ORANJESTAD—Ta ora pa laga Betico Croes na paz y dun’e realmente e posicion cu el a gana, como Libertado di Aruba. Esaki ta pensamento di Guisette Croes, yiu mayor di e difunto lider di Aruba cu kende a culmina e lucha di Status Aparte pa su pueblo. Croes a keda hopi emociona cu tur e actividadnan organisa na ocasion di Dia di Betico, unda rond Aruba tabatin sea fiesta cultural, encuentronan deportivo y unda hasta restaurantnan a rindi honor na e gran politico Arubiano kende ta nifica asina hopi pa e pueblo.

Pero asina mes, Guisette Croes ta sinti cu ainda no a eleva Betico Croes riba e debate politico.  Te ainda e ta forma parti di un discusion politico cu no mester tey mas. Es mas, ta suficiente cu despues di 25 aña ta keda trek na Betico pa beneficio politico propio. Croes ta kere cu ta ora pa reconoce Betico Croes como e estadista cu e ta. “Di un banda ta haya MEP cu te ainda ta uza Betico. No por separa Betico Croes di MEP. Esey ta berdad y ta un hecho. Pero ta ora si cu MEP stop di pronkea cu plumanan di Betico  y cuminza para riba su mes.”

Y mescos e ta haya cu ta ora pa AVP stop di trece den discusion ken ta esun cu a logra Status Aparte pa Aruba. “Mi tin e notulonan di Mesa Rondo y eynan ta pone bon cla ken a logra Status Aparte.” Guisette Croes ta referi particularmente na un buki cu Dr. Mito Croes lo saca na fin di Februari riba mercado, unda segun e por a compronde, ta duna e creditonan pa Status Aparte tanto na e autor di e buki mes cu ta Mito Croes y tambe na Henny Eman. E debate aki ken a logra kico y na ken Betico Croes ta pertenece no ta laga e imagen di e gran estadista Arubiano na paz. Tampoco e ta contribui pa berdad por mira Betico Croes los di politica, algo cu mester sosode finalmente.

Y esaki ta motibo tambe pakico yiunan di Betico Croes no tabata kier a haci mucho drama cu e destruccion riba graf di nan tata, April pasa. “E tabata un dolor inmenso. Tabata mescos cu a bolbe laga un herida sangra,” Guisette Croes a bisa. Pero asina mes, a scoge pa mantene calmo, pa asina  evita cu emocionnan por bay for di man na Aruba. Esey no ta nifica si cu pa e yiunan, no mester bin claridad.

Al contrario, Guisette Croes ta haya cu aki ta ora pa por fin por tin husticia pa su tata. “Na 1983 ora cu un agente policial a tira mi tata, no tabatin husticia. Na 1985, e tabata envolvi den un accidente misterioso y atrobe husticia no por a clarifica kico of ken por a ocasiona e accidente. Y despues a bin e destruccion di e graf.” Guisette Croes a mustra cu te ainda, despues di casi un aña, e yiunan no a tende net nada di husticia riba cualkier sospecho y ta algo cu no por acepta.

Pasobra, mas cu e politico, Betico Croes tabata un tata sumamente cariñoso cu a duna nan hopi amor na su cuater yiunan, apesar cu nan no a pasa hopi tempo cu n’e. Nan ta compronde cu nan tata tabatin un obhetivo cu ta logra e Status Aparte. Betico tabatin apenas 48 aña dia cu el a muri, y su yiu mayor tabatin 23. Riba dje, e yiunan a bay studia afo, cu a kita mas tempo ainda for di nan tata. Pero asina mes e yiu muhe mayor ta gradecido pa e calidad di tempo cu e por a pasa cu su tata. “E tabata trata mi como un adulto. Por ehempel, na e forma con e tabata sinta cu mi na momento si mi mester tabatin un mal punto riba raport.” Den e ultimo dianan, Guisette Croes a pasa tempo ta publica potretnan di Betico Croes den su momentonan priva, cu su casa, su yiunan ilustrando cu banda di e politico grandi, e tabata tambe un tata di famia, un yiu, un ruman y un musico.

Pero asina mes cu ainda e politica di Aruba no ta permiti pa Betico Croes logra e posicion eleva cu e merece, su yiu muhe ta mira atras na un celebracion dedica na su tata cu hopi satisfaccion. Pasobra e expresion di amor di Aruba pa su tata ta un consuelo pa e hecho cu a perd’e na edad hopi jong, y cu tin ainda  preguntanan cu mester di contesta. Croes ta kere si cu ta e generacion hoben awor aki cu despues lo carga e celebracion di Dia di Betico lo ta esun cu berdad lo percura cu e estadista grandi ta keda commemora como e Libertado, sin cu  ta keda mar’e na politica.