ORANJESTAD- Diahuebs mainta Minister Otmar Oduber tabata presente durante apertura di e workshop organiza pa ATIA “National Social Dialogue Workshop”caminda tabatin dos representante di The International Labour Organization (ILO) invita, esta Rainer Pritzer y Luesette Howell.

Mirando cu recientemente a tuma lugar na Aruba un dialogo social exitoso bou iniciativa di Gabinete Mike Eman, specialmente di Premier Eman mes, ATIA a mira e posibilidad di invita e dos representantenan di ILO pa duna un workshop riba e tema di gran importancia aki y asina por haci un mihor uso di e pataforma aki.

Promer Minister Mike Eman a duna inicio oficial na e workshop caminda cu den su discurso a enfoca riba e parti cu danki na e dialogo social a logra un meta riba cual a papia pa hopi aña y cu finalmente a wordo logra, esta e pension general na Aruba.

Minister Otmar Oduber, como titular di Labor ta considera e presencia di ILO den un tipo di tayer asina, algo importante mirando cu hopi aspecto di e dialogo social ta relaciona directa of inderectamente na e parti laboral. Aki por menciona entre otro e aumento di salario minimo cu a drenta na vigor e luna aki y tambe diferente cambio di leynan cu lo drenta na vigor e aña aki ainda y cu a conta mayoritariamente cu sosten di e partnernan social.

“Aporte di un entidad mundial asina importante manera ILO  ta duna un contribucion grandi na e desaroyo di e dialogo social cu ta iniciativa di nos Promer Minister Mike Eman y cu a conta cu sosten no solamente di henter su Gabinete, pero tambe di e diferente sectornan den nos comunidad”, Minister Oduber a duna di conoce.

Promer cu e workshop a inicia el a haya oportunidad di intercambia di opinion cu tanto Sra. Howell como tambe Sr. Pritzer riba algun tema di importancia pa su ministerio.

E mandatario a felicita ATIA, en especial su Presidente, Ronald van Trigt y su Directora Ehecutivo Joyce Bartels-Daal pa organiza un evento asina cu ta contribui na un mihor desaroyo di e dialogo social na nos isla.