SAN NICOLAS- Manera ta conoci, proposito di e recien conferencia na St. Maarten, tabata pa e diferente Parlamentonan di Reino yega na cierto palabracionnan di cooperacion, entre otro riba tereno di salubridad publico. 

En coneccion cu esaki mi a haña oportuno pa dirigi mi mes na Presidente di e Comision Fijo di Parlamento di Aruba, colega Parlamentario sra. Mervin Ras (kende, manera ta conoci, ta alabes e Presidente di e Comision pa Asuntonan di Salubridad di e diferente Parlamentonan), pa mustra riba e necesidad urgente pa 1) para inmediatamente e contract cu minister Visser a firma cu Baptist memorial riba oncologia, 2) como parti di un maneho total continua cu e projecto super-specialisa riba tereno cardiovascular, y 3) sugeri Gobierno/Parlamento di Corsou pa wanta un rato cu nan proyecto di cardiologia.
Motibo di e pasonan cu mi a sugeri, ta cu Corsou ya tin su propio centro di oncologia, cu – ademas di ta hopi avansa caba – na e momentonan aki ta ser expande mas ainda! Un centro di oncologia na Aruba, ta meramente un desperdicio di fondonan, como cu lo no tin bastante pashent riba nos islanan, tampoco den vecindario cercano, pa haci ambos centro rendabel!
Ta p’esey tambe ya den pasado nos a yega na cierto palabracionnan caba cu Corsou y Bonaire, na unda Corsou lo a establece su centro di oncologia, y Aruba su centro cardiovascular. Aruba lo a ricibi y trata e pashentnan cu problema di curason di Corsou y Bonaire, mientras cu Corsou lo a ricibi y trata e pashentnan riba tereno di oncologia for di Bonaire y Aruba. Ambos centro lo por a atrae e pashentnan tambe for di e otro islanan di Reino, ademas for di e diferente paisnan den vecindario.
Nos vision pa e futuro di e Centro Medico a haci cu e construccion di e Centro Medico a tene cuenta cu expansion di su servicionan medico; despues tabata a base di e palabracionnan menciona, cu a wordo inverti tambe substancialmente den ekipo etc. riba tereno cardiovascular, ekipo cu pa motibo di capricho politico awor ta para deteriora sin por produci ningun “return on investment”.

Siguiendo indicacion di e minister riba un pregunta di un colega Parlamentario pa mas informacion tocante e proyecto di (re-) construccion di hospital, cu e Parlamentario mester dirigi su mes na S.O.G.A. (instituto pa financia edificionan di gobierno), mi a comunica tambe cu S.O.G.A. pa mustra nan riba e situacion aki, haciendo e instituto ademas cierto preguntanan specifico riba e proyecto di hospital.
Den un intento pa scapa locual por ser scapa ainda, mi a mustra S.O.G.A. entre otro riba e hecho cu nos “verwijzingnan” pa exterior di pashentnan cu problema di curason, ta forma e parti mas grandi di e total di “verwijzing”, locual kier men tambe gastonan mas grandi pa e fondo di AZV! Esaki riba su mes caba ta hustifica un continuacion di e proyecto cardiovascular na IMSAN; pone acerca tratamento di pashentnan di Corsou, Bonaire, y otro paisnan den Caribe y vecindario, incluyendo nos otro partnernan den Reino, y bo ta haña un “return on investment” a corto plaso.
Locual ta trata expansion di hospital, mi a referi S.O.G.A. na un rapport di A.I.B. di juni 2007, cu ta recomenda construccion di un hospital nobo, y na un sitio mas central.

Tumando nota di cierto indicacionnan cu hasta den e proyecto di hospital, Baptist Memorial lo ta envolvi, mi a pidi S.O.G.A. copia di convenionan y actanan (notulen di reunionnan) cu ta trata eventual financiamento di e dos proyectonan dor di S.O.G.A. Ademas mi a pidi informacion riba e persona-, instancia- y empresanan – local y internacional – cu lo ta envolvi den ambos proyecto.
Considerando pa loke ta trata IMSAN e diferente motibonan menciona anteriormente, particularmente e “verwijzing” di nos pashentnan di curason pa exterior, cu consecuentemente un berdadero “atropeyo” den e fondonan di AZV, mi a haci un apelacion fuerte riba S.O.G.A. y Parlamento di Aruba, pa duna continuacion na e proyecto “one stop shop”-centro cardiovascular na IMSAN.
Mi ta keda den espera di haya oido cerca ambos instancia, ademas di un muestra di transparencia total den ambos proyecto.