná, por spera un ora pa otro ku desaroyonan ta kuminsá pa konstruí e kompleho turístiko mionario aki. LA PRENSA lo buska kontakto ku Grupo de Stefano pa mas informashon, di manera ku lektornan por keda informá. (Foto: Norwin Josepa)

WILLEMSTAD – “Wow”, realmente impreshonante e kantidat di mucha ku tabata presente durante e Lito Film Festival 2008 ku a tuma lugá na The Movies awe mainta. Lito den kompania di algun amigu di Disney a pasa riba tapeit kòrá pa drenta The Movies pa gran mainta di pelíkula pa mucha, komo opsekio di Maduro & Curiel’s Bank NV. Na su yegada e direktor di Bo Banko Amigu, Ron Gomes Casseres, a reakshoná riba e kantidat grandi mucha ku tabata sumamente kontentu pa e oportunidat pa mira un film. Un total di 3750 mucha por a disfrutá di 5 diferente pelíkula ku tabata varia pa diferente kategoria di edat. Riba e foto por mira algun di e amigunan spardó di Lito na nan yegada na The Movies. Pa mas informashon lesa página interior di LA PRENSA.

WILLEMSTAD – Mero, e toubot nobo pa Kòrsou ku e kompania Damen Shipyards ta trahando, a bai awa na China. Anke ku e toubot a sali for di e astiero kaminda a konstruí e toubot aki, ainda e proseso no ta kla. E toubot mester hasi e tèstnan nesesario riba awa pa por haña su sertifikado pa operá den nos hafnan i riba laman ganchu. Nos tin mas detaye di Mero den nos edishon di awe.

WILLEMSTAD – Awe mainta e miembronan di staf di Aqualectra, a reuní dilanti di porta di e kompania di produkshon, kaminda nan a mustra nan malkontentu ku gerensia den un akshon. E akshon aki ta pa motibu ku nan ta buska rekonosementu di nan Sindikato di Personal di Staf di Aqualectra (SPSA). For di den fin di siman e miembronan a reuní i a mustra nan malkontentu riba e tono di e karta ku nan a risibí di gerensia di Aqualectra i manera nan mes a bisa for di djabièrnè anochi, ku si no tin un reakshon di parti di gerensia, nan lo drenta akshon. Awe mainta e miembronan a mustra nan solidaridat pa ku e akshon i awor ta spera un reakshon di gerensia di Aqualectra pa rekonosimentu di e sindikato. Pa mas informashon por lesa página 3 di edishon di awe.

WILLEMSTAD – E trabounan ta avansando na Katedral di Pietermaai i for di awor por haña un bista ku ora e proyekto ta kla kompletamente, Sentro di Suidat lo sigui bria. Katedral di Pietermaai no solamente ta un patrimonio nashonal, pero e ta tambe un atrakshon ku ta hala turistanan, entre otro di barkunan. Miéntras tantu ku e katedral ta será, ta tene sakrifisionan di misa den e sala ku tin den banda den e Sentro Parokial. LA PRENSA a komprondé, ku e trabounan na e basílika mester ta kla na novèmber awor na momentu ku riba Dia di Kristu Rei sera tambe klousura di e aña di hubileo di Obispado di Willemstad. (foto Rudney Vrutaal)