Partidonan ta habri pa profesionalisa e proceso y pa promove mas dialogo

ORANJESTAD- E encuentronan cu tur e partnernan envolvi den e proceso di Dialogo Social a cuminsa riba diahuebs. E intencion ta pa topa cu tur e gruponan envolvi den e proceso y asina, uzando e experticio di Labour Organization (ILO), pa nos ricibi nan guia di con pa dialoga mas y logra yega na mas decisionnan cu ta carga aprobacion di un base mas amplio.

ATIA ta por lo menos un di e partnernan, hunto cu sindicatonan y Gobierno cu a forma parti den e diferente reunionnan relaciona cu Dialogo Social, den cual a logra yega na diferente acuerdo di interes nacional.

Cu esaki nos isla a halsa su mes na nivel di paisnan desaroya cu ta kere den e plataforma di sinta na mesa y hunto formula decisionnan importante na bienestar di nos comunidad.

Ta den e cuadro aki cu ATIA, e organisacion di comercio y industria di nos pais, a atrae dos experto pa duna nos un man den e proceso. Ta trata aki di Sra. Luesette Howell y Sr. Rainer Pritzer di International Labour Organization (ILO).

E workshop ta tumando luga riba diahuebs 26 y diabierna 27 di januari. Copia di tur documento y e ideanan cu presenta durante e encuentronan aki lo bay despues na tur miembro di ATIA.

E organisacion a logra yena un sala di invitadonan pa e prome dia di e workshop, cu a conta cu presencia di por lo menos 3 Minister di e Gobierno actual, miembronan di Parlamento, dirigentenan sindical y tambe dirigentenan empresarial. Tur ta habri pa siña mas for di e expertonan di I.L.O. cu tin un amplio experiencia den dialogo y con pa promove tumamento di decisionnan cu ta wordo carga pa un base mas amplio.

Aruba Trade & Industry Association (ATIA) ta funda desde 18 di juni 1945, bou di e nomber di "De vereniging van Handelaren op Aruba" y na aña 1964 a cambia e nomber pa "De Arubaanse Vereniging voor Handel en Industrie".

Desde e tempo ey nan meta ta pa sirbi e necesidadnan di su miembronan, trahando hunto cu departamentonan di Gobierno y e negoshinan pa promove calidad den e industria comercial di nos pais, pa promove un crecemento stabiel di nos economia y di e calidad di bida di nos hendenan.

Desde aña 2010, Ronald van Trigt ta Presidente di e asociacion, mientras cu a apunta Joyce Bartels-Daal den e funcion di director ehecutivo di e trabounan diario di ATIA. E organisacion ta creciendo den miembresia y cu e vision pa por ta un digno representante di e interes di tur nan miembronan.